പാമ്പ് പിടുത്തക്കാരൻ പാമ്പിന്റെ കടിയേറ്റ് മരിച്ചു

കല്ലംമ്പലം: പാമ്പ് പിടുത്തക്കാരൻ പാമ്പ് കടിയേറ്റ് മരിച്ചു. ശാസ്താവട്ടം, റുബീന മൻസിലിൽ ഷാഹുൽ ഹമീദിന്റെ മകൻ സക്കീർ ഹുസൈൻ (30) ആണ് മരിച്ചത്. ഇന്നലെ രാത്രി 8.30 നായിരുന്നു സംഭവം.

നാവായിക്കുളം ഇരുപത്തെട്ടാംമൈൽ കാഞ്ഞിരംവിളയിൽ 5 വയസ്സുയുള്ള മൂർഖനെ പിടികൂടുന്നതിനിടയിലാണ് കൈയ്യിൽ കടിയേറ്റത്. തുടർന്ന് അവശനായ സക്കീറിൻ്റെ വായിൽ നിന്ന് നുരയും പതയും വരുകയും ഉടൻ തന്നെ നാട്ടുകാർ പാരിപ്പള്ളി മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കൈയ്യിൽ നിന്ന് രക്ഷപ്പെട്ട പാമ്പിനെ വാവ സുരേഷ് എത്തി പിടികൂടി.