തിരുവനന്തപുരം: സംസ്ഥാനത്തെ സിനിമാ തിയേറ്ററുകള് തുറക്കാന് തീരുമാനം. മുഖ്യമന്ത്രി പിണറായി വിജയനുമായി വിവിധ സംഘടനകള് നടത്തിയ ചര്ച്ചയിലാണു തീരുമാനമായത്. വിനോദ നികുതിയില് ഇളവു നല്കണമെന്ന ആവശ്യം മുഖ്യമന്ത്രിയോട് ഉന്നയിച്ചു. ആവശ്യങ്ങളോടു മുഖ്യമന്ത്രി അനുകൂല നിലപാടാണ് എടുത്തതെന്ന് സംഘടനാ പ്രതിനിധികള് പറഞ്ഞു. അതേസമയം, സെക്കന്ഡ് ഷോ അനുവദിക്കാന് സാധിക്കില്ലെന്നു മുഖ്യമന്ത്രി പറഞ്ഞു.
തിയേറ്ററുകള് എന്നു തുറക്കണമെന്നതു സംബന്ധിച്ചു സംഘടനകള് കൊച്ചിയില് യോഗം ചേര്ന്നു തീരുമാനിക്കും. ഇതിനായുള്ള നിര്മാതാക്കളുടെ യോഗം കൊച്ചിയില് തുടങ്ങിയതായാണു റിപ്പോര്ട്ടുകള്. 10 മാസത്തിലേറെയായി അടഞ്ഞുകിടക്കുന്ന കേരളത്തിലെ തിയറ്ററുകള് തുറക്കാമെന്നു പുതുവത്സര ദിനത്തില് സര്ക്കാര് പ്രഖ്യാപിച്ചിരുന്നു. കൊവിഡ് മാനദണ്ഡങ്ങള് പാലിച്ചുകൊണ്ടു തിയേറ്ററുകള്ക്കു പ്രവര്ത്തിക്കാമെന്നായിരുന്നു മുഖ്യമന്ത്രി അറിയിച്ചത്.
എന്നാല് പകുതി സീറ്റുമായി പ്രദര്ശനം നടത്തുന്നതു തങ്ങള്ക്ക് നഷ്ടമാണെന്നും വൈദ്യുതി ഫിക്സഡ് ചാര്ജ്, വിനോദ നികുതി എന്നിവയില് ഇളവനുവദിക്കുമോ എന്നറിഞ്ഞിട്ടേ തീരുമാനം എടുക്കൂവെന്നും ഫിയോക് തൊട്ടുപിന്നാലെ അറിയിച്ചു. തങ്ങളുടെ ആവശ്യങ്ങള് അംഗീകരിക്കാതെ തീയേറ്ററുകള് തുറക്കാനാവില്ലെന്നു ഫിലിം ചേംബറും അറിയിച്ചു. വിനോദ നികുതി ഒഴിവാക്കണമെന്നും പ്രദര്ശനസമയത്തില് മാറ്റം അനുവദിക്കണമെന്നുമായിരുന്നു സംഘടനകളുടെ ആവശ്യം.