കൊച്ചി മുട്ടാർ പുഴയിൽ വൻ മത്സ്യക്കുരുതി, ജല മലിനീകരണം രൂക്ഷമായതിന്റെ തെളിവെന്ന് നാട്ടുകാർ

മുട്ടാർ പുഴയിൽ വൻ മത്സ്യക്കുരുതി
കളമശ്ശേരി: പെരിയാറിന്റെ കൈവഴിയായ മുട്ടാർ പുഴയുടെ മഞ്ഞുമ്മൽ റെഗുലേറ്റർ കം ബ്രിഡ്ജിനു സമീപം ഇന്നലെ വെളുപ്പിനെ 4.30 മുതൽ മത്സ്യങ്ങൾ കൂട്ടത്തോടെ ശ്വാസം കിട്ടാതെ പിടഞ്ഞുപൊങ്ങി. ചെമ്മീൻ, കൂരി,വാള,കരിമീൻ, ചെമ്പല്ലി,കോലാൻ, കൊഞ്ച് തുടങ്ങിയ മത്സ്യങ്ങളാണ് പൊങ്ങിയത്. മത്സ്യങ്ങൾ പൊങ്ങിയതറിഞ്ഞ് ഏലൂരിന്റെയും കളമശ്ശേരിയുടെയും വിവിധ ഭാഗങ്ങളിൽ നിന്ന് നാട്ടുകാരെത്തി വലയും ചുണ്ടയും ഉപയോഗിച്ച് മത്സ്യങ്ങളെ പിടിച്ച് വില്പനക്കായും സ്വന്തം ആവശ്യങ്ങൾക്കുമായും കൊണ്ടുപോയി.സംഭവമറിഞ്ഞ് ഏലൂർ മലിനീകരണ നിയന്ത്രണ ബോർഡ് ഉദ്യോഗസ്ഥരെത്തി ജലസാപിളുകൾ ശേഖരിച്ചു . സംഭവമറിഞ്ഞ് ബി ജെ പി നേതാക്കളായ എൻ പി ശങ്കരൻകുട്ടി, എ സുനിൽകുമാർ, പി പി സുന്ദരൻ തുടങ്ങിയവർ സംഭവസ്ഥലത്തെത്തി. മത്സ്യം കാണാൻ ജനങ്ങൾ തിങ്ങികൂടിയതുമൂലം ആറാട്ടുകടവ് പാലത്തിൽ ഗതാഗത സ്തംപനമുണ്ടായതിനെ തുടന്ന് പോലിസ് ഇടപെട്ട് ഗതാഗതം നിയന്ത്രിച്ചു. മത്സ്യങ്ങൾ ശ്വാസം കിട്ടാതെ പിടയുന്ന വിഷയവുമായി ബന്ധപ്പെട്ട് ഏലൂരിലെ ഭരണപക്ഷ കൗൺസിലർമാർ ഏലൂർ മലിനികരണ നിയന്ത്രണ ബോർഡ് ഓഫീസിൽ ചെന്ന് എഞ്ചിനിയർ ശ്രീലക്ഷ്മിയുമായി ചർച്ച നടത്തി. ഈ വിഷയം എത്രയും പെട്ടന്ന് ജില്ല ഭരണകൂടത്തെ അറിയിക്കണമെന്ന് ആവശ്യപ്പെട്ടു. ഫാക്ട് കോട്ടേഴ്സ്, എച്ച് ഐ എൽ കോട്ടേഴ്സ്, ടി സി സി കോർട്ടേഴ്സ്, എറണാകുളത്തെ വിവിധ ആശുപത്രികൾ, കിൻഫ്ര തുടങ്ങിയ നിരവധി മേഖലയിൽ ഈ പുഴയിലെ ജലമാണ് ഉപയോഗിക്കുന്നത്. ഈ വർഷം തുടക്കo തന്നെ മത്സ്യക്കുരുതി നടന്നതിൽ ജനങ്ങൾക്ക് ആശങ്കയാണ്. കളമശ്ശേരി നഗരസഭയുടെ ഡംപിങ് ആഡിനു സമീപമുള്ള തൂമ്പുങ്കൽ തോട് ചില ഗോഡൗണുകൾ ,മാർക്കറ്റ്, കെട്ടിട സമുച്ചയങ്ങൾ ഇവയിൽ നിന്ന് തള്ളുന്ന മാലിന്യങ്ങളാണ് ഈ മത്സ്യ കുരുതിക്ക് കാരണമെന്ന് മുൻപും പഠനങ്ങൾ തെളിയിച്ചിട്ടുണ്ട്. വേനൽ കടുക്കുമ്പോൾ ജനങ്ങൾ കുടിനീരിനായി നെട്ടോട്ടമോടുമ്പോഴാണ് ഇതുപോലെ പുഴയെയും മറ്റ് ജല സ്രോതസ്സുകളെയും മനുഷ്യനാൽ നശിപ്പിക്കപ്പെടുന്നത് ഒരു കാരണവശാലും അംഗീകരിക്കപ്പെടുന്നതല്ല. പുഴ മലിനീകരണത്തിന് കാരണമായവരെ കണ്ടെത്തി അവർക്കെതിരെ ശക്തമായ നടപടി എടുക്കണമെന്ന് ബിജെപി കളമശ്ശേരി നിയോജക മണ്ഡലം സെക്രട്ടറി പ്രമോദ് കുമാർ തൃക്കാക്കര ആവശ്യപ്പെട്ടു.