തിരുവനന്തപുരം: പുതിയ നിയമസഭാംഗങ്ങളുടെ സത്യപ്രതിജ്ഞാ ചടങ്ങുകൾക്ക് മുന്നോടിയായി രാഷ്ട്രീയ വൃത്തങ്ങളിൽ വലിയ ചർച്ചകൾക്ക് തിരികൊളുത്തി മുതിർന്ന നേതാവ് ജി. സുധാകരന്റെ പ്രതികരണം. പ്രോടെം സ്പീക്കറായി നിയമിതനായ ജി. സുധാകരന്റെ മുന്നിലാണല്ലോ മുഖ്യമന്ത്രി പിണറായി വിജയൻ ഉൾപ്പെടെയുള്ളവർ സത്യപ്രതിജ്ഞ ചെയ്യേണ്ടതെന്ന മാധ്യമപ്രവർത്തകരുടെ ചോദ്യത്തോടാണ് അദ്ദേഹം തനത് ശൈലിയിൽ പ്രതികരിച്ചത്. പിണറായി വിജയനും നിയമസഭയിൽ തങ്ങളെപ്പോലെയുള്ള ഒരു എം.എൽ.എ മാത്രമാണെന്നായിരുന്നു സുധാകരന്റെ വിട്ടുവീഴ്ചയില്ലാത്ത മറുപടി.
തന്റെ മുന്നിൽ പിണറായി വിജയനെന്നോ മറ്റൊരാളെന്നോ ഉള്ള വ്യത്യാസങ്ങളില്ലെന്നും, സഭയിലെത്തുന്ന എം.എൽ.എമാരെ സത്യപ്രതിജ്ഞ ചെയ്യിക്കുക എന്നത് മാത്രമാണ് പ്രോടെം സ്പീക്കറുടെ ചുമതലയെന്നും അദ്ദേഹം ഓർമ്മിപ്പിച്ചു. പിണറായി വിജയൻ രണ്ടുതവണ മുഖ്യമന്ത്രിയായിരുന്നുവെന്നും ആ സർക്കാരിൽ താനും അംഗമായിരുന്നുവെന്നും പറഞ്ഞ സുധാകരൻ, രാഷ്ട്രീയത്തിൽ വ്യക്തിപരമായ ശത്രുതയ്ക്ക് യാതൊരു അടിസ്ഥാനവുമില്ലെന്നും തനിക്ക് ആരോടും ശത്രുതയില്ലെന്നും വ്യക്തമാക്കി.
തിരഞ്ഞെടുപ്പ് തോൽവിക്ക് പിന്നാലെ സി.പി.എം സംസ്ഥാന സെക്രട്ടറിയും പ്രതിപക്ഷ നേതാവും സ്ഥാനമൊഴിയണമെന്നോ വേണ്ടെന്നോ തനിക്ക് വ്യക്തിപരമായി അഭിപ്രായമില്ലെന്നും അതവരുടെ തീരുമാനമാണെന്നും അദ്ദേഹം പറഞ്ഞു. എങ്കിലും, തിരഞ്ഞെടുപ്പിൽ മുന്നണിയെ നയിച്ചത് അവരായതുകൊണ്ട് തന്നെ ഈ കടുത്ത പരാജയത്തിന്റെ ഉത്തരവാദിത്വത്തിൽ നിന്ന് നേതൃത്വത്തിന് ഒഴിഞ്ഞുമാറാനാകില്ലെന്ന് സുധാകരൻ തുറന്നടിച്ചു.
നിയമസഭയിലേക്ക് ഒരിക്കൽക്കൂടി വരണമെന്ന് താൻ ആഗ്രഹിച്ചിരുന്നുവെന്നും എന്നാൽ പാർട്ടിയിൽ തുടർന്നിട്ട് കാര്യമില്ലെന്ന് തോന്നിയതിനാലാണ് മാറിയതെന്നും അദ്ദേഹം വെളിപ്പെടുത്തി. താൻ പാർട്ടിയിൽ നിന്ന് രാജിവെക്കുകയോ തന്നെ ആരും പുറത്താക്കുകയോ ചെയ്തിട്ടില്ലെന്നും, കേവലം പാർട്ടി അംഗത്വം പുതുക്കുക മാത്രമാണ് ചെയ്യാതിരുന്നതെന്നും സുധാകരൻ വ്യക്തമാക്കി. രാഷ്ട്രീയ ഭേദമന്യേ എല്ലാ വിഭാഗം ജനങ്ങളും തനിക്ക് വോട്ട് നൽകിയിട്ടുണ്ടെന്നാണ് തന്റെ വിജയത്തെക്കുറിച്ച് അദ്ദേഹം പറഞ്ഞത്.
പാർട്ടിയുടെ മാത്രം കാൽലക്ഷത്തോളം വോട്ടുകൾ തനിക്ക് ലഭിച്ചിട്ടുണ്ടാകാമെന്നും ഇതിനൊപ്പം യു.ഡി.എഫ് അണികൾ തനിക്കായി ആത്മാർത്ഥമായി രംഗത്തിറങ്ങി പ്രവർത്തിച്ചുവെന്നും സുധാകരൻ കൂട്ടിച്ചേർത്തു. പുതിയ സഭാ സമ്മേളനത്തിന് തൊട്ടുമുമ്പ് പാർട്ടി നേതൃത്വത്തെയും മുഖ്യമന്ത്രിയെയും ഒരേപോലെ ലക്ഷ്യമിട്ട് സുധാകരൻ നടത്തിയ ഈ തുറന്നുപറച്ചിലുകൾ വരും ദിവസങ്ങളിൽ സംസ്ഥാന രാഷ്ട്രീയത്തിൽ വലിയ അടിയൊഴുക്കുകൾക്ക് കാരണമായേക്കും.
English Summary:
Ahead of the assembly session, Pro-tem Speaker G. Sudhakaran stirred political waves by stating that Chief Minister Pinarayi Vijayan is just an MLA like any other member in the house. Responding to queries about administering the oath to the CM, Sudhakaran emphasized that the Pro-tem Speaker’s duty is uniform to all members and asserted he holds no personal enmity towards anyone. He also targeted the party top brass for the recent electoral defeat, stating that the leadership must take responsibility for the failure. Clarifying his political stance, Sudhakaran added that he neither resigned nor was expelled, but merely chose not to renew his party membership, attributing his electoral success to across-the-board support, including sincere efforts from the UDF.