🚉 “മോദിജി എക്സ്പ്രസ്സ്‌ മെമു” – യാത്രക്കാർ കടുത്ത നിരാശയിൽ”

✍🏼അജാസ് വടക്കേടം… 🚦

കൊച്ചി:പ്രധാനമന്ത്രി ശ്രീ. നരേന്ദ്ര മോദിയുടെ കേരള സന്ദർശനവേളയിൽ ഉദ്ഘാടനം നിർവ്വഹിച്ച എക്സ്പ്രസ്സ്‌ മെമു യാത്രക്കാരുടെ പ്രതീക്ഷകളുടെ താളം തെറ്റിച്ചു. സെപ്റ്റംബർ 1 വൈകുന്നേരം ഫ്ലാഗ് ഓഫ് ചെയ്യുന്നതിന് തൊട്ടുമുമ്പ് വരെ സമയക്രമവും സ്റ്റോപ്പുകളും റെയിൽവേ ഉദ്യോഗസ്ഥരുടെ ഇടയിൽ പോലും രഹസ്യസ്വഭാവം സൂക്ഷിച്ച മെമു മലയാളിയ്ക്ക് ഏറ്റവും ആശ്ചര്യം നിറഞ്ഞ ഒരു പാരിതോഷികമായിരുന്നു. പ്രധാനമന്ത്രിയുടെ ഓണസമ്മാനമായി യാത്രക്കാർ വരവേറ്റ മെമു ട്രെയിനിന്റെ സ്റ്റോപ്പേജും സമയക്രമവും പ്രഖ്യാപിച്ചപ്പോൾ മലയാളികൾ അക്ഷരാർത്ഥത്തിൽ ഞെട്ടുകയായിരുന്നു.

കേരളത്തിന്റെ ഐ. റ്റി മേഖലയുടെ ഹബ്ബ് എന്ന് വിശേഷിപ്പിക്കാവുന്ന തൃപ്പൂണിത്തുറയിൽ പോലും മെമുവിന് സ്റ്റോപ്പ്‌ നൽകാതിരുന്നത് യാത്രക്കാർക്കിടയിൽ കടുത്ത അസ്വാരസ്യത്തിന് ഇടയാക്കി. ഹ്രസ്വദൂര സർവീസുകളിൽ ഒഴിവാക്കാൻ പറ്റാത്ത വൈക്കം, ഏറ്റുമാനൂർ സ്റ്റേഷനുകളെ ആശ്രയിക്കുന്നവരും, കൂടുതൽ മെമു സർവീസിനായി കാത്തിരുന്ന ഹാൾട്ട് സ്റ്റേഷനുകളിലെ യാത്രക്കാരും ഇതോടെ നിരാശയിലായി. ഹ്രസ്വദൂര സർവീസുകളിൽ സ്റ്റോപ്പുകൾ കൂടി വെട്ടിക്കുറച്ചാൽ കയറാനും ഇറങ്ങാനും ആളില്ലാതെ സർവീസ് നഷ്ടം നിരത്തി ഭാവിയിൽ ഒഴിവാക്കുകയാണ് റെയിൽവേയുടെ ലക്ഷ്യമെന്ന് ഇതിൽ നിന്നും വെളിപ്പെടുന്നുണ്ട്.

രാവിലെ രണ്ട് പാസഞ്ചർ ട്രെയിനിന് പിറകിലായി 08.45 ന് എറണാകുളം ജംഗ്ഷനിൽ നിന്ന് ആരംഭിക്കുന്ന മെമു യാത്രക്കാർക്ക് ഒരു വിധത്തിലും പ്രയോജനപ്പെടുന്നില്ല. അതുപോലെ ഉച്ചയ്ക്ക് 02.55 ന് കായംകുളത്ത് നിന്ന് ഐലൻഡ് എക്സ്പ്രസ്സ്‌ പുറപ്പെട്ട് അഞ്ചുമിനിറ്റിനുള്ളിൽ എടുക്കുന്ന മെമു ഓഫീസ് ജീവക്കാർക്കോ, വിദ്യാർത്ഥികൾക്കോ കച്ചവടക്കാർക്കോ ഒട്ടും അനുകൂലമല്ലാത്ത സമയത്തിലൂടെയാണ് സഞ്ചരിക്കുന്നത്. തൊട്ടുമുന്നിൽ കടന്നുപോകുന്ന ബാംഗ്ലൂർ ഐലൻഡ് എക്സ്പ്രസ്സിനുള്ള സ്റ്റോപ്പുകൾ പോലും മെമുവിന് നൽകിയിട്ടില്ല.. സ്ഥിരയാത്രക്കാർ ഇല്ലാതെ പടിപടിയായി ഈ സർവീസ് അവസാനിപ്പിക്കാനുള്ള ഗൂഢലക്ഷ്യമാണ് ഇതിന്റെ പിന്നിലെന്ന് സംശയിക്കേണ്ടിയിരിക്കുന്നു. മാന്യമായ വ്യത്യാസത്തിൽ ഐലൻഡ് ന് പിന്നിൽ തന്നെ സർവീസ് നടത്തിയിരുന്നെങ്കിൽ കുറച്ചുപേർക്കെങ്കിലും എങ്കിലും ഈ സർവീസുകൊണ്ട് പ്രയോജനം ലഭിച്ചേനെ

