രണ്ടാം എല്.ഡി.എഫ് സര്ക്കാരിന്റെ സത്യപ്രതിജ്ഞ വരുന്ന 20 ന് നടത്താനാണ് തീരുമാനിച്ചിരിക്കുന്നത്. കൊവിഡ് വ്യാപനം രൂക്ഷമായ സാഹചര്യത്തിലാണ് സത്യപ്രതിജ്ഞ വൈകിയത്. എന്നാല് നിലവില് 500 പേരെ ഉള്പ്പെടുത്തി ചടങ്ങ് നടത്താനുള്ള തീരുമാനത്തിലാണ് സംസ്ഥാന സര്ക്കാര് എത്തിയിരിക്കുന്നത്.
ഇതിനെതിരെ സമൂഹത്തിന്റെ വിവിധ കോണുകളില് നിന്ന് വിമര്ശനങ്ങള് ഉയരുകയാണ്. സത്യപ്രതിജ്ഞ വെര്ച്വലായി നടത്താന് നിരവധി പേരാണ് മുഖ്യമന്ത്രിയോട് ആവശ്യപ്പെടുന്നത്. ഇപ്പോള് നടി പാര്വ്വതി തിരുവോത്തും സംഭവത്തില് പ്രതികരണവുമായി രംഗത്തെത്തിയിരിക്കുകയാണ്.
സത്യപ്രതിജ്ഞക്ക് 500 പേര് അത്ര കൂടുതല് അല്ലെന്ന് കരുതരുത്. കേസുകള് ഇപ്പോഴും വര്ദ്ധിച്ചുവരികയാണെന്നും നമ്മള് കൊവിഡ് പ്രതിരോധത്തിന്റെ അവസാന ഘട്ടത്തിലല്ലെന്നും കണക്കിലെടുക്കുമ്പോള് ഇത് വളരെ തെറ്റായ നടപടിയാണെന്നും പാര്വ്വതി സാമൂഹ്യമാധ്യമങ്ങളിലൂടെ വ്യക്തമാക്കി.
പാര്വതിയുടെ വാക്കുകള് ഇങ്ങനെ…
‘കൊവിഡ് പ്രതിരോധത്തിനായും മുന് നിര കൊവിഡ് പ്രവര്ത്തകര്ക്കായും സംസ്ഥാന സര്ക്കാര് ചെയ്തുകൊണ്ടിരിക്കുന്നതെല്ലാം വളരെ നല്ല കാര്യങ്ങളാണ്. അതുകൊണ്ടാണ് ഈ വാര്ത്ത എല്ലാവരെയും ഞെട്ടിക്കുന്നത്. അതുപോലെ തന്നെ സമ്മതിച്ച് തരാന് കഴിയാത്തതും. സത്യപ്രതിജ്ഞക്കായി 500പേര് അത്ര കൂടുതലല്ല എന്ന് കണക്കാക്കരുത്.
കൊവിഡ് കേസുകള് ഇപ്പോഴും വര്ദ്ധിച്ചുവരികയാണെന്നും നമ്മള് കൊവിഡ് പ്രതിരോധത്തിന്റെ അവസാന ഘട്ടത്തിലല്ലെന്നും കണക്കിലെടുക്കുമ്പോള്, ഇത് വളരെ തെറ്റായ നടപടിയാണ്, പ്രത്യേകിച്ചും ഇനിയും മാറ്റം വരുത്താന് അവസരമുണ്ടാകുമ്പോള്. വെര്ച്വല് സത്യപ്രതിജ്ഞയിലൂടെ ഒരു മാതൃകയായവുകയാണ് ഇപ്പോള് വേണ്ടത്. ഞാന് ഈ സമയം മുഖ്യമന്ത്രിയോട് അഭ്യര്ത്ഥിക്കുകയാണ്. പൊതുയോഗം ഒഴിവാക്കി വെറച്വല് സെറിമണി നടത്തണമെന്ന്.