കൊച്ചി: കൊവിഡ് ലോക്ക് ഡൗണിനിടെ ജോര്ദാനിലെ ഷൂട്ടിംഗ് ലൊക്കേഷനില് കുടുങ്ങിപ്പോയ നടന് പൃഥ്വിരാജും സംഘവും തിരിച്ചെത്തി. കൊച്ചിയിലാണ് സംഘം വിമാനമിറങ്ങിയത്. എയര് ഇന്ത്യയുടെ പ്രത്യേക വിമാനത്തില് ദില്ലി വഴിയാണ് പൃഥ്വിരാജും സംഘവും കൊച്ചിയിലെത്തിയത്. ആടു ജീവിതം സിനിമയുടെ ഷൂട്ടിംഗിനായാണ് സംഘം ജോര്ദാനിലേക്ക് പോയത്.
വിമാനത്താവളത്തില് വന്നിറങ്ങിയ സംഘം ആരോഗ്യ വകുപ്പ് നിര്ദ്ദേശിക്കുന്ന ക്വാറന്റീന് പാലിക്കും. ഫോര്ട്ട് കൊച്ചിയിലാണ് ഇതിനുള്ള സൗകര്യം ഒരുക്കിയിട്ടുള്ളത്. പൃഥ്വിരാജ് ഫോര്ട്ട് കൊച്ചിയിലെ ഹോട്ടലിലേക്കു പോകും. പണം നല്കിയുള്ള ക്വാറന്റീന് സൗകര്യമാണ് ഫോര്ട്ട് കൊച്ചിയില് ഒരുക്കിയിട്ടുള്ളത് . ആടു ജീവിതത്തിന്റെ സംവിധായകന് കൂടിയാ ബ്ലസി തിരുവല്ലയിലെ വീട്ടിലാകും ക്വാറന്റീനില് കഴിയുകയെന്നാണ് വിവരം.
ആടുജീവിതം സിനിമയുടെ ഷൂട്ടിംഗിനായാണ് 58 അംഗ സംഘം ജോര്ദാനിലേക്ക് പോയത്. രണ്ട് മാസത്തിലേറെയായി ഇവര് ജോര്ദാനില് തുടരുകയായിരുന്നു. ഇടക്ക് സിനിമാ ചിത്രീകരണം നിലച്ച് പോയെങ്കിലും പ്രതിസന്ധികള് മറികടന്ന് ഷെഡ്യൂള് പൂര്ത്തിയാക്കാനും സംഘത്തിന് കഴിഞ്ഞിരുന്നു.