ഇലക്ട്രൽ ബോണ്ടിലൂടെ ബിജെപിക്ക് ഏറ്റവുമധികം സംഭാവന നൽകിയവരിൽ ഹൈദരാബാദിലെ മേഘ എൻജിനിയറിംങ് സാരഥി പിപി റെഡ്ഡി കഴിഞ്ഞാൽ കൊൽക്കത്തയിലെ വ്യവസായി മഹേന്ദ്ര കെ ജലനും കുടുംബാംഗങ്ങളുമുണ്ട്. 616.92 കോടി രൂപയുടെ ഇലക്ടറൽ ബോണ്ടുകളാണ് 2019 ഏപ്രിലിനും 2024 ജനുവരിക്കും ഇടക്ക് ഇവർ വാങ്ങിയത്. എംകെ ജലൻ ഗ്രൂപ്പ് 339.42 കോടി രൂപയുടെ ഓഹരികളാണ് നേരിട്ട് വാങ്ങിയതെങ്കിൽ ജലൻ ഗ്രൂപ്പിന് കീഴിലുള്ള കമ്പനികളിലൂടെയാണ് അധിക നിക്ഷേപം നടത്തിയത്.
കെവെൻ്റർ ഫുഡ്പാർക്ക് ഇൻഫ്രാ ലിമിറ്റഡ് 195 കോടി രൂപയുടെ ബോണ്ടുകളും മദൻലാൽ ലിമിറ്റഡ് 185.5 കോടി രൂപയുടെ ബോണ്ടുകളും എംകെജെ എൻ്റർപ്രൈസസ് ലിമിറ്റഡ് 192.42 കോടി രൂപയുടെ ബോണ്ടുകളും വാങ്ങി. സാസ്മാൽ ഇൻഫ്രാസ്ട്രക്ചർ പ്രൈവറ്റ് ലിമിറ്റഡ് എന്ന അനുബന്ധ സ്ഥാപനത്തിലൂടെയും നടത്തി നിക്ഷേപം.
ബിജെപി കഴിഞ്ഞാൽ ബെംഗാളിൽ മമത ബാനർജിക്കാണ് ജലൻ ഗ്രൂപ്പ് ഏറ്റവുമധികം സംഭാവന നൽകിയത്. നരേന്ദ്ര മോദി അധികാരത്തിൽ എത്തും മുമ്പ് തന്നെ ബംഗാളിൽ മോദിയുടെ യോഗത്തിൽ പങ്കെടുക്കുകയും കൂടിക്കാഴ്ച നടത്തുകയുമൊക്കെ ചെയ്ത ബിസിനസുകാരിൽ ഒരാളാണ് ജലൻ എന്ന് റിപ്പോർട്ടുകളുണ്ട്. ബിജെപിയെയും തൃണമൂൽ കോൺഗ്രസിനെയും ഒരേപോലെ സംഭാവനകളിലൂടെ പ്രീണിപ്പിക്കുന്ന നയം. കോൺഗ്രസിനും നൽകിയിട്ടുണ്ട് സംഭാവനകൾ.
2013 മുതലാണ് ബിജെപിയുമായുള്ള ബന്ധം. ഇപ്പോൾ എംകെജെ ഗ്രൂപ്പ് ഓഫ് കമ്പനികളുടെ കീഴിൽ നാലു പ്രധാന കമ്പനികളും 11 ഉപസ്ഥാപനങ്ങളുമുണ്ട് . 1990കളിൽ റിയൽ എസ്റ്റേറ്റ് രംഗത്തിലൂടെയായിരുന്നു തുടക്കം എങ്കിലും അഗ്രോ, ഡയറി, ഫുഡ് പ്രോസസിങ് രംഗത്തും പിന്നീട് ബിസിനസ് വ്യാപിപ്പിച്ചു. ഇലക്ട്രൽ ബോണ്ടിലൂടെ സംഭാവനകൾ നൽകിയതിന് ശേഷം 300 ശതമാനത്തോളമാണ് ഏകദേശ ആസ്തി വർധന.
റിലയൻസുമായി ബന്ധം ആരോപിക്കപ്പെട്ട ക്വിക്ക് സപ്ലൈയാണ് ബിജെപിക്ക് ഏറ്റവുമധികം പണം നൽകിയ മറ്റൊരു കമ്പനി. 2022-ലെ ബിജെപിക്ക് ഏറ്റവും കൂടുതൽ പണം നൽകിയ കമ്പനി രണ്ട് ഗഡുക്കളായി 325 കോടി രൂപയാണ് സംഭാവന നൽകിയത്. സുനിൽ മിത്തലിൻെറ ഭാരതി എയർടെല്ലും, അനിൽ അഗർവാളിൻെറ വേദാന്തയുമാണ് സംഭാവനയിൽ മുന്നിലുള്ള മറ്റ് കമ്പനികൾ.
കോൺഗ്രസിന് ഏറ്റവും കൂടുതൽ പണം നൽകിയ കമ്പനികളിലും ജലൻ ഗ്രൂപ്പും വേദാന്തയും തന്നെയാണ് മുന്നിൽ. വേദാന്ത 125 കോടി രൂപയും, മേഘ എഞ്ചിനീയറിംഗ് സ്ഥാപനമായ വെസ്റ്റേൺ യുപി പവർ ട്രാൻസ്മിഷൻ കമ്പനി ലിമിറ്റഡ് 110 കോടി രൂപയും എംകെജെ എൻ്റർപ്രൈസസ് 69.35 കോടി രൂപയും കോൺഗ്രസിന് നൽകിയിട്ടുണ്ട്. എംകെ ജലൻ മൊത്തം 138.55 കോടി രൂപയാണ് കോൺഗ്രസിന് നൽകിയത്.
