കൊച്ചി: സംസ്ഥാനത്ത് മഴ തുടരുന്നതിനെ തുടര്ന്ന് ഡാമുകളിലെ ജലനിരപ്പ് ഉയരുന്നു. തൃശൂര്, ഇടുക്കി, പത്തനംതിട്ട ജില്ലകളിലെ നാല് ഡാമുകളില് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. എട്ട് ജലസേചന പദ്ധതികളിലാണ് യെല്ലോ അലേര്ട്ട് പ്രഖ്യാപിച്ചത്.
വേനല് മഴ നിറഞ്ഞതും ടൗട്ടേ ചുഴലിക്കാറ്റുമാണ് സംസ്ഥാനത്ത് മഴയുടെ അളവ് കൂട്ടിയത്. 128 ശതമാനം അധികം മഴയാണ് മാര്ച്ച് 1 മുതല് കേരളത്തില് ലഭിച്ചത്. കണ്ണൂരിലാണ് ഏറ്റവും കൂടുതല് മഴ ലഭിച്ചത്. 216 ശതമാനം അധികം മഴയാണ് ഇവിടെ ലഭിച്ചത്.
എറണാകുളത്ത് 171 ശതമാനം കൂടുതല് മഴയും പത്തനംതിട്ടയില് 161 ശതമാനം കൂടുതല് മഴയും ലഭിച്ചു. പെരിങ്ങല്ക്കൂത്ത്, കല്ലാര്കുട്ടി, ലോവര്പെരിയാര്, മൂഴിയാര് എന്നിവിടങ്ങളിലാണ് ഓറഞ്ച് അലേര്ട്ട് നല്കിയിരിക്കുന്നത്. നെയ്യാര്, മലങ്കര,കുറ്റ്യാടി, കാരാപ്പുഴ, ശിരുവാണി, കല്ലട, കാഞ്ഞിരപ്പുഴ ഡാമുകളില് യെല്ലോ അലേര്ട്ടും നല്കി.
2336 അടിയാണ് ഇടുക്കി അണക്കെട്ടിലെ ജലനിരപ്പ്. 2403 അടിയാണ് പരമാവധി സംഭരണ ശേഷി. 2663 അടി സംഭരണ ശേഷിയുള്ള ഷോളയാറില് 2612 അടിയാണ് ഇപ്പോഴത്തെ ജലനിരപ്പ്. ബംഗാള് ഉള്ക്കടലില് അടുത്ത ആഴ്ചയോടെ ന്യൂനമര്ദം വരുന്നതും കേരളത്തില് കനത്ത മഴ ലഭിക്കുമെന്ന മുന്നറിയിപ്പും ഡാമുകളിലെ ജലനിരപ്പ് ഉയരാന് ഇടയാക്കും. കാലവര്ഷം മെയ് 31ന് എത്തും.