കൊച്ചി: സിസ്റ്റര് ലൂസി കളപ്പുരയുടെ ആത്മകഥയായ ‘കര്ത്താവിന്റെ നാമത്തില്’ പുസ്തക പ്രകാശനം എറണാകുളം പ്രസ് ക്ലബ്ബില് വെച്ച് ഇന്ന് നടക്കും. സിസ്റ്റര് ലൂസി കളപ്പുരയുടെ സഭാ ജീവിതം വിവരിക്കുന്ന പുസ്തകത്തിലെ ഉള്ളടക്കം നേരത്തെ തന്നെ വിവാദമായിരുന്നു. സാറാ ജോസഫ്, ബെന്യാമിന്, സന്തോഷ് ഏച്ചിക്കാനം തുടങ്ങിയവര് ചടങ്ങില് പങ്കെടുക്കും.
മഠങ്ങളില് സന്ദര്ശകരെന്ന വ്യാജേന എത്തി വൈദികര് ലൈംഗിക ചൂഷണം നടത്താറുണ്ടെന്നാണ് സിസ്റ്റര് ലൂസി കളപ്പുര തുറന്നുപറഞ്ഞത്. മഠത്തില് കഴിഞ്ഞിരുന്ന ഒരു കന്യാസ്ത്രീ പ്രസവിച്ചതായും ഇതില് ഉത്തരവാദിയായ വൈദികനെ സഭ സംരക്ഷിച്ചെന്നും സിസ്റ്റര് ആരോപിച്ചിട്ടുണ്ട്. കൊട്ടിയൂര് കേസിലെ പ്രതി ഫാദര് റോബിന് പല കന്യാസ്ത്രീകളുമായും ബന്ധമുണ്ടായിരുന്നുവെന്നും പുസ്തകത്തിലുണ്ട്. സന്യാസ ജീവിതം ആരംഭിച്ചതിന് ശേഷം നാല് തവണ വൈദികര് തന്നെ ലൈംഗികമായി പീഡിപ്പിക്കാന് ശ്രമിച്ചെന്ന് സിസ്റ്റര് ലൂസി പുസ്തകത്തില് വെളിപ്പെടുത്തുന്നുണ്ട്.
എഎംഐ സന്യാസിനി സഭാംഗമായ സിസ്റ്റര് ലിസിയ ജോസഫ് പുസ്തകത്തിന്റെ പ്രകാശനവും വിതരണവും തടയണമെന്നാവശ്യപ്പെട്ട് ഹൈക്കോടതിയെ സമീപിച്ചെങ്കിലും ഹര്ജി തള്ളിയിരുന്നു. പുസ്തകത്തിന്റെ ഉള്ളടക്കത്തെക്കുറിച്ച് ആക്ഷേപമുണ്ടെങ്കില് പൊലീസിനെ സമീപിക്കാമെന്നാണ് കോടതി നിര്ദ്ദേശിച്ചത്. പുസ്തകത്തിലെ പരാമര്ശങ്ങള് വൈദികര്ക്കും കന്യാസ്ത്രീകള്ക്കും മാനക്കേട് ഉണ്ടാക്കുന്നതാണെന്ന് ഹര്ജിയില് പറയുന്നു.ആത്മകഥയിലെ പരാമര്ശങ്ങളില് പ്രതിഷേധിച്ച് സിസ്റ്റര് ലിസി കഴിയുന്ന വയനാട്ടിലെ ആശ്രമത്തിലേക്ക് വിശ്വാസികള് മാര്ച്ച് നടത്തിയിരുന്നു.