തിരുവനന്തപുരം: സംസ്ഥാനത്തെ സ്കൂളുകളില് ഇന്ന് മുതല് കുട്ടികള്ക്ക് കോവിഡ് വാക്സിന് നല്കും.
പരമാവധി കുട്ടികളെ വാക്സിന് നല്കി സുരക്ഷിതരാക്കാനാണ് സ്കൂളുകളില് വാക്സിനേഷന് നടത്താന് തീരുമാനിച്ചത്. ആരോഗ്യ വകുപ്പും വിദ്യാഭ്യാസ വകുപ്പും നിരവധി തവണ ചര്ച്ച നടത്തിയ ശേഷമാണ് ക്രമീകരണങ്ങള് നടത്തിയത്. 15 മുതല് 17 വയസുവരെയുള്ള കുട്ടികള്ക്കാണ് വാക്സിന് നല്കുക.
രക്ഷിതാക്കളുടെ സമ്മതത്തോടെ കോവാക്സിനാണ് കുട്ടികള്ക്ക് നല്കുന്നത്. വാക്സിനേഷനായി 967 സ്കൂളുകള് സജ്ജമാക്കിയെന്ന് വിദ്യാഭ്യാസ വകുപ്പ് അറിയിച്ചു. പൂര്ണമായും കോവിഡ് മാര്ഗനിര്ദേശങ്ങള് പാലിച്ചായിരിക്കും വാക്സിനേഷന് പ്രവര്ത്തിക്കുക. 15 വയസിന് മുകളിലുള്ള കുട്ടികള്ക്ക് വാക്സിന് എടുത്തെന്ന് എല്ലാ രക്ഷിതാക്കളും ഉറപ്പാക്കണമെന്ന് ആരോഗ്യമന്ത്രി വീണ ജോര്ജ്ജ് പറഞ്ഞു.
സംസ്ഥാനത്ത് 15 വയസിനും 18 വയസിനും ഇടയ്ക്കുള്ള 8,31,495 പേര്ക്ക് (55 ശതമാനം) ഇതിനോടകം വാക്സിന് സ്വീകരിച്ചു. 2007ലോ അതിനുമുമ്ബോ ജനിച്ചവര്ക്ക് വാക്സിന് എടുക്കാവുന്നതാണ്. രാവിലെ 9 മണി മുതല് വൈകുന്നേരം 3 മണിവരെയായിരിക്കും സ്കൂളുകളിലെ വാക്സിനേഷന് സമയം.
സാധാരണ വാക്സിനേഷന് കേന്ദ്രങ്ങള് പോലെ
500ല് കൂടുതല് ഗുണഭോക്താക്കളുള്ള സ്കൂളുകളെ സെഷന് സൈറ്റുകളായി തിരഞ്ഞെടുത്താണ് വാക്സിനേഷന് നടത്തുന്നത്. സ്കൂളുകളില് തയ്യാറാക്കിയ വാക്സിനേഷന് സെഷനുകള് അടുത്തുള്ള സര്ക്കാര് കോവിഡ് വാക്സിനേഷന് കേന്ദ്രങ്ങളുമായി ബന്ധിപ്പിച്ചിട്ടുണ്ട്.
സാധാരണ വാക്സിനേഷന് കേന്ദ്രങ്ങള് പോലെ സ്കൂള് വാക്സിനേഷന് കേന്ദ്രങ്ങളിലും വെയ്റ്റിംഗ് ഏരിയ, വാക്സിനേഷന് റൂം, ഒബ്സര്വേഷന് റൂം എന്നിവ ഉണ്ടായിരിക്കും. ഇന്ഫ്രാറെഡ് തെര്മോമീറ്റര് ഉപയോഗിച്ച് താപനില പരിശോധിച്ച ശേഷമായിരിക്കും വിദ്യാര്ത്ഥികളെ വാക്സിനേഷന് കേന്ദ്രത്തില് പ്രവേശിപ്പിക്കുക.
ആധാറോ സ്കൂള് ഐഡി കാര്ഡോ വേണം
കൈകള് സാനിറ്റൈസ് ചെയ്ത ശേഷം വിദ്യാര്ത്ഥികള് വെയിറ്റിംഗ് ഏരിയയില് വിശ്രമിക്കണം. ആധാറോ സ്കൂള് ഐഡി കാര്ഡോ കുട്ടികള് കയ്യില് കരുതണം. വാക്സിനേഷന് ഡെസ്കില് ഇവ കാണിച്ച് രജിസ്റ്റര് ചെയ്ത കുട്ടിയാണെന്ന് ഉറപ്പ് വരുത്തും. കുട്ടിക്ക് മറ്റ് ആരോഗ്യ പ്രശ്നങ്ങളോ അലര്ജിയോ ഇല്ലായെന്ന് ചോദിച്ച് ഉറപ്പ് വരുത്തും. അതിന് ശേഷം വാക്സിനേഷന് റൂമിലെത്തി വാക്സിന് സ്വീകരിക്കാവുന്നതാണ്. ഓരോ കേന്ദ്രത്തിലും ഒരു ഡോക്ടറുടെ സേവനമുണ്ടാകും. വാക്സിനെടുത്ത ശേഷം ഒബ്സര്വേഷന് റൂമില് 30 മിനിറ്റ് കുട്ടികളെ നിരീക്ഷിക്കുന്നതായിരിക്കും.