ചെന്നൈ: തമിഴ്നാട് ആരോഗ്യവകുപ്പിന്റെ പുതിയ വാഹനങ്ങളുടെ ഫ്ളാഗ് ഓഫ് ചടങ്ങിനിടെ സർപ്രൈസ് നീക്കവുമായി മുഖ്യമന്ത്രി ജോസഫ് വിജയ്. സെക്രട്ടേറിയറ്റ് കാമ്പസിൽ ബുധനാഴ്ച നടന്ന ഔദ്യോഗിക ചടങ്ങിനിടെയാണ് ഉദ്യോഗസ്ഥരെയും മാധ്യമപ്രവർത്തകരെയും അമ്പരപ്പിച്ചു കൊണ്ട് മുഖ്യമന്ത്രി സ്വയം ഡ്രൈവിങ് സീറ്റിലേക്ക് കയറിയത്. ആരോഗ്യവകുപ്പിനായി പുതുതായി നിരത്തിലിറക്കിയ മഹീന്ദ്ര ബൊലേറോ കാറുകളിലൊന്നാണ് വിജയ് നേരിട്ട് ഓടിച്ചത്.
ഫ്ളാഗ് ഓഫ് നിർവഹിച്ചതിന് പിന്നാലെ അപ്രതീക്ഷിതമായി വിജയ് വാഹനത്തിന്റെ സ്റ്റിയറിങ് കൈക്കലാക്കുകയായിരുന്നു. ഔദ്യോഗിക ഡ്രൈവറെ തൊട്ടടുത്ത സീറ്റിലിരുത്തി, മുഖ്യമന്ത്രി തന്നെ വാഹനം മുന്നോട്ട് എടുത്തു. തുടർന്ന് സെക്രട്ടേറിയറ്റ് കാമ്പസിനു ചുറ്റും അദ്ദേഹം വാഹനം ഓടിക്കുകയും ചെയ്തു. സിനിമാ സ്ക്രീനിലെ മാസ്സ് എൻട്രികളെ അനുസ്മരിപ്പിക്കുന്ന രീതിയിലുള്ള മുഖ്യമന്ത്രിയുടെ ഈ പെട്ടെന്നുള്ള നീക്കം ചടങ്ങിൽ പങ്കെടുത്തവർക്ക് വലിയ ആവേശമാണ് സമ്മാനിച്ചത്.
സെക്രട്ടേറിയറ്റ് ജീവനക്കാരും പാർട്ടി പ്രവർത്തകരും പകർത്തിയ വിജയ് ബൊലേറോ ഓടിക്കുന്ന ദൃശ്യങ്ങൾ നിമിഷങ്ങൾക്കകമാണ് സാമൂഹികമാധ്യമങ്ങളിൽ തരംഗമായി മാറിയത്. രാഷ്ട്രീയത്തിലേക്ക് ചുവടുവെച്ചതിന് ശേഷവും വിജയ്ക്കുള്ള ജനപ്രീതി അടിവരയിടുന്നതായിരുന്നു ദൃശ്യങ്ങൾക്ക് ലഭിച്ച വൻ സ്വീകാര്യത. ‘തലവർ മാസ്സ്’ എന്ന ക്യാപ്ഷനുകളോടെ ആരാധകരും തമിഴ്നാട് ജനതയും ഈ വീഡിയോ സോഷ്യൽ മീഡിയ പ്ലാറ്റ്ഫോമുകളിൽ ഏറ്റെടുത്തുകഴിഞ്ഞു.
തമിഴ്നാട് ആരോഗ്യവകുപ്പിന്റെ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനായി 2.9 കോടി രൂപ ചെലവിട്ടാണ് 40 പുതിയ വാഹനങ്ങൾ സർക്കാർ പുറത്തിറക്കിയത്. സംസ്ഥാനത്തെ ഗ്രാമവികസന പ്രവർത്തനങ്ങൾക്കും മെഡിക്കൽ സേവനങ്ങൾക്കും വേഗത കൂട്ടാൻ ലക്ഷ്യമിട്ടാണ് ഈ വാഹനങ്ങൾ വിന്യസിക്കുന്നത്. ഉൾനാടൻ ഗ്രാമങ്ങളിലെ ആരോഗ്യ പരിപാലന രംഗത്ത് വലിയ കുതിച്ചുചാട്ടത്തിന് ഈ വാഹനങ്ങൾ സഹായകരമാകുമെന്നാണ് വിലയിരുത്തൽ.
സെക്രട്ടേറിയറ്റ് കാമ്പസ് ചുറ്റിയുള്ള ഡ്രൈവിംഗിന് ശേഷം വാഹനത്തിൽ നിന്നിറങ്ങിയ മുഖ്യമന്ത്രി വിജയ്, പുതിയ വാഹനങ്ങളുടെ ഡ്രൈവർമാർക്ക് ഔദ്യോഗികമായി താക്കോലുകൾ കൈമാറി. ജനങ്ങളുടെ അടിസ്ഥാന ആവശ്യങ്ങളായ ആരോഗ്യ-വിദ്യാഭ്യാസ മേഖലകൾക്ക് തന്റെ സർക്കാർ നൽകുന്ന മുൻഗണനയുടെ തെളിവാണ് ഇത്തരം പദ്ധതികളെന്ന് ചടങ്ങിൽ സംസാരിക്കവെ അദ്ദേഹം ഓർമ്മിപ്പിച്ചു. ആരോഗ്യവകുപ്പ് മന്ത്രിയും മറ്റ് ഉന്നത ഉദ്യോഗസ്ഥരും ചടങ്ങിൽ സന്നിഹിതരായിരുന്നു.
English Summary:
Tamil Nadu Chief Minister Joseph Vijay surprised everyone at the Chennai Secretariat on Wednesday by personally test-driving a new Mahindra Bolero during a flag-off ceremony. The event was organized to launch 40 new vehicles worth ₹2.9 crore for the State Health Department, aimed at boosting rural development and medical services. Leaving the official driver in the passenger seat, CM Vijay drove the vehicle around the Secretariat campus. The footage of the Chief Minister behind the wheel quickly went viral on social media. Following the drive, he officially handed over the keys to the newly appointed drivers of these medical service vehicles.