ആലപ്പുഴ:വയലാർ നാഗംകുളങ്ങരയിലെ ആർഎസ്എസ് പ്രവർത്തകന്റെ കൊലപാതകം ആസൂത്രിതമെന്ന് എഫ്ഐആര്. പ്രതികള് കൊലപാതകത്തിനായി ഗൂഡാലോചന നടത്തിയെന്നാണ് എഫ്ഐആറിലുള്ളത്. റോഡരികില് നിര്ത്തിയിട്ട കാറില് മാരകായുധങ്ങള് സജ്ജമായിരുന്നു. ഒന്നാംപ്രതി ഹര്ഷാദും രണ്ടാം പ്രതി അഷ്കറും ആയുധം കൈമാറി. തലയില് വാള് കൊണ്ട് വെട്ടി നന്ദുവിനെ കൊലപ്പെടുത്തുകയായിരുന്നു. കൊലപാതകം, ഗൂഢാലോചന അടക്കം 12 വകുപ്പുകളാണ് പ്രതികള്ക്കെതിരെ ചുമത്തിയിരിക്കുന്നത്.
ഇന്നലെ രാത്രി 9.45 ഓടെയാണ് വയലാറിന് സമീപം നാഗംകുളങ്ങര കവലയിൽ എസ്ഡിപിഐ – ആർഎസ്എസ് സംഘർഷത്തിനിടെ ശാഖ ഗഡ നായക് നന്ദു ആർ കൃഷ്ണ കൊല്ലപ്പെട്ടത്. കൊലപാതകത്തിൽ നേരിട്ട് പങ്കെടുത്തു എന്ന് പൊലീസ് കണ്ടെത്തിയ എട്ട് പേരുടെ അറസ്റ്റ് ചേർത്തല പൊലീസ് ഇന്ന് രേഖപെടുത്തി. പാണാവള്ളി സ്വദേശി റിയാസ്, അരൂർ സ്വദേശി നിഷാദ്, വടുതല സ്വദേശി യാസിർ, ഏഴുപുന്ന സ്വദേശി അനസ്, വയലാർ സ്വദേശി അബ്ദുൾ ഖാദർ, ചേർത്തല സ്വദേശികളായ അൻസിൽ, സുനീർ, ഷാജുദ്ദീൻ എന്നിവരാണ് അറസ്റ്റിൽ ഉള്ളത്.
കൊലപാതകവുമായി ബന്ധപ്പെട്ട സംഘർഷം തുടരുന്ന സാഹചര്യത്തില് ചേര്ത്തല, അമ്പലപ്പുഴ താലൂക്കുകളില് നിരോധനാജ്ഞ പ്രഖ്യാപിച്ചു. ജില്ലാ മജിസ്ട്രേറ്റ് കൂടിയായ കളക്ടര് ആണ് ഉത്തരവിട്ടത്.
മരണാനന്തര ചടങ്ങുകള്ക്കല്ലാതെ അഞ്ചുപേരില് കൂടുതല് കൂട്ടം കൂടാന് പാടില്ല. വ്യാഴാഴ്ച മുതല് മൂന്ന് ദിവസത്തേക്കാണ് നടപടി. 1973-ലെ ക്രിമിനല് നടപടി നിയമത്തിലെ 144-ാം വകുപ്പ് പ്രകാരമാണ് നിരോധനാജ്ഞ പ്രഖ്യാപിച്ചത്. അടിയന്തിര നടപടികള് സ്വീകരിക്കുന്നതിന് പൊലീസിന് കളക്ടര് നിര്ദ്ദേശം നല്കി.
കൊലപാതകത്തിൽ പ്രതിഷേധിച്ച് ആലപ്പുഴയിലെ ബി.ജെ.പി ഹര്ത്താലിനിടെ ചേര്ത്തലയില് വ്യാപക അക്രമം നടന്നു. അഞ്ചു കടകള് തകര്ക്കുകയും മൂന്നെണ്ണത്തിന് തീവെക്കുകയും ചെയ്തു. എസ്.ഡി.പി.ഐ ചേര്ത്തല മണ്ഡലം സെക്രട്ടറി സുനീര്, എസ്.ഡി.പി.ഐ പ്രാദേശിക നേതാവ് ഷിഹാബുദ്ദീന്റെ പച്ചക്കറിക്കട എന്നിവയും തീവെച്ചവയില് ഉള്പ്പെടും. വാഹനങ്ങളും തല്ലിത്തകര്ത്തു. സ്ഥലത്ത് വന് പോലീസ് സന്നാഹം ക്യാമ്പ് ചെയ്യുന്നുണ്ട്.
സംഘര്ഷത്തില് മൂന്ന് ആര്.എസ്.എസ് പ്രവര്ത്തകര്ക്കും നാല് എസ്.ഡി.പി.ഐ പ്രവര്ത്തകര്ക്കും പരിക്കേറ്റിരുന്നു. ഗുരുതരമായി പരിക്കേറ്റ ആര്.എസ്.എസ് പ്രവര്ത്തകന് വയലാര് സ്വദേശി കെ.എസ്. നന്ദു(22)വിനെ എറണാകുളത്തെ സ്വകാര്യ ആശുപത്രിയില് പ്രവേശിപ്പിച്ചിരിക്കുകയാണ്.
ബുധനാഴ്ച രാത്രി എട്ടോടെ വയലാര് നാഗംകുളങ്ങര കവലയിലായിരുന്നു സംഭവം. ഉച്ചക്ക് എസ്.ഡി.പി.ഐ പ്രചരണ ജാഥക്കിടെ പ്രസംഗത്തിലെ പരാമര്ശങ്ങളുടെ പേരില് ഇരുവിഭാഗവും തമ്മില് തര്ക്കമുണ്ടായിരുന്നു. ഇതിന്റെ പേരില് വൈകിട്ട് എസ്.ഡി.പി.ഐയും ആര്.എസ്.എസും പ്രതിഷേധ പ്രകടനവും നടത്തി. സ്ഥലത്ത് ചേര്ത്തല പോലീസ് കാവല് ഉണ്ടായിരുന്നു.
പ്രകടനങ്ങള്ക്കു ശേഷം പിരിഞ്ഞു പോയ പ്രവര്ത്തകര് തമ്മില് വീണ്ടും സംഘര്ഷമുണ്ടാകുകയായിരുന്നു. പോലീസ് നോക്കി നില്ക്കെയാണ് സംഘര്ഷവും ആക്രമണവും ഉണ്ടായത്. ഇരുവിഭാഗവും തമ്മില് കല്ലേറും കൂട്ടത്തല്ലുമുണ്ടായി. ഇതിനിടെയാണ് നന്ദു കൃഷ്ണയ്ക്ക് വെട്ടേറ്റത്.