ടോക്കിയോ: ഒളിമ്പിക്‌സ് ബോക്‌സിംഗില്‍ പുരുഷന്‍മാരുടെ 91 കിലോഗ്രാം വിഭാഗത്തില്‍ ഇന്ത്യയുടെ സതീഷ് കുമാര്‍ ക്വാര്‍ട്ടറില്‍. ജമൈക്കയുടെ റിക്കാര്‍ഡോ ബ്രൗണിനെ തകര്‍ത്താണ് (4-1) സതീഷിന്റെ നേട്ടം. ക്വാര്‍ട്ടറില്‍ വിജയിച്ചാല്‍ സതീഷിന് മെഡല്‍ ഉറപ്പിക്കാം.
അമ്പെയ്ത്തില്‍ ഇന്ത്യയുടെ അതാനു ദാസും ക്വാര്‍ട്ടറില്‍ പ്രവേശിച്ചു. രണ്ടുതവണ ഒളിമ്പിക്‌സ് ചാമ്പ്യനായ ജിന്‍ ഹ്യെകിനെ തോല്‍പ്പിച്ചാണ് മുന്നേറ്റം. 6-5നാണ് അതാനു ദാസിന്റെ വിജയം.
ഇന്ത്യയുടെ മെഡല്‍ സ്വപ്നങ്ങള്‍ക്കു ചിറകു നല്‍കി ബാഡ്മിന്റണ്‍ വനിതാ സിംഗിള്‍സില്‍ പി.വി. സിന്ധു ക്വാര്‍ട്ടറില്‍ പ്രവേശിച്ചു. ഡെന്‍മാര്‍ക്ക് താരം മിയ ബ്ലിക്‌ഫെല്‍ഡിനെയാണ് സിന്ധു തോല്‍പ്പിച്ചത്. സ്‌കോര്‍: 21-15, 21-13. രണ്ടു ഗെയിമിലും ഇന്ത്യന്‍ താരത്തിന് വെല്ലുവിളി ഉയര്‍ത്താന്‍ മിയക്ക് സാധിച്ചില്ല.
പുരുഷ ഹോക്കിയില്‍ ഇന്ത്യ തകര്‍പ്പന്‍ പ്രകടനമാണ് കാഴ്ചവെച്ചത്. നിലവിലെ ജേതാക്കളായ അര്‍ജന്റീനയെ ഒന്നിനെതിരേ മൂന്നു ഗോളുകള്‍ക്ക് തകര്‍ത്തത് ഇന്ത്യന്‍ പുരുഷ ടീം ക്വാര്‍ട്ടറില്‍ പ്രവേശിച്ചു. ഗോള്‍രഹിതമായ ആദ്യ രണ്ട് ക്വാര്‍ട്ടറുകള്‍ക്ക് ശേഷം 43-ാം മിനിറ്റില്‍ വരുണ്‍ കുമാറാണ് ഇന്ത്യയെ മുന്നിലെത്തിച്ചത്.
അഞ്ചു മിനിറ്റിന് ശേഷം പെനാല്‍റ്റി കോര്‍ണറിലൂടെ മൈക്കോ കാസെല്ല അര്‍ജന്റീനയെ ഒപ്പമെത്തിച്ചു.മത്സരം അവസാനിക്കാന്‍ മിനിറ്റുകള്‍ മാത്രം ബാക്കിനില്‍ക്കേ 58-ാം മിനിറ്റില്‍ വിവേക് സാഗര്‍ ഇന്ത്യയുടെ രണ്ടാം ഗോള്‍ നേടി.
അര്‍ജന്റീനയ്ക്ക് നിലയുറപ്പിക്കാന്‍ പോലും സമയം നല്‍കാതെ തൊട്ടടുത്ത മിനിറ്റില്‍ പെനാല്‍റ്റി കോര്‍ണര്‍ ലക്ഷ്യത്തിലെത്തിച്ച് ഹര്‍മന്‍പ്രീത് സിങ് ഇന്ത്യയുടെ ജയമുറപ്പിച്ചു.