പാട്ന: കൊറോണ ഐസൊലേഷന്‍ വാര്‍ഡില്‍ നിരീക്ഷണത്തിലായിരുന്ന പ്രായപൂര്‍ത്തിയാകാത്ത പെണ്‍കുട്ടിയെ സെക്യൂരിറ്റി ഗാര്‍ഡ് പീഡിപ്പിച്ചു. ബര്‍ഹ് റെയില്‍വേ സ്റ്റേഷനില്‍ നിന്ന് കൊറോണ ഐസൊലേഷന്‍ വാര്‍ഡില്‍ എത്തിച്ച പെണ്‍കുട്ടിയെയാണ് പീഡനത്തിന് ഇരയയാത്. പാട്ന മെഡിക്കല്‍ കോളജ് ഹോസ്പിറ്റലിലാണ് സംഭവം നടന്നത്.
ജൂലൈ എട്ടിന് വൈകുന്നേരം നടന്ന പീഡനം ഇന്നലെയാണ് പുറത്തറിയുന്നത്. ചൈല്‍ഡ് ഹെല്‍പ് ലൈന്‍ അംഗത്തോടാണ് ഇക്കാര്യം കുട്ടി അറിയിച്ചത്. ഇവരാണ് പോലീസിനെ വിവരം അറിയിച്ചത്. ബാര്‍ഹ് റെയില്‍വേ സ്റ്റേഷനില്‍ ഒറ്റയ്ക്ക് കാണപ്പെട്ട പെണ്‍കുട്ടിയെ ചൈല്‍ഡ് ഹെല്‍പ് ലൈന്‍ അതോറിറ്റി ഏറ്റെടുക്കുകയായിരുന്നു. തുടര്‍ന്ന് കൊറോണ കെയര്‍ സെന്ററിലേക്ക് മാറ്റുകയായിരുന്നു.
സംഭവത്തില്‍ നാല്‍പതുകാരനായ മഹേഷ് കുമാറിനെ പിടികൂടിയതായി പിര്‍ബഹോര്‍ എസ്എച്ച്ഒ റിസ്വാന്‍ അഹമ്മദ് ഖാന്‍ അറിയിച്ചു. ധനാപൂര്‍ സ്വദേശിയായ മഹേഷ് കുമാര്‍ പ്രൈവറ്റ് സെക്യൂരിറ്റി ഏജന്‍സിയില്‍ സെക്യൂരിറ്റി ഗാര്‍ഡായി ജോലി ചെയ്തുവരികയായിരുന്നു. അടുത്തിടെയാണ് ഇയാളെ ആശുപത്രിയില്‍ സെക്യൂരിറ്റി ഗാര്‍ഡായി നിയമിച്ചത്.