തിരുവനന്തപുരം: യൂട്യൂബിലൂടെ സ്ത്രീകള്ക്കെതിരെ അശ്ലീല പരാമര്ശം നടത്തിയ വിജയ് പി നായരെ കൈയേറ്റം ചെയ്ത കേസില് ഭാഗ്യലക്ഷ്മിയും സുഹൃത്തുക്കളും നാളെ ഹൈക്കോടതിയെ സമീപിച്ചേക്കും. മുന്കൂര്ജാമ്യാപേക്ഷ കീഴ് കോടതി തള്ളിയ സാഹചര്യത്തിലാണ് ഇവര് ഹൈക്കോടതിയെ സമീപിക്കാനൊരുങ്ങുന്നത്.
യൂട്യൂബറെ മുറിയില് കയറി കൈയേറ്റം ചെയ്ത കേസില് ഇവരുടെ മുന്കൂര് ജാമ്യം നേരത്തെ തിരുവനന്തപുരം ജില്ലാ സെഷന്സ് കോടതി തള്ളിയിരുന്നു. ഇതോടെ അറസ്റ്റിന് തുനിഞ്ഞ പോലീസ് തല്ക്കാലം ഹൈക്കോടതിയില് ഇവര് സമര്പ്പിക്കുന്ന മുന്കൂര് ജാമ്യാപേക്ഷ കൂടി നോക്കിയ ശേഷം മതി തുടര്നടപടികളെന്ന നിലപാടിലാണ്. നിലവില് പോലീസിന്റെ നിരീക്ഷണത്തിലാണ് ഭാഗ്യലക്ഷ്മി അടക്കമുള്ളവര്.
വിജയ് പി നായരുടെ ലാപ്ടോപ്പും മൊബൈല്ഫോണും പോലീസിലേല്പ്പിച്ചുവെന്നിരിക്കെ മോഷണക്കുറ്റം ചുമത്തിയ നടപടിയും കൈയേറ്റവും നിലനില്ക്കില്ലെന്നാകും ഭാഗ്യലക്ഷ്മിയും സുഹൃത്തുക്കളും പ്രധാനമായും വാദിക്കുക. ചുമത്തിയ കുറ്റങ്ങള് പരസ്പര വിരുദ്ധമാണെന്നും വാദിക്കും.
അതേസമയം നിലവിലുള്ള ശക്തമായ വകുപ്പുകള്ക്ക് പുറമെ ഹൈക്കോടതിയിലും പോലീസ് നിലപാട് കടുപ്പിക്കാനാണ് സാധ്യത. വീഡിയോ സഹിതം തെളിവുള്ളതിനാല് പിടിച്ചുപറി എന്നതിലുപരി, ദേഹോപദ്രവമേല്പ്പിച്ചുള്ള മോഷണക്കുറ്റം എന്ന നിലയിലേക്ക് നിലപാട് കടുപ്പിക്കാനാണ് പോലീസ് നീക്കം. കൈയേറ്റം വ്യക്തമാണെന്നിരിക്കെ മുന്കൂര്ജാമ്യ ഹര്ജിയില് ഹൈക്കോടതി സ്വീകരിക്കുന്ന തീരുമാനമെന്താകുമെന്നത് നിര്ണായകമാണ്.
ഭാഗ്യലക്ഷ്മി അടക്കമുള്ളവരുടെ ജാമ്യ ഹര്ജിയെ സെഷന്സ് കോടതിയില് പോലീസ് ശക്തമായി എതിര്ത്തിരുന്നു. അതിനിടെ സൈനികരെ അപമാനിച്ചെന്ന പരാതിയിലും പോലീസ് വിജയ് പി നായരുടെ അറസ്റ്റ് രേഖപ്പെടുത്തി.