പ്രധാനമന്ത്രി കേരള ജനതയ്ക്ക് മുന്നിൽ ഫ്ലാഗ് ഓഫ് ചെയ്യുന്ന ആദ്യത്തെ ട്രെയിൻ സർവീസാണ് 16309/16310 എക്സ്പ്രസ്സ്‌ മെമു. ഒരുപാട് സവിശേഷതകളോടെയാണ് സംസ്ഥാനത്തെ ആദ്യ എക്സ്പ്രസ്സ്‌ മെമു അദ്ദേഹം കേരള നാടിന് സമ്മാനിച്ചത്. ഒരു പക്ഷേ ഇതിന്റെ പിന്നിൽ ഇത്രയും നിഗൂഢതകൾ ഉണ്ടെന്ന് അദ്ദേഹം പോലും പ്രതീക്ഷിച്ചുകാണില്ല. കേരളത്തിലെ റെയിൽവേ ഡിവിഷനുകൾ മാത്രം വിചാരിച്ചാൽ ഒരു പക്ഷേ ഏറ്റവും ആശ്വാസകരമാകുന്ന സമയക്രമം ഈ മെമുവിനായി ചിട്ടപ്പെടുത്താമായിരുന്നു.

രാവിലെ 07.08 ന് കോട്ടയത്ത് നിന്ന് എറണാകുളം ഭാഗത്തേയ്ക്ക് പാലരുവി കടന്നുപോയാൽ വേണാട് എക്സ്പ്രസ്സ്‌ മാത്രമാണ് സ്ഥിരയാത്രക്കാരുടെ ഏക ആശ്രയം. വേണാട് എറണാകുളം എത്തുമ്പോൾ ഓഫീസ് സമയം അതിക്രമിച്ചിരിക്കും. പാലരുവി വളരെ നേരത്തെ പുറപ്പെടുന്നതിനാൽ സ്ത്രീകളടക്കം പുലർച്ചെ സ്റ്റേഷനുകളിൽ എത്തിപ്പെടാൻ ഏറെ പ്രയാസപ്പെടുന്നുണ്ട്. ഈ അവസരത്തിൽ പാലരുവിയ്ക്കും വേണാടിനും മദ്ധ്യേ മെമു സർവീസ് ആരംഭിച്ചിരുന്നെങ്കിൽ യാത്രക്കർക്ക് ഏറെ ആശ്വാസകരമായേനെ.. അതുപോലെ കായംകുളത്ത് നിന്ന് ഉച്ചയ്ക്ക് 11.55 ന് കൊല്ലം – എറണാകുളം മെമു കടന്നുപോയാൽ എല്ലാ സ്റ്റോപ്പിലും നിർത്തി കടന്നുപോകുന്ന ഒരു സർവീസ് ഇല്ലെന്നതും വസ്തുതാപരമാണ്. റെയിൽവേ പുതിയ മെമുവിൻറെ സ്റ്റോപ്പുകളെങ്കിലും അടിയന്തിരമായി പുന:പരിശോധിക്കുമെന്ന പ്രതീക്ഷയിലാണ് യാത്രക്കാർ.

സ്റ്റോപ്പുകളുടെ പരിമിതിയിൽ നിന്ന് “ജനങ്ങൾക്ക് വേണ്ടിയല്ല” മെമു സർവീസ് കൊട്ടി ആഘോഷിച്ച് പ്രഖ്യാപിച്ചതെന്ന് വ്യക്തമാണ്. അല്ലെങ്കിൽ ജനങ്ങൾക്ക് ഒരിക്കലും പ്രയോജനപ്പെടരുതെന്ന് ചില തല്പരചിന്തകർ തീരുമാനിച്ചിട്ടുണ്ടാവണം. റെയിൽവേ ഈ മെമു സർവീസ് പ്രഖ്യാപിക്കാൻ പ്രധാനമന്ത്രിയെ ക്ഷണിച്ചതിലൂടെ ശരിക്കും പരിഹസിക്കാൻ ശ്രമിച്ചത് ജനങ്ങളെ തന്നെയാണോ? സംശയിക്കേണ്ടിയിരിക്കുന്നു.

പ്രധാനമന്ത്രി സമ്മാനിച്ച മെമു വിപരീതസ്വരമാണ് ജനങ്ങൾക്കിടയിൽ ഉയർത്തിയതെന്ന സത്യം അദ്ദേഹത്തിന്റെ തന്നെ ശ്രദ്ധയിൽപ്പെടുത്താനുള്ള ശ്രമങ്ങൾ പാസഞ്ചർ അസോസിയേഷനുകൾ തുടങ്ങിക്കഴിഞ്ഞു . ജനം ആവേശത്തോടെ സ്വയം നൽകിയ മോദിജിയുടെ പേരിൽ തന്നെ സമയക്രമവും സ്റ്റോപ്പുകളും പുന:ക്രമീകരിച്ച് സർവീസ് നടത്തണമെന്നാണ് യാത്രക്കാരുടെ ആവശ്യം.