തിരുവനന്തപുരം: കേന്ദ്ര മോട്ടോര്‍വാഹന നിയമത്തിലെ ഭേദഗതി വ്യവസ്ഥകള്‍ നടപ്പാക്കണമെന്നു സംസ്ഥാനത്തിന് കേന്ദ്രത്തിന്റെ കത്ത്.കുറ്റകൃത്യങ്ങള്‍ക്കുള്ള പിഴ വര്‍ധിപ്പിക്കുന്നത് നിയമപാലനം ഉറപ്പാക്കാനും നിയമലംഘനങ്ങള്‍ കൂടുതല്‍ പ്രതിരോധിക്കാനുമാണ്. ഈ നിരീക്ഷണങ്ങളുടെ വെളിച്ചത്തില്‍ ഭേദഗതിനിയമത്തിലെ വ്യവസ്ഥകള്‍ നടപ്പാക്കണമെന്നാണ് കത്തില്‍ നിര്‍ദേശിക്കുന്നത്.
2019 സെപ്റ്റംബര്‍ ഒന്നുമുതലാണ് കേന്ദ്രത്തിന്റെ പുതുക്കിയ പിഴ പ്രാബല്യത്തില്‍ വന്നത്. 2019-ലെ മോട്ടോര്‍വാഹന ഭേദഗതി നിയമപ്രകാരം നിര്‍ദേശിച്ചിട്ടുള്ളതിനെക്കാള്‍ കുറഞ്ഞനിരക്കില്‍ ചില സംസ്ഥാനസര്‍ക്കാരുകള്‍ പിഴത്തുക വിജ്ഞാപനം ചെയ്തിരുന്നു. 1988-ലെ മോട്ടോര്‍വാഹനച്ചട്ടത്തിലെ സെക്ഷന്‍ 200 പ്രകാരമായിരുന്നു ഈ വിജ്ഞാപനം.
ഇതേത്തുടര്‍ന്ന് ഗതാഗതമന്ത്രാലയം നിയമോപദേശം തേടി. അറ്റോര്‍ണി ജനറലിന്റെ നിയമോപദേശം തേടിയശേഷമാണ് മറുപടി ലഭിച്ചത്. 1999-ല്‍ ഭേദഗതി വരുത്തിയ 1988-ലെ മോട്ടോര്‍വാഹന നിയമം പാര്‍ലമെന്റിന്റെ നിയമനിര്‍മാണമായതിനാല്‍ സംസ്ഥാനസര്‍ക്കാരുകള്‍ക്ക് പിഴത്തുക കുറയ്ക്കാന്‍ കഴിയില്ലെന്നാണു നിയമോപദേശം. രാഷ്ട്രപതിയുടെ അനുമതിയില്ലാതെ സംസ്ഥാനങ്ങള്‍ക്ക് ഇങ്ങനെ നിയമം പാസാക്കാനോ നടപടിയെടുക്കാനോ കഴിയില്ല.
കേന്ദ്രസര്‍ക്കാര്‍ ഭേദഗതി വരുത്തിയ നിയമം സംസ്ഥാനസര്‍ക്കാരുകള്‍ നടപ്പാക്കുന്നില്ലെങ്കില്‍ നിയമം പാലിക്കണമെന്ന് സംസ്ഥാനങ്ങളോടു കേന്ദ്രത്തിനു നിര്‍ദേശിക്കാം. ഭരണഘടനയുടെ 256-ാം വകുപ്പ് ഇക്കാര്യം വ്യക്തമാക്കുന്നു. ഇതു പാലിക്കപ്പെടുന്നില്ലെങ്കില്‍ 356-ാം വകുപ്പുപ്രകാരമുള്ള നടപടികള്‍ സ്വീകരിക്കാം. 1988-ലെ മോട്ടോര്‍വാഹന നിയമത്തില്‍ പിഴത്തുക നിശ്ചയിക്കാന്‍ സംസ്ഥാനങ്ങളെ ചുമതലപ്പെടുത്തിയിട്ടില്ല.