ന്യൂഡല്ഹി: എസ്.എം.എ ബാധിച്ച മുഹമ്മദിന് വേണ്ടി ഇറക്കുമതി ചെയ്യുന്ന മരുന്നിന്റെ നികുതിയും ജി.എസ്.ടിയും ഒഴിവാക്കി. ഇ.ടി മുഹമ്മദ് ബഷീര് എംപിയുടെ ഇടപെടലിനെ തുടര്ന്ന് കേന്ദ്ര ആരോഗ്യമന്ത്രാലയം നികുതിയിളവിന് അനുമതി നല്കുകയായിരുന്നു.
കേന്ദ്ര ധനകാര്യ മന്ത്രിയോട് കോടികള് വരുന്ന നികുതികള് ഒഴിവാക്കണമെന്ന് ആദ്യ സമയത്ത് തന്നെ അഭ്യര്ത്ഥിച്ചിരുന്നു. ആ അഭ്യര്ത്ഥന മാനിച്ച് നികുതിയിളവ് നല്കിയതായി കേന്ദ്ര ധനകാര്യമന്ത്രി കത്തിലൂടെ അറിയിച്ചിരിക്കുന്നുവെന്ന് ഇ.ടി മുഹമ്മദ് ബഷീര് വ്യക്തമാക്കി. ആറു കോടിയോളം രൂപയാണ് നികുതിയിനത്തില് ഇളവ് ലഭിക്കുക.
എസ്എംഎ ബാധിതര്ക്കായുള്ള മരുന്നിന്റെ ഇറക്കുമതി നികുതിയും മറ്റു നികുതികളും പൂര്ണമായും എടുത്തു കളയണമെന്ന് ദീര്ഘകാലമായുള്ള ആവശ്യമാണ്. ജീവന് രക്ഷാ മരുന്നുകള്ക്ക് നികുതി ചുമത്തുന്നത് നീതികേടാണെന്നും നേരത്തെ വിമര്ശനമുയര്ന്നിരുന്നു. 6 കോടിയോളം രൂപയാണ് നികുതിയിനത്തില് ഇളവ് ലഭിക്കുക. കണ്ണൂര് ജില്ലയിലേ മുഹമ്മദിന് ഉടന് ചികിത്സ ലഭ്യമാക്കാനുള്ള നീക്കങ്ങള് പുരോഗമിക്കുകയാണ്. ഇന്ത്യയില് എസ്എംഎ ബാധിച്ച കുട്ടികള്ക്കായി നേരത്തെയും സമാനമായ രീതിയില് നികുതിയിളവ് ലഭിച്ചിരുന്നു.
അപൂര്വ്വ രോഗം ബാധിച്ച് ചികിത്സയിലായ ഒന്നരവയസ്സുകാരന് മുഹമ്മദിനായി 46.78 കോടി രൂപയാണ് സമാഹരിച്ചത്. രണ്ട് വയസിന് മുന്പ് മുഹമ്മദിന് സോള്ജെന്സ്മാ എന്ന മരുന്ന് ഒരു ഡോസ് നല്കിയാല് രോഗം ഭേദമാകുമെന്നാണ് വിദഗ്ധര് പറയുന്നത്. 7.77 ലക്ഷം പേരുടെ സഹായത്തിലാണ് തുക ലഭിച്ചത്. മുഹമ്മദിന്റെ ചികിത്സയ്ക്ക് ശേഷം ബാക്കിയുള്ള തുക സ്പൈനല് മസ്കുലര് അട്രോഫി ബാധിച്ച മറ്റ് കുട്ടികള്ക്ക് നല്കുമെന്നും കുടുംബം അറിയിച്ചിട്ടുണ്ട്.