മുംബൈ: നടനും ടെലിവിഷൻ താരവുമായ നിധിൻ ചൗഹാൻ ആത്മഹത്യ ചെയ്തു. 35 വയസ്സായിരുന്നു. രാവിലെയോടെയായിരുന്നു സംഭവം. പോലീസ് സംഭവത്തിൽ അന്വേഷണം ആരംഭിച്ചിട്ടുണ്ട്. എംടിവി സ്പ്ലിറ്റ്‌സ്‌വില്ല 5, ക്രൈം പട്രോൾ, തേരാ യാർ ഹൂ മെയിൻ എന്നീ ടെലിവിഷൻ പരിപാടികളിലൂടെയാണ് നിധിൻ ചൗഹാൻ ശ്രദ്ധേയനായത്.
രാവിലെ താരത്തെ മുറിയ്ക്കുള്ളിൽ അവശനിലയിൽ കാണപ്പെടുകയായിരുന്നുവെന്നായിരുന്നു സൂചന. ഉടനെ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. മൃതദേഹം ആശുപത്രിയിൽ സൂക്ഷിച്ചിരിക്കുകയാണ്. പോസ്റ്റ്‌മോർട്ടത്തിന് ശേഷം മൃതദേഹം ബന്ധുക്കൾക്ക് കൈമാറും.
താരത്തിന്റെ വിയോഗ വാർത്തയുടെ ഞെട്ടലിലാണ് ടെലിവിഷൻ ലോകം. നിരവധി പ്രമുഖർ അദ്ദേഹത്തിന് ആദരാഞ്ജലി നേർന്നു. നിധിന്റെ വിയോഗ വാർത്ത വലിയ ഞെട്ടലുണ്ടാക്കിയതായി നടി വിഭൂതി താക്കൂർ പറഞ്ഞു. നിന്റെ ശരീരം പോലെ തന്നെ മനസും ശക്തമായിരുന്നെങ്കിൽ എന്ന് ഞാൻ ഈ വേളയിൽ ആഗ്രഹിച്ചുപോകുകയാണ്. നിനക്ക് എല്ലാ പ്രതിസന്ധികളെയും തരണം ചെയ്യാൻ കഴിഞ്ഞിരുന്നെങ്കിൽ എന്ന് ചിന്തിച്ച് പോകുകയാണ് എന്നും വിഭൂതി പറഞ്ഞു.
