ബംഗലൂരു:കർണാടകയിലെ വമ്പൻ വിജയത്തിന് പിന്നാലെ സംസ്ഥാനത്ത് മുഖ്യമന്ത്രിയെ നിയമിക്കുന്നതിനുള്ള നടപടികൾ വേഗത്തിലാക്കി കോൺഗ്രസ്. ഈ നടപടികൾക്ക് മേൽന്നോട്ടം വഹിക്കാൻ മൂന്ന് നിരീക്ഷകരെ പാർട്ടി ഹൈക്കമാൻഡ് നിയോഗിച്ചു. കൂടാതെ സർക്കാർ രൂപീകരണവും സംസ്ഥാനത്തിന്റെ അടുത്ത മുഖ്യമന്ത്രി സ്ഥാനം ചർച്ച ചെയ്യുന്നതിനായി കോൺഗ്രസ് ബെംഗളൂരുവിൽ പുതുതായി തിരഞ്ഞെടുക്കപ്പെട്ട പാർട്ടി എംഎൽഎമാരുടെ യോഗം വിളിച്ചു.
മഹാരാഷ്ട്ര മുൻ മുഖ്യമന്ത്രി സുശീൽ കുമാർ ഷിൻഡെ, മുൻ ജനറൽ സെക്രട്ടറി ദീപക് ബവാരിയ, നിലവിലെ ജനറൽ സെക്രട്ടറി ഭൻവർ ജിതേന്ദ്ര സിംഗ് എന്നിവരെ എഐസിസി കർണാടക നിരീക്ഷകരാക്കി. ഇന്ന് ചേരുന്ന കോൺഗ്രസ് നിയമസഭാ കക്ഷി യോഗത്തിൽ നിരീക്ഷകർ പങ്കെടുത്ത് റിപ്പോർട്ട് പാർട്ടി ഹൈക്കമാൻഡിന് സമർപ്പിക്കും. ഡൽഹി സന്ദർശിക്കാനിരിക്കുന്ന കോൺഗ്രസ് അധ്യക്ഷൻ മല്ലികാർജുൻ ഖാർഗെ യോഗത്തിന് മുന്നോടിയായി രാഹുൽ ഗാന്ധിയുമായും സോണിയാ ഗാന്ധിയുമായും ചർച്ച ചെയ്തിരുന്നു.
രണ്ട് മൂന്ന് ദിവസത്തിനകം മുഖ്യമന്ത്രിയെ പ്രഖ്യാപിക്കുമെന്നും എത്രയും വേഗം മന്ത്രിസഭ രൂപീകരിക്കാൻ തയ്യാറെടുക്കുകയാണെന്നും കോൺഗ്രസ് നേതാവ് സയ്യിദ് നസീർ ഹുസൈൻ പറഞ്ഞു. പാർട്ടി വൃത്തങ്ങൾ പറയുന്നതനുസരിച്ച്, പുതുതായി തിരഞ്ഞെടുക്കപ്പെട്ട നിയമസഭാംഗങ്ങളുടെ അഭിപ്രായം തേടും, ഫലത്തെ ആശ്രയിച്ച്, ആവശ്യമെങ്കിൽ വോട്ട് ചെയ്യാൻ ആവശ്യപ്പെടുമെന്ന് പിടിഐ റിപ്പോർട്ട് ചെയ്തു.
”എല്ലാ പാർട്ടിയിലും അതിമോഹങ്ങൾ ഉണ്ടാകും. ഡി കെ ശിവകുമാറും സിദ്ധരാമയ്യയും മാത്രമല്ല എം ബി പാട്ടീലിനും ജി പരമേശ്വരയ്ക്കും പോലും താൽപ്പര്യമുണ്ട്. ഒരാൾ മാത്രമേ മുഖ്യമന്ത്രിയാകൂ, പാർട്ടിയുടെ ഹൈക്കമാൻഡും എംഎൽഎമാരും അത് തീരുമാനിക്കും. എനിക്ക് മന്ത്രി സ്ഥാനം ലഭിക്കും,’ കർണാടക കോൺഗ്രസ് വർക്കിംഗ് പ്രസിഡന്റ് രാമലിംഗ റെഡ്ഡി എഎൻഐയോട് പറഞ്ഞു.
മുഖ്യമന്ത്രി സ്ഥാനത്തേക്ക് സിദ്ധരാമയ്യയും കർണാടക പ്രദേശ് കോൺഗ്രസ് കമ്മിറ്റി പ്രസിഡന്റ് ഡികെ ശിവകുമാറും തമ്മിലാണ് കടുത്ത മത്സരം. സിദ്ധരാമയ്യ, ഡികെ ശിവകുമാർ എന്നിവരെക്കൂടാതെ മുൻ ഉപമുഖ്യമന്ത്രിയും മുൻ കെപിസിസി അധ്യക്ഷനുമായ ജി പരമേശ്വര, മുതിർന്ന നേതാവും ഏഴു തവണ എംപിയുമായ കെഎച്ച് മുനിയപ്പ – ദലിതർ, എം ബി പാട്ടീൽ – ലിംഗായത്ത് എന്നിവരുടെ പേരുകളും മുഖ്യമന്ത്രി സ്ഥാനത്തേക്ക് ഊർജിതമാണ്.
കഴിഞ്ഞ ദിവസം കോൺഗ്രസ് അധ്യക്ഷൻ മല്ലികാർജുൻ ഖാർഗെയും എട്ട് തവണ എംഎൽഎയായ സിദ്ധരാമയ്യയും കൂടിക്കാഴ്ച നടത്തിയിരുന്നു. മല്ലികാർജുൻ ഖാർഗെയുടെയും സിദ്ധരാമയ്യയുടെയും കൂടിക്കാഴ്ച ആദരണീയമായ സന്ദർശനമാണെന്നും രാഷ്ട്രീയമായല്ലെന്നും പ്രിയങ്ക് ഖാർഗെ പറഞ്ഞു. മുഖ്യമന്ത്രി സ്ഥാനാർത്ഥിയെ സംബന്ധിച്ച അന്തിമ തീരുമാനം സിഎൽപി യോഗത്തിലുണ്ടാകുമെന്നും അദ്ദേഹം കൂട്ടിച്ചേർത്തു.
