രോഗലക്ഷണങ്ങള്‍ തുടങ്ങുന്നതിന് മുന്‍പ് തന്നെ കൊവിഡ് -19 കണ്ടുപിടിക്കാന്‍ ഉതകുന്ന മൈക്രോചിപ് വികസിപ്പിച്ചെടുക്കുന്ന രഹസ്യ ഗവേഷണം നടത്തി പെന്റഗണിലെ ശാസ്ത്രജ്ഞര്‍. ത്വക്കിന് തൊട്ടു താഴെയാണ് മൈക്രോ ചിപ്പ് സ്ഥാപിക്കുന്നത്.
”മൈക്രോചിപ്” എന്നതുകൊണ്ട് ഉദ്ദേശിക്കുന്നത് വിവരശേഖരണത്തിനായി ഉപയോഗിക്കുന്നതോ അല്ലെങ്കില്‍ ആളുകളുടെ നീക്കങ്ങള്‍ മനസ്സിലാക്കുന്നതിനോ ഉപയോഗിക്കുന്ന ഇലക്ട്രോണിക് ചിപ്പുകളല്ല. മറിച്ച്, ചില രാസപ്രവര്‍ത്തനങ്ങളിലേര്‍പ്പെടാന്‍ കഴിയുന്ന വളരെ ചെറിയ കോശങ്ങളുടെ കൂട്ടമാണ്.
ശരീരത്തില്‍ അണുബാധ സൃഷ്ടിക്കുന്ന വൈറസിനെ രക്തത്തില്‍നിന്നും വേര്‍തിരിച്ചെടുക്കുന്ന ഫില്‍റ്ററും കണ്ടെത്തിയിരിക്കുകയാണവര്‍. ഇതിനായി ഡയാലിസിസ് യൂണിറ്റുമായി ബന്ധിപ്പിക്കേണ്ടതുണ്ട്.
ഇങ്ങനെ അണുബാധയുള്ള ഒരാളുടെ രക്തത്തിലുള്ള വൈറസിനെ വേര്‍തിരിച്ച ശേഷം അണുവിമുക്തമായ രക്തം തിരികെ രോഗിയുടെ ശരീരത്തിലേയ്ക്കുതന്നെ കടത്തിവിടാവുന്നതാണ്. ജനിതകമാറ്റം സംഭവിച്ച പലയിനം കൊറോണ വൈറസുകള്‍ക്കെതിരെ ഉപയോഗിക്കാവുന്ന ഫലപ്രദമായ വാക്‌സിന്‍ കണ്ടുപിടിക്കുന്നതിനുമുള്ള ശ്രമങ്ങള്‍ നടത്തിവരുന്നുണ്ട് ഈ ശാസ്ത്രജ്ഞര്‍. പെന്റഗണിലെ ഡിഫന്‍സ് അഡ്വാന്‍സ്ഡ് റിസര്‍ച്ച് പ്രോജക്ട് ഏജന്‍സിയിലെ (ഡി എ ആര്‍ പി എ ) ശാസ്ത്രജ്ഞരുടെ സംഘം പകര്‍ച്ചവ്യാധികള്‍ തടയുന്നതിനും അവസാനിപ്പിക്കുന്നതിനുമായി വര്‍ഷങ്ങളായി പ്രവര്‍ത്തിച്ചുവരുന്നു.
യു എസ് നാവികസേനയുടെ വിമാനങ്ങളെ വഹിക്കുന്ന കപ്പലായ യുഎസ്എസ് തിയോഡോര്‍ റൂസ്വെല്‍ട്ടില്‍ 1271 ജീവനക്കാര്‍ക്ക് കോവിഡ് ബാധ കണ്ടെത്തിയതോടെയാണ് ഈ പുതിയ പരീക്ഷണങ്ങള്‍ക്ക് തുടക്കമായത്. ‘ സ്പാനിഷ് ഫ്‌ലൂ” എന്ന മഹാമാരിയ്ക്ക് ഫലപ്രദമായ പ്രതിരോധമരുന്ന് കണ്ടുപിടിക്കാന്‍ ഡിഫന്‍സ് അഡ്വാന്‍സ്ഡ് റിസര്‍ച്ച് പ്രോജക്ട് ഏജന്‍സിയിലെ ശാസ്ത്രജ്ഞര്‍ക്ക് കഴിഞ്ഞിട്ടുണ്ട്.
