ഡൽഹി: യൂട്ടെൽസാറ്റ് ഗ്രൂപ്പിന്റെ ഉപസ്ഥാപനമായ യൂട്ടെൽസാറ്റ് വൺവെബിന്റെ വാണിജ്യ സാറ്റലൈറ്റ് ബ്രോഡ്‌ബാൻഡ് സേവനങ്ങൾ രാജ്യത്ത് ആരംഭിക്കുന്നതിനുള്ള അനുമതി നേടി ഭാരതി ഗ്രൂപ്പിന്റെ ഭാഗമായ വൺവെബ് ഇന്ത്യ. ഇന്ത്യയുടെ ബഹിരാകാശ നിയന്ത്രണ സ്ഥാപനമായ IN-SPACe-ൽ നിന്നാണ് കമ്പനി നിർണ്ണായകമായ അനുമതി തേടിയെടുത്തത്. ഭാരതിയുടെ ബഹിരാകാശ പിന്തുണയുള്ള ആഗോള കമ്യൂണിക്കേഷന്‍സ് നെറ്റ്‌വര്‍ക്ക് സ്ഥാപനമായ വണ്‍വെബിന് യൂട്ടെല്‍സാറ്റ് കമ്യൂണിക്കേഷനില്‍ നിന്നും 55 കോടി ഡോളറിന്റെ നിക്ഷേപം നേരത്തെ ലഭിച്ചിരുന്നു.
ഈ അംഗീകാരം ലഭിച്ച ആദ്യത്തെ സ്ഥാപനമാണ് വൺവെബ് ഇന്ത്യ. വാണിജ്യ വിക്ഷേപണത്തിന് മുമ്പ് ആവശ്യമായ എല്ലാ നിയന്ത്രണ അനുമതികളും നേടുന്ന ഒരേയൊരു സാറ്റലൈറ്റ് ബ്രോഡ്‌ബാൻഡ് സേവന ദാതാവായി ഇതോടെ കമ്പനി മാറുകയും ചെയ്തിരുന്നു.
യൂട്ടെൽസാറ്റ് വൺവെബിന്റെ വാണിജ്യ ഉപഗ്രഹ ബ്രോഡ്‌ബാൻഡ് സേവനങ്ങൾ ഇന്ത്യയിൽ സമാരംഭിക്കുന്നതിന് ഇന്ത്യൻ സ്‌പേസ് റെഗുലേറ്ററിന്റെ പച്ചക്കൊടി കാണിച്ചതില്‍ ഞങ്ങൾക്ക് അതിയായ സന്തോഷമുണ്ടെന്ന് യൂട്ടൽസാറ്റ് ഗ്രൂപ്പിന്റെ ഡയറക്ടർ ബോർഡിന്റെ ഭാരതി ഗ്രൂപ്പ് ചെയർമാനും വൈസ് പ്രസിഡന്റുമായ (കോ-ചെയർ) സുനിൽ ഭാരതി മിത്തൽ വ്യക്തമാക്കി.
എല്ലാവർക്കും ഇന്റർനെറ്റ് കണക്റ്റിവിറ്റി നൽകാനുള്ള ഇന്ത്യയുടെ അഭിലാഷം നിറവേറ്റുന്നതിനുള്ള നിർണായകമായ ഒരു ചുവടുവയ്പ്പാണിത്, കൂടാതെ ബഹുമാനപ്പെട്ട പ്രധാനമന്ത്രിയുടെ ഡിജിറ്റൽ ഇന്ത്യ എന്ന കാഴ്ചപ്പാട് പ്രാപ്തമാക്കുകയും ചെയ്യും. വാണിജ്യ സേവനങ്ങൾ ആരംഭിക്കുന്നതിനുള്ള അന്തിമ സ്പെക്ട്രം അംഗീകാരം ലഭിച്ചാലുടൻ രാജ്യത്തുടനീളം വിന്യസിക്കാൻ തങ്ങള്‍ തയ്യാറാണെന്നും അദ്ദേഹം കൂട്ടിച്ചേർത്തു.
സാറ്റലൈറ്റ് വഴിയുള്ള ഇന്റർനെറ്റ് സേവനങ്ങൾക്കായി ഗുജറാത്തിലെ മെഹ്‌സാനയിൽ ഗ്രൂപ്പ് സാറ്റലൈറ്റ് ഗ്രൗണ്ട് സ്റ്റേഷൻ സ്ഥാപിച്ചതിന് ശേഷം നവംബറിൽ യൂട്ടെൽസാറ്റ് വൺവെബ് സേവനം ആരംഭിക്കുമെന്ന് മിത്തൽ കഴിഞ്ഞ മാസം പറഞ്ഞിരുന്നു. ഇന്നത്തെ അനുമതിയോടെ സ്പെക്ട്രം അലോക്കേഷൻ സർക്കാർ അനുവദിച്ചാലുടൻ കമ്പനിക്ക് വാണിജ്യ കണക്റ്റിവിറ്റി സേവനങ്ങൾ ആരംഭിക്കാൻ കഴിയും എന്നാണ്.
ഗുജറാത്തിലും തമിഴ്‌നാട്ടിലും രണ്ട് ഗേറ്റ്‌വേകൾ സ്ഥാപിക്കുന്നതിനും പ്രവർത്തിപ്പിക്കുന്നതിനും ബിസിനസ് തത്വത്തിൽ അംഗീകാരം നേടിയിട്ടുണ്ട്. സേവനങ്ങൾ പുറത്തിറങ്ങിക്കഴിഞ്ഞാൽ, ഇന്ത്യയിലുടനീളമുള്ള ഉപഭോക്താക്കൾക്ക് സുപ്രധാനമായ ഹൈ-സ്പീഡ്, ലോ-ലേറ്റൻസി ഇന്റർനെറ്റ് കണക്റ്റിവിറ്റി ഉറപ്പാക്കും.
വാണിജ്യ സേവനങ്ങളുടെ തുടക്കം ഗവൺമെന്റിന്റെ സാറ്റലൈറ്റ് സ്പെക്ട്രം അനുവദിക്കുന്നതിനായി കാത്തിരിക്കുകയാണ്. ഇത് ലേലം സംബന്ധിച്ച ടെലികോം റെഗുലേറ്ററിന്റെ ശുപാർശകളെ ആശ്രയിച്ചിരിക്കുന്നു.
ലോ എർത്ത് ഓർബിറ്റ് സാറ്റലൈറ്റ് പ്രവർത്തനങ്ങൾക്ക് പേരുകേട്ട യൂട്ടെൽസാറ്റ് വൺവെബ് ഈ അംഗീകാരങ്ങളിലൂടെ ഇന്ത്യൻ വിപണിയിൽ സാന്നിധ്യം ഉറപ്പിക്കുമെന്നും റിപ്പോർട്ടുകള്‍ വ്യക്തമാക്കുന്നു.
