കാസര്‍കോഡ്: കോവിഡ് 19 രോഗബാധയേത്തുടര്‍ന്ന് കാസര്‍കോഡ് ജില്ലയില്‍ അതീവ ജാഗ്രതാ നിര്‍ദ്ദേശം.ജില്ലയില്‍ ഒരാഴ്ച സര്‍ക്കാര്‍ ഓഫീസുകള്‍ അടച്ചിടും.രണ്ടാഴ്ച ആരാധനാലയങ്ങളും ക്ലബുകളും അടച്ചിടും. കടകള്‍ രാവിലെ 11 മുതല്‍ വൈകിട്ട് 5 മണി വരെ മാത്രമെ തുറക്കാന്‍ അനുമതിയുള്ളു.
കരിപ്പൂരില്‍ വിമാനമിറങ്ങിയ കോവിഡ് ബാധിതന്‍ കരിപ്പൂരില്‍ തങ്ങിയശേഷം കോഴിക്കോട്ടേക്ക് പോയി.ട്രെയിനില്‍ കാസര്‍കോഡ് എത്തിയ ഇയാള്‍ പൊതുപരിപാടികളിലും ഫുട്‌ബോള്‍ മത്സരത്തിലും പങ്കെടുത്തു.വീട്ടില്‍ ആതിഥേയനായി ചടങ്ങു സംഘടിപ്പിച്ചു. ഇതിനിടയില്‍ ക്ലബിലും പട്ടണത്തിലുമൊക്കെ യഥേഷ്ടം കറങ്ങി.ഇയാളുമായി ബന്ധപ്പെട്ട് വലിയ ആശങ്ക ഉയര്‍ന്ന സാഹചര്യത്തിലാണ് കാസര്‍കോഡ് പ്രത്യേക കരുതല്‍ ഏര്‍പ്പെടുത്തിയത്.
കാസർകോട് അതിർത്തി റോഡുകൾ അടച്ചു
കർണാടകയുമായി അതിർത്തിപങ്കിടുന്ന ജില്ലയിലെ 12 റോഡുകൾ അടച്ചു. 5 അതിർത്തി റോഡുകളിൽ കർശന സുരക്ഷ ഏർപ്പെടുത്തുമെന്ന് ജില്ലാ കളക്‌ടർ ഡോ. ഡി. സജിത്ത് ബാബു. മഞ്ചേശ്വരത്തെ തൂമിനാട് റോഡ്, കെദംപാടി പദവ് റോഡ്, സുങ്കദകട്ടെ മു ടിപ്പ് റോഡ്, കുറുട പദവ് റോഡ്, മുളിഗദ്ദെ റോഡ്, ബെരിപദവ് റോഡ് എന്നിവയും ബദിയഡുക്ക സ്വർഗ അരിയപദവ് റോഡ്, ആദൂരിലെ കൊട്ടിയാടി പള്ളത്തൂർ ഈശ്വര മംഗല റോഡ്, ഗാളിമുഖ ഈശ്വര മംഗല ദേലംപാടി റോഡ്, നാട്ടക്കൽ സുള്ള്യപദവ് റോഡ്, ബേഡകത്തെ ചെന്നംകുണ്ട് ചാമകൊച്ചി റോഡും പൂർണമായി അടച്ചു.
തലപ്പാടി ദേശീയ ഹൈവേയും അടുക്കസ്ഥല അഡ്യാനടുക്ക റോഡ്, ആദൂർ- കൊട്ടിയാടി – സുള്ള്യ സംസ്ഥാനപാത, മാണിമൂല സുള്ള്യറോഡ്‌, പാണത്തൂർ ചെമ്പേരി മടിക്കേരി റോഡ് എന്നിവ വഴി കടന്നുവരുന്ന യാത്രക്കാരെ കർശനപരിശോധനയ്ക്ക് വിധേയമാക്കിയതിന് ശേഷം മാത്രമെ കടത്തി വിടു. ഡോക്ടർമാർ, ജൂനിയർ ഹെൽത്ത് ഇൻസ്‌പെക്ടർമാർ ആരോഗ്യപ്രവർത്തകർ പോലീസുകാർ എന്നിവരടങ്ങിയ സംഘം 5 അതിർത്തി റോഡുകളിൽ പരിശോധന ഉണ്ടായിരിക്കും. കൊറോണ കോർ കമ്മിറ്റി യോഗത്തിലാണ് തീരുമാനം