‘സ്‌പ്ലെന്‍ഡര്‍ എന്റെ വീക്ക്‌നെസാ സാറേ,കണ്ടാല്‍ ഞാനങ്ങ് എടുക്കും’ കോടതി വരാന്തയില്‍ നിന്ന് ചാടി രക്ഷപെട്ടതും പിടിയിലായതും സ്‌പ്ലെന്‍ഡര്‍ ബൈക്കില്‍
പൊന്‍കുന്നം: പൊന്‍കുന്നത്തെ കോടതി വരാന്തയില്‍നിന്ന് ചാടി രക്ഷപ്പെട്ട റിമാന്‍ഡ് പ്രതി കോട്ടയം വടവാതൂര്‍ സ്വദേശി ഉണ്ണിക്കൃഷ്ണന്‍(ഉണ്ണിക്കുട്ടന്‍-20) പിടിയില്‍. സ്‌പ്ലെന്‍ഡര്‍ ബൈക്കുകളോട് വല്ലാത്ത കമ്പമാണ് ഉണ്ണികൃഷ്ണന്. മോഷ്ടിച്ച ബൈക്കുകളില്‍ ഏറെയും സ്‌പ്ലെന്‍ഡറാണ്. ഒടുവില്‍ പോലീസിന്റെ കൈയ്യില്‍ നിന്ന് രക്ഷപ്പെട്ടതും പിടിയിലായതും സ്‌പ്ലെന്‍ഡര്‍ ബൈക്ക് ഉപയോഗിച്ച്.
ചൊവ്വാഴ്ച രാവിലെയാണ് ജുഡീഷല്‍ കസ്റ്റഡിയിലായിരുന്ന ഉണ്ണിയെ പൊന്‍കുന്നം പോലീസ് കസ്റ്റഡിയില്‍ വാങ്ങിയത്. പൊന്‍കുന്നം മുസ്ലിം പള്ളി മൈതാനത്തുനിന്ന് ബൈക്ക് മോഷണം പോയ കേസുമായി ബന്ധപ്പെട്ട് കസ്റ്റഡിയില്‍ വാങ്ങിയ പ്രതിയെ വൈകുന്നേരം അഞ്ചിന് കാഞ്ഞിരപ്പള്ളി കോടതിയിലെത്തിച്ചു. കോടതി നടപടികള്‍ക്കുശേഷം തിരികെ ജയിലിലേക്കു കൊണ്ടുപോകവേ കോടതി വരാന്തയില്‍നിന്ന് പ്രതി ഓടി രക്ഷപ്പെടുകയായിരുന്നു. കനത്ത മഴ പെയ്യുന്നതിനിടെ കോടതിയുടെ പിന്‍ഭാഗം വഴിയാണ് പ്രതി രക്ഷപ്പെട്ടത്. പൊന്‍കുന്നം ഗവ. ഹൈസ്‌കൂളിന് എതിര്‍വശത്തെ ഇന്ത്യന്‍ ഓവര്‍സീസ് ബാങ്കിന് മുന്‍വശത്ത് പാര്‍ക്ക് ചെയ്തിരുന്ന ബൈക്കുമായാണ് പ്രതി രക്ഷപ്പെട്ടത്.
പിന്നീട് പോലീസ് പ്രതിക്കായുള്ള തെരച്ചില്‍ ഊര്‍ജിതമാക്കി. തുടര്‍ന്നാണ് മണര്‍കാടു നിന്ന് പ്രതി പിടിയിലായത്. അപ്പോഴും പ്രതി സ്‌പ്ലെന്‍ഡര്‍ ബൈക്കിലായിരിന്നു. പ്രതിക്കെതിരേ രണ്ടു ബൈക്ക് മോഷണവും പോലീസിനെ വെട്ടിച്ചുകടന്ന കേസും ചാര്‍ജ് ചെയ്തു.
