കൊച്ചി: കേരളത്തിലെ ആദ്യ മുലപ്പാല് ബാങ്ക് എറണാകുളം ജനറല് ആശുപത്രിയില് പ്രവര്ത്തനം ആരംഭിക്കും. നെക്ടര് ഓഫ് ലൈഫ് എന്നാണ് പദ്ധതിയുടെ പേര്. ഫെബ്രുവരി അഞ്ചിന് വൈകിട്ട് മൂന്നിന് ആശുപത്രിയില് നടക്കുന്ന ചടങ്ങില് മന്ത്രി കെ.കെ. ശൈലജ വിഡിയോ കോണ്ഫറന്സ് വഴി ഉദ്ഘാടനം നിര്വഹിക്കും.
റോട്ടറി ക്ലബ് ഓഫ് കൊച്ചിന് ഗ്ലോബലിന്റെ സഹകരണത്തോടെ സ്ഥാപിക്കുന്ന മുലപ്പാല് ബാങ്ക് റോട്ടറി ഡിസ്ട്രിക്ട് 3201 മുന് ഗവര്ണര് മാധവ് ചന്ദ്രന്റെ ആശയമാണ്. അമ്മയുടെ മരണം, രോഗബാധ അല്ലെങ്കില് മുലപ്പാലിന്റെ അപര്യാപ്തത തുടങ്ങിയവ മൂലം മുലപ്പാല് ലഭിക്കാത്ത നവജാത ശിശുക്കള്ക്ക് നല്കുകയെന്ന ലക്ഷ്യത്തോടെയാണ് ബാങ്ക് സ്ഥാപിക്കുന്നത്.
സര്ക്കാറിന്റെ മാര്ഗരേഖ പ്രകാരം പാല് ശേഖരിക്കാനും സൂക്ഷിക്കാനും വിതരണം ചെയ്യാനും എല്ലാ സുരക്ഷാമാനദണ്ഡങ്ങളും ഉറപ്പാക്കിയിട്ടുണ്ട്. ശേഖരിക്കുന്ന പാല് ആറുമാസം വരെ ബാങ്കില് കേട് കൂടാതെ സൂക്ഷിക്കാം.