എന്നെ വേദനിപ്പിച്ച ആർട്ടിക്കിളുകൾ അന്ന് വന്നു; എത്രയോ കാലം എനിക്കാ സംശയമുണ്ടായി; ജ്യോത്സ്ന

കൊച്ചി:സം​ഗീത ലോകത്ത് തന്റേതായ സ്ഥാനം നേടാൻ കഴിഞ്ഞ ​ഗായികയാണ് ജ്യോത്സ്ന. ജ്യോത്സനയുടെ ​ഗാനങ്ങൾ ഒന്നിന് പിറകെ ഒന്നായി ഹിറ്റായ ഒരു കാലഘട്ടം മലയാള സിനിമാ ലോകത്തുണ്ടായിരുന്നു. രണ്ടായിരത്തിന്റെ തുടക്ക വർഷങ്ങളിൽ യുവത്വത്തിന്റെ ഹരമായി ജ്യോത്സ്നയുടെ ശബ്ദം മാറി. സ്വപ്നക്കൂട്, നമ്മൾ തുടങ്ങിയ സിനിമകളിലെ ​ഗാനങ്ങൾ ആരാധകർ ഏറ്റെടുത്തു. പുതിയ ​ഗായകർക്ക് വലിയ അവസരങ്ങൾ കിട്ടാത്തപ്പോഴാണ് ചെറുപ്രായത്തിൽ തന്നെ ജ്യോത്സ്ന പ്ര​ഗൽഭരായ സം​ഗീത സംവിധായകർക്കൊപ്പം ഹിറ്റ് ​ഗാനങ്ങൾ പാടിയത്.

അന്ന് ഇത് വലിയ തോതിൽ ചർച്ചയായി. പലപ്പോഴും കുറ്റപ്പെടുത്തലുകളും ജ്യോത്സ്നയ്ക്ക് വന്നു. ഇതേക്കുറിച്ച് സംസാരിക്കുകയാണ് ​ഗായികയിപ്പോൾ. യെസ് എഡിറ്റോറിയലിന് നൽകിയ അഭിമുഖത്തിലാണ് ജ്യോത്സന അനുഭവങ്ങൾ പങ്കുവെച്ചത്. വർഷങ്ങളായി പാ‌ട്ട് പഠിച്ച് ഇതിന് വേണ്ടി കഷ്ട‌പ്പെട്ട് നടക്കുന്ന എത്രയോ പാട്ടുകാർ ആ സമയത്തും ഉണ്ടായിരുന്നു. പക്ഷെ എന്തുകൊണ്ടോ ഈ അവസരം എനിക്ക് വന്നതാണ്.

ആ സമയത്ത് ആർട്ടിക്കിളുകൾ വരെ വന്നിട്ടുണ്ട്. കഴിവില്ലെന്നൊക്കെ പറഞ്ഞു. മോശമായി എഴുതിയ ഒരുപാട് ആർട്ടിക്കിളുകൾ വന്നു. ചിലതൊക്കെ ഞാൻ വായിച്ചിട്ടുമുണ്ട്. അതെന്നെ വേദനിപ്പിച്ചു. നല്ല ലേഖനകളും വന്നിട്ടുണ്ട്. പുതിയ ശബ്ദമാണ്. പുതിയ സ്റ്റെെലിൽ പാടുന്നു. വ്യത്യസ്തമായ എന്ത് വന്നാലും അം​ഗീകരിക്കാൻ കുറച്ച് സമയമെടുക്കും. ‌ടെക്നോളജി കൊണ്ട് രക്ഷപ്പെട്ടതാണെന്നൊക്കെ പറയുമായിരുന്നു.

പക്ഷെ അതിൽ ഒന്നും ചെയ്യാനില്ല. അവസരങ്ങൾ വന്നത് ആ സമയത്ത് എനിക്ക് ഭാ​ഗ്യമുണ്ടായത് കൊണ്ടാണ്. ഔസേപ്പച്ചൻ, രവീന്ദ്രൻ മാസ്റ്റർ, ജയചന്ദ്രൻ, ജാസി ​ഗിഫ്റ്റ്, അൽഫോൻസ് തുടങ്ങി പ്ര​ഗൽഭരുടെ പാട്ടുകൾ പാടാൻ പറ്റിയെന്നും ജ്യോത്സ്ന വ്യക്തമാക്കി. അത്ര മോശം ആയിരുന്നെങ്കിൽ ഇവർക്കൊപ്പമുള്ള അവസരം ലഭിക്കില്ലായിരുന്നു. അന്നെനിക്ക് 16-17 വയസേയുള്ളൂ.

ഇത്തരം കാര്യങ്ങൾ വായിക്കുമ്പോൾ നമ്മൾക്ക് സ്വയം സംശയം തോന്നും. ശരിക്കും കഴിവില്ലേ, ഭാ​ഗ്യം മാത്രമാണോ എന്നൊക്കെ തോന്നും. എത്രയോ കാലം ഞാൻ ആ സംശയം വെച്ച് ജീവിച്ചു. കുറച്ച് അനുഭവങ്ങൾ ആയപ്പോൾ സ്വന്തം കഴിവ് മനസിലായെന്നും ജ്യോത്സ്ന വ്യക്തമാക്കി. ​ഗായികയാകണമെന്ന് ആ​ഗ്രഹിച്ച് വന്നയാളല്ലെന്ന് ജ്യോത്സ്ന പറയുന്നു. താൻ പതിനാറ് വയസിൽ തനിക്ക് ലഭിച്ച ഈ പേരും പ്രശസ്തിയും എങ്ങനെ അന്ന് കൈകാര്യം ചെയ്തെന്ന് ഇപ്പോഴും ആലോചിക്കാറുണ്ട്.

ഇത് എന്റെ ഷോർട്ട് ടൈം പ്ലാനിൽ പോലും ഇല്ലാത്ത സംഭവമായിരുന്നു. നമ്മളൊന്നും സ്വപ്നത്തിൽ പോലും അതൊന്നും വിചാരിച്ചിരുന്നില്ലെന്നും ജ്യോത്സ്ന വ്യക്തമാക്കി. ജ്യോത്സ്നയുടെ പുതിയ ​ഗാനങ്ങൾക്കായി കാത്തിരിക്കുകയാണ് ആരാധകർ. റിയാലിറ്റി ഷോകളിൽ ജഡ്ജായി ജ്യോത്സ്ന എത്താറുണ്ട്. 2002 ൽ പുറത്തിറങ്ങിയ പ്രണയമണിത്തൂവൽ എന്ന ചിത്രത്തിലെ വളകിലുക്കമെന്ന ​ഗാനത്തിന് പിന്നണി പാടിക്കൊണ്ടാണ് ജ്യോത്സ്ന സിനിമാ രം​ഗത്തേക്ക് വരുന്നത്. നമ്മൾ എന്ന സിനിമയിൽ എന്തുസുഖമാണീ നിലാവ് എന്ന ​ഗാനത്തിലൂടെ ​ഗായിക ശ്രദ്ധിക്കപ്പെട്ടു. ജ്യോത്സ്നയുടെ പല ​ഗാനങ്ങളും ഇന്നും ജനപ്രീതിയിൽ മുന്നിലാണ്.