തിരുവനന്തപുരം:ട്രിപ്പിള് ലോക്ക്ഡൗൺ ഏർപ്പെടുത്തിയ ജില്ലകളിലും ബാങ്കുകളുടെ പ്രവൃത്തി ദിനം തിങ്കള്, ബുധന്, വെള്ളി ദിവസങ്ങളിലായിരിക്കും.
നിശ്ചിത സമയപരിധിയിൽ മിനിമം ജീവനക്കാരെ വെച്ച് ഇത് നടപ്പാക്കണം.
മറ്റു ജില്ലകളില് എല്ലാ ബാങ്കുകളും തിങ്കള്, ബുധന്, വെള്ളി ദിവസങ്ങളിലാണ് പ്രവര്ത്തിക്കുന്നത്. ബാങ്കിംഗ് ഇടപാടുകള് സുഗമമാക്കാന് എല്ലാ ജില്ലകളിലും ബാങ്കുകള് ഒരു പോലെ പ്രവര്ത്തിക്കേണ്ടിവരുന്നതിനാലാണ് പുതിയ തീരുമാനം.
ട്രിപ്പിള് ലോക്ക്ഡൗൺ ഉള്ള ജില്ലകളിലും പാൽ, പത്രം വിതരണം രാവിലെ 8 മണി വരെ അനുവദിക്കും.മത്സ്യവിതരണംകൂടി ഈ സമയത്തിനുള്ളില് അനുവദിക്കും.
രോഗ വ്യാപനം തീവ്രമായ നാല് ജില്ലകളിൽ ഇന്നലെ അർദ്ധരാത്രി മുതൽ ട്രിപ്പിൾ ലോക്ക് ഡൗൺ ഏർപ്പെടുത്തിയത്. തിരുവനന്തപുരം, എറണാകുളം, തൃശൂർ, മലപ്പുറം ജില്ലകളിൽ ആണ് ട്രിപ്പിൾ ലോക്ക് ഡൗൺ. മാർഗ നിർദേശങ്ങൾ ലംഘിക്കുന്നവർക്ക് എതിരെ ശക്തമായ നടപടി സ്വീകരിക്കാൻ നിർദേശം നൽകിയിട്ടുണ്ട്.
രോഗവ്യാപനം നിയന്ത്രിക്കാനുള്ള ഏറ്റവും കര്ശനമായ മാര്ഗമാണ് ട്രിപ്പിള് ലോക്ഡൗണ്. ട്രിപ്പിള് ലോക്ഡൗണ് പ്രഖ്യാപിച്ച ഇടങ്ങളില് പ്രവേശിക്കാനും പുറത്തു കടക്കാനും ഒരു വഴി മാത്രമേ അനുവദിക്കുകയുള്ളൂ. ട്രിപ്പിള് ലോക്ഡൗണ് നടപ്പാക്കുന്ന പ്രദേശങ്ങളെ സോണുകളായി തിരിച്ച് നിയന്ത്രണ ചുമതല ഉയര്ന്ന പൊലീസ് ഉദ്യോഗസ്ഥരെ ഏല്പ്പിക്കും. ആള്ക്കൂട്ടമുണ്ടാകുന്നത് കണ്ടെത്താന് ഡ്രോണ് പരിശോധനയും ക്വാറന്റൈന് ലംഘിക്കുന്നത് കണ്ടെത്താന് ജിയോ ഫെന്സിങ്ങ് സാങ്കേതികവിദ്യയും ഉപയോഗിക്കും. ക്വാറന്റൈന് ലംഘിക്കുന്നവര്ക്ക് മാത്രമല്ല, അതിനു സഹായം നല്കുന്നവര്ക്കെതിരേയും നടപടികള് എടുക്കും.
ഭക്ഷണമെത്തിക്കുന്നതിനാവശ്യമായ നടപടികള്ക്ക് വാര്ഡ് സമിതികള് നേതൃത്വം നല്കണം. കമ്യൂണിറ്റി കിച്ചനുകള്, ജനകീയ ഹോട്ടലുകള് എന്നിവ ഇതിനായി ഉപയോഗപ്പെടുത്തണം. അതില്ക്കവിഞ്ഞുള്ള സാമൂഹിക പ്രവര്ത്തനങ്ങളെല്ലാം ട്രിപ്പിള് ലോക്ഡൗണ് പ്രഖ്യാപിച്ച ഇടങ്ങളില് പരിപൂര്ണമായി ഒഴിവാക്കണം. ട്രിപ്പിള് ലോക്ക്ഡൗണ് കര്ശനമായി നടപ്പാക്കാന് പതിനായിരം പോലീസുകാരെയാണ് നിയോഗിച്ചിരിക്കുന്നത്.
മരുന്നുകട, പെട്രോള് ബങ്ക് എന്നിവ തുറക്കും. പത്രം, പാല് എന്നിവ രാവിലെ ആറുമണിക്കു മുന്പ് വീടുകളില് എത്തിക്കണം. വീട്ടുജോലിക്കാര്, ഹോം നേഴ്സ് എന്നിവര്ക്ക് ഓണ്ലൈന് പാസ് വാങ്ങി യാത്ര ചെയ്യാം. പ്ലംബര്മാര്, ഇലക്ട്രീഷ്യന്മാര് മുതലായവര്ക്കും ഓണ്ലൈന് പാസ് വാങ്ങി അടിയന്തരഘട്ടങ്ങളില് യാത്രചെയ്യാം. വിമാനയാത്രക്കാര്ക്കും ട്രെയിന് യാത്രക്കാര്ക്കും യാത്രാനുമതി ഉണ്ട്. ബേക്കറി, പലവ്യഞ്ജനക്കടകള് എന്നിവ ഒന്നിടവിട്ട ദിവസങ്ങളില് തുറക്കുന്നതാണ് അഭികാമ്യം.
ജില്ലകളുടെ അതിര്ത്തികള് അടച്ചിടും. തിരിച്ചറിയല് കാര്ഡുമായി വരുന്ന അവശ്യവിഭാഗങ്ങളിലുള്ളവര്ക്കു മാത്രമേ യാത്രാനുമതി ഉണ്ടാകൂ. അകത്തേയ്ക്കും പുറത്തേയ്ക്കും യാത്രയ്ക്കായുള്ള ഒരു റോഡൊഴികെ കണ്ടെയ്ന്മെന്റ് സോണ് മുഴുവനായും അടയ്ക്കും.