IPL🏏വളരെ പെട്ടെന്നായിരുന്നു,എങ്ങനെ തോറ്റെന്ന് അറിയില്ല, പ്രതികരിച്ച് രാഹുൽ

ലഖ്‌നൗ∙ ഗുജറാത്ത് ടൈറ്റന്‍സിനെതിരായ മത്സരത്തിൽ എങ്ങനെയാണു തോറ്റതെന്നു തനിക്കു മനസ്സിലാകുന്നില്ലെന്ന് ലക്നൗ സൂപ്പർ ജയന്റ്സ് ക്യാപ്റ്റൻ കെ.എൽ. രാഹുൽ. ‘‘അതെങ്ങനെ സംഭവിച്ചെന്ന് എനിക്ക് അറിയില്ല. വളരെ പെട്ടെന്നായിരുന്നു ഞങ്ങളുടെ തോൽവി. ഞങ്ങളുടെ നിയന്ത്രണത്തിലായിരുന്ന കളി കൈവിട്ടുപോകുമ്പോള്‍ അതു തടയാൻ എനിക്കു സാധിച്ചില്ല. ബോളിങ്ങിലും ഫീൽഡിങ്ങിലും ഞങ്ങൾ മികച്ചുനിന്നു. സാഹചര്യം നന്നായി ഉപയോഗിച്ചു.’’– രാഹുൽ മത്സരശേഷം പ്രതികരിച്ചു.

‘‘എന്താണു സംഭവിച്ചതെന്ന് എനിക്ക് ഇപ്പോഴും പറയാൻ സാധിക്കുന്നില്ല, അക്കാര്യം മനസ്സിലാകുന്നില്ല. ഇതൊരു മത്സരം മാത്രമാണ്. ഇപ്പോഴും ഞങ്ങൾക്ക് ഏഴ് കളികളിൽനിന്ന് നാല് വിജയങ്ങളുണ്ട്. പക്ഷേ ഈ തോൽവി കുറച്ചുനാൾ‌ വേദനയായുണ്ടാക്കും.

ഗുജറാത്ത് താരങ്ങൾ മികച്ച കുറച്ച് ഓവറുകൾ എറിഞ്ഞിരുന്നു. ഈ പിച്ചിൽ പുതിയ ബാറ്റർമാർക്കു തിളങ്ങാൻ സാധിക്കണമെന്നില്ല. സെറ്റായി നിൽക്കുന്നവർ കളി ഫിനിഷ് ചെയ്യാൻ നോക്കണം. അവസാന ഓവറുകളിൽ ചില ബൗണ്ടറി അവസരങ്ങളും നഷ്ടമായി.’’– രാഹുൽ പ്രതികരിച്ചു.

അവസാന ഓവറിൽ നാലു വിക്കറ്റുകൾ വീഴ്ത്തിയ ഗുജറാത്ത് ലക്നൗവിനെതിരെ ഏഴു റൺസ് വിജയമാണു സ്വന്തമാക്കിയത്. ആദ്യം ബാറ്റു ചെയ്ത ഗുജറാത്ത് ആറു വിക്കറ്റ് നഷ്ടത്തിൽ 135 റൺസെടുത്തു. മറുപടി ബാറ്റിങ്ങിൽ ലക്നൗ ഏഴു വിക്കറ്റ് നഷ്ടത്തിൽ 128 റൺസെടുത്തു പുറത്തായി. കെ.എൽ. രാഹുൽ, മാര്‍കസ് സ്റ്റോയ്നിസ്, ആയുഷ് ബദോനി, ദീപക് ഹൂഡ എന്നിവരാണ് തുടർച്ചയായ പന്തുകളിൽ പുറത്തായത്.

നാലാം വിജയത്തോടെ എട്ട് പോയിന്റുമായി നാലാം സ്ഥാനത്താണ് ഗുജറാത്ത്. ഏഴു മത്സരങ്ങളിൽനിന്ന് എട്ടു പോയിന്റുള്ള ലക്നൗ രണ്ടാമതാണ്. അര്‍ധ സെഞ്ചറിയുമായി കെ.എൽ. രാഹുൽ അവസാന ഓവർ വരെ ബാറ്റ് ചെയ്തെങ്കിലും ടീമിനെ വിജയത്തിലെത്തിക്കാൻ സാധിച്ചില്ല. 61 പന്തുകളിൽനിന്ന് 68 റൺസാണു രാഹുൽ നേടിയത്.