ചെന്നൈ:അവസാന പന്ത് വരെ ആവേശം അലതല്ലിയ കലാശപ്പോരാട്ടത്തിലാണ് 2023-ലെ ഇന്ത്യൻ പ്രീമിയ‌ർ ലീഗ് (ഐപിഎൽ) കിരീടം, മഹേന്ദ്ര സിങ് ധോണിയുടെ നേതൃത്വത്തിലുള്ള ചെന്നൈ സൂപ്പർ കിങ്സ് (സിഎസ്കെ) സ്വന്തമാക്കിയത്.
ലീഗ് ക്രിക്കറ്റിൽ ലക്ഷക്കണക്കിന് ആരാധകരും അനവധി റെക്കോഡ് നേട്ടങ്ങളും കൈവശമുള്ള സിഎസ്കെയുടെ അഞ്ചാം ഐപിഎൽ കിരീട നേട്ടമാണിത്. സീസണിലൂടനീളം നേടിയ ആരാധകരുടെ അചഞ്ചലമായ പിന്തുണയും കാണികളെ ആകർഷിക്കുന്നതും കണക്കിലെടുക്കുമ്പോൾ ഇത്തവണത്തെ കിരീടം ധോണിക്കും കൂട്ടർക്കും എഴുതിവെച്ചിരുന്നതാണെന്ന് തോന്നിപ്പോകും.
ലീഗ് ക്രിക്കറ്റിലെ താരപരിവേഷം, അൺലിസ്റ്റഡ് ഓഹരി വിപണിയിലെ നിക്ഷേപകർക്കിടയിലും ഇതിനകം നേടിയെടുത്തിട്ടുള്ള ടീമാണ് ചെന്നൈ സൂപ്പർ കിങ്സ്. 2017-18 കാലഘട്ടത്തിലായിരുന്നു ചെന്നെ സൂപ്പർ കിങ്സ്, അൺലിസ്റ്റഡ് വിപണിയിലേക്ക് രംഗപ്രവേശം ചെയ്തത്.
ഇത്തവണ സീസൺ ആരംഭിച്ചതിന്റെ ഒന്നാം ദിനം മുതൽ, അൺലിസ്റ്റഡ് വിപണിയിലും ശ്രദ്ധാകേന്ദ്രമാകാൻ കമ്പനിയുടെ ഓഹരിക്ക് കഴിഞ്ഞിട്ടുണ്ടെന്ന് ഈ മേഖലയിലെ വിദഗ്ധർ സാക്ഷ്യപ്പെടുത്തുന്നു. ഇന്ത്യൻ ഓഹരി വിപണിയിലെ ബ്ലൂചിപ് കമ്പനികളിലൊന്നും ഏത് സമയത്തും നിക്ഷേപകരുടെ ഇഷ്ടസങ്കേതവുമായ ഐടിസിക്ക് സമാനമാണ് അൺലിസ്റ്റഡ് വിപണിയിലെ ചെന്നൈ സൂപ്പർ കിങ്സിന്റെ ഓഹരിയെന്നാണ് ഒരു വിപണി വിദഗ്ധന്റെ കമന്റ്.
23-28 രൂപ നിലവാരത്തിൽ നിന്നിരുന്ന സിഎസ്കെ ഓഹരി, സ്റ്റാർട്ടപ്പ് കമ്പനികളിലേക്ക് നിക്ഷേപം ഒഴുകിയെത്തിയ 2022-ന്റെ പാരമ്യത്തിൽ 230 രൂപയിലേക്ക് വരെ മുന്നേറിയിരുന്നു. അതേസമയം ഐപിഎൽ മത്സരം നടക്കുന്ന വേളയിൽ, കഴിഞ്ഞ 2-3 മാസങ്ങളായി സിഎസ്കെയുടെ ഓഹരികളിലെ വ്യാപാരത്തിന്റെ ഭൂരിഭാഗവും 160 രൂപയിലും മുകളിലെ നിലവാരത്തിലാണ് സ്വകാര്യ വിപണിയിൽ നടന്നതെന്ന്, അൺലിസ്റ്റഡ്കാർട്ടിന്റെ ലീഡ് സ്ട്രാറ്റജിസ്റ്റ്, തേജസ് ജഗന്നാഥ് ചൂണ്ടിക്കാട്ടി.
നിലവിൽ സിഎസ്കെ കമ്പനിക്ക് 5,600 കോടി രൂപ വിപണി മൂല്യമാണ് കൽപ്പിക്കപ്പെടുന്നത്. സീസണിലെ പ്രകടനം എങ്ങനെയായാലും പ്രതിവർഷം 10-15 ശതമാനം നിരക്കിൽ വളർച്ച കാണിക്കുന്നുണ്ടെന്നും ജഗന്നാഥ് പറഞ്ഞു.
നിലവിൽ മറ്റ് ഐപിഎൽ ടീമുകളായ മുംബൈ ഇന്ത്യൻസിനേക്കാളും രാജസ്ഥാൻ റോയൽസിനേക്കാളും വളരെ മുന്നിലാണ് ചെന്നൈ സൂപ്പർ കിങ്സ് നിൽക്കുന്നതെന്ന് വിപണി വിദഗ്ധർ പറയുന്നു. 2023 സീസണിലെ കിരീട നേട്ടത്തിനു ശേഷം സിഎസ്കെ ഓഹരിയുടെ വിലയിൽ 15 ശതമാനം വർധനയോട 168 രൂപ നിലവാരത്തിലാണ് വ്യാപാരം ചെയ്യപ്പെടുന്നത്
ബ്രാൻഡ് സിഎസ്കെ എന്നത് ബ്രാൻഡ് ധോണിയുടെ പര്യായമാണെന്നും മാർക്കറ്റ് അനലിസ്റ്റ് സാക്ഷ്യപ്പെടുത്തുന്നു. എന്തായാലും ഐപിഎൽ കിരീട നേട്ടത്തിനു ശേഷമുള്ള ആദ്യ പ്രതികരണത്തിലും അടുത്ത സീസണിലും പരമാവധി പങ്കെടുക്കാൻ ശ്രമിക്കുമെന്ന ധോണിയുടെ വാക്കുകളെ ആരാധകരും നിക്ഷേപകരും ഒരുപോലെയാണ് സ്വീകരിക്കുന്നത്.