കോഴിക്കോട്: വടകര കോട്ടക്കടവില്‍ ഭാര്യാവീടിന് തീ കൊളുത്തിയ ശേഷം യുവാവിന്റെ ആത്മഹത്യാ ശ്രമം. ഗുരുതരമായി പൊള്ളലേറ്റ വടകര സ്വദേശി അനില്‍കുമാറിനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
ഇന്ന് പുലര്‍ച്ചെ നാലുമണിയോടെയാണ് വടകര കോട്ടക്കടവില്‍ ഭാര്യയുടെ വീടിന് തീയിട്ട ശേഷം ശരീരത്ത് പെട്രോള്‍ ഒഴിച്ച് യുവാവ് അത്മഹത്യയ്ക്ക് ശ്രമിച്ചത്. കോട്ടക്കടവ് സ്വദേശി അനില്‍കുമാറാണ് ഭാര്യാവീട്ടുകാരെ അപകടപ്പെടുത്താന്‍ ശ്രമിച്ചത്. ഭാര്യയുമായി കുടുംബ പ്രശ്നങ്ങള്‍ നിലനിന്നിരുന്ന അനില്‍കുമാര്‍ ഇവരെ അപകടപ്പെടുത്തുമെന്ന് നാട്ടുകാരോട് മുന്‍പ് പറഞ്ഞിരുന്നതായി പൊലീസിന് മൊഴി ലഭിച്ചിട്ടുണ്ട്.
വീടിന് പുറത്ത് നിന്ന് തീ ഉയരുന്നത് ശ്രദ്ധയില്‍പെട്ട വീട്ടുകാരാണ് വിവരം പോലീസില്‍ അറിയിച്ചത്. ആത്മഹത്യയ്ക്ക് ശ്രമിച്ച അനില്‍കുമാറിന്റെ ശരീരത്തിലെ തീ കെടുത്തിയ ശേഷം നാട്ടുാകാര്‍ വടകര ജില്ലാ ആശുപത്രിയിലെത്തിക്കുകയായിരുന്നു.
പൊള്ളല്‍ ഗുരുതരമായതിനാല്‍ അനില്‍കുമാറിനെ മെഡിക്കല്‍ കോളേജ് ആശുപത്രിയിലേക്ക് മാറ്റി. വീടിന് തീയിടാന്‍ ശ്രമിക്കുന്നതിനിടെയുണ്ടായ അപകടത്തില്‍ മുറ്റത്ത് നിര്‍ത്തിയിട്ടിരുന്ന കാറിനും, സ്‌ക്കൂട്ടറിനും കേടുപാടുകള്‍ സംഭവിച്ചു. സംഭവത്തില്‍ വടകര പൊലീസ് കേസെടുത്തിട്ടുണ്ട്.
