ദുബായ്: അമേരിക്കയില് ചികിത്സ പൂര്ത്തിയാക്കി മുഖ്യമന്ത്രി പിണറായി വിജയന് ഇന്ന് ദുബായിലെത്തും. ഒരാഴ്ച ദുബായില് തങ്ങുന്ന മുഖ്യമന്ത്രി യുഎഇയിലെ മന്ത്രിമാരും വ്യവസായ പ്രമുഖരുമായി കൂടിക്കാഴ്ച നടത്തും. ആദ്യത്തെ മൂന്ന് ദിവസം പൂര്ണ വിശ്രമത്തിലായിരിക്കും. അതിനുശേഷം വിവിധ എമിറേറ്റുകള് സന്ദര്ശിക്കുകയും യുഎഇയിലെ മന്ത്രിമാര് അടക്കമുള്ളവരുമായി ചര്ച്ച നടത്തുകയും ചെയ്യുക.
ഫെബ്രുവരി നാലിന് ദുബായ് എക്സ്പോയിലെ ഇന്ത്യന് പവലിയനില് കേരള സ്റ്റാളിന്റെ ഉദ്ഘാടനവും മുഖ്യമന്ത്രി നിര്വഹിക്കും.ചെറുകിട-ഇടത്തരം വ്യവസായങ്ങള്ക്ക് ഏറ്റവും യോജിച്ച സംസ്ഥാനമായി കേരളത്തെ ഉയര്ത്തിക്കാട്ടാനായിരിക്കും അവസരം വിനിയോഗിക്കുക. രാജ്യാന്തര വ്യവസായികളെ ഉള്പ്പെടുത്തി ഫെബ്രുവരി അഞ്ച് ആറ് തിയതികളില് രണ്ടു നിക്ഷേപക സംഗമങ്ങളും മുഖ്യമന്ത്രിയുടെ നേതൃത്വത്തില് ദുബായില് നടത്തും.
അറബ്, രാജ്യാന്തര വ്യവസായികളെ ഉള്പ്പെടുത്തിയും മലയാളി വ്യവസായികളെ ഉള്പ്പെടുത്തിയുമായിരിക്കും സമ്മേളനങ്ങള്. മുഖ്യമന്ത്രിയെ കൂടാതെ വ്യവസായ മന്ത്രി പി രാജീവ്, രാജ്യസഭാംഗം ജോണ് ബ്രിട്ടാസ് തുടങ്ങിയവര് ചര്ച്ചകളില് പങ്കെടുക്കും.