റിയാദ്: കോവിഡ് വ്യാപനത്തിന്റെ പശ്ചാത്തലത്തില്‍ സൗദിയില്‍ അടച്ചിട്ടിരുന്ന ഷോപ്പിംഗ് മാളുകള്‍് തുറന്നു. കര്‍ശന നിയന്ത്രണങ്ങളോടെയാണ് മാളുകള്‍ തുറന്നത്. എന്നാല്‍ കോവിഡ് വ്യാപനത്തിന്റെ പശ്ചാത്തലത്തില്‍ പൂര്‍ണമായും അടച്ച സ്ഥലങ്ങളിലും മക്കയിലും ഇളവ് ബാധകമല്ല.
റമദാനോട് അനുബന്ധിച്ചാണ് ഇന്നു മുതല്‍ മെയ് 13 വരെ ചില്ലറ മൊത്ത വ്യാപാര സ്ഥാപനങ്ങള്‍, ഷോപ്പിംഗ് മാളുകള്‍ എന്നിവ തുറന്നു പ്രവര്‍ത്തിക്കാന്‍ അനുമതി നല്‍കിയത്. രാവിലെ ഒന്‍പത് മുതല്‍ വൈകുന്നേരം അഞ്ചു വരെയാണ് ഇളവ്. മക്കയിലും കോവിഡ് വ്യാപനത്തിന്റെ പശ്ചാത്തലത്തില്‍ പൂര്‍ണമായും അടച്ച സ്ഥലങ്ങളിലും ഈ ഇളവ് ബാധകമല്ല.
കര്‍ശന നിയന്ത്രണങ്ങളോടെയാണ് മാളുകള്‍ക്ക് തുറന്നു പ്രവര്‍ത്തിക്കാന്‍ അനുമതി നല്‍കിയത്. മാളുകളിലെ വിനോദ കേന്ദ്രങ്ങളും കളിസ്ഥലങ്ങളും നമസ്‌ക്കാര കേന്ദ്രങ്ങളും അടയ്ക്കണമെന്ന് മുനിസിപ്പല്‍ ഗ്രാമ മന്ത്രാലയത്തിന്റെ കര്‍ശന നിര്‍ദ്ദേശമുണ്ട്. പ്രവേശന കവാടങ്ങളില്‍ ശരീര താപനില പരിശോധിക്കാനും അണുവിമുക്തമാക്കുന്നതിനുള്ള സംവിധാനങ്ങളും ഏര്‍പ്പെടുത്തണം.
ട്രോളികള്‍ ഉപയോഗിക്കുന്നതിനു മുന്‍പും ശേഷവും കൈകള്‍ അണുവിമുക്തമാക്കണം. ഓരോ ഇരുപത്തിനാലു മണിക്കൂറും സ്ഥാപനവും അണുവിമുക്തമാക്കണം. കോവിഡ് ബാധിതരെന്നു സംശയമുള്ളവരെ പാര്‍പ്പിക്കാനായി ഐസൊലേഷന്‍ സംവിധാനം ഒരുക്കിയിരിക്കണമെന്നും നിര്‍ദ്ദേശമുണ്ട്.
മാളുകളിലേക്കു ഓരോരുത്തരെയായി മാത്രമേ പ്രവേശിപ്പിക്കാവു. ആളുകള്‍ തമ്മില്‍ രണ്ടു മീറ്ററെങ്കിലും ശാരീരിക അകലം പാലിക്കണം. ശരീരോഷ്മാവ് 38 ഡിഗ്രിയില്‍ കൂടുതലുള്ളവരെ മാളുകളില്‍ പ്രവേശിപ്പിക്കാന്‍ പാടില്ല. ജീവനക്കാരുടെയും ശരീര താപനില പരിശോധിക്കണമെന്നും 38 ഡിഗ്രിയില്‍ കൂടുതലുള്ളവരെ ആശുപത്രിയിലേക്ക് അയക്കണമെന്നും മന്ത്രാലയത്തിന്റെ നിര്‍ദ്ദേശമുണ്ട്.