ന്യൂഡൽഹി: ആവർത്തിച്ച് ഹർജികൾ സമർപ്പിക്കുന്നുവെന്ന് ആരോപിച്ച് ഐപിഎസ് മുൻ ഓഫീസർ സഞ്ജീവ് ഭട്ടിന് സുപ്രീം കോടതി മൂന്നുലക്ഷം രൂപ പിഴ ചുമത്തി. വിചാരണക്കോടതികൾക്കെതിരെ ആവർത്തിച്ച് ഹർജി സമർപ്പിക്കുന്നുവെന്ന് ചൂണ്ടിക്കാട്ടിയാണ് നടപടി.
സഞ്ജീവ് ഭട്ട് സമർപ്പിച്ച മൂന്ന് ഹർജികൾ തള്ളിക്കൊണ്ടായിരുന്നു നടപടി. ഹർജിക്കാരൻ ആവർത്തിച്ച് കോടതിയെ സമീപിക്കുന്നുണ്ടെന്ന് ജസ്റ്റിസ് വിക്രം നാഥ്, രാജേഷ് ബിന്ദൽ എന്നിവരടങ്ങിയ ബെഞ്ച് നിരീക്ഷിച്ചു. പിഴത്തുകയായ മൂന്നുലക്ഷം രൂപ ഗുജറാത്ത് ഹൈക്കോടതി അഡ്വക്കേറ്റ്‌സ് അസോസിയേഷനിൽ കെട്ടിവെക്കാനാണ് കോടതി നിർദേശം.
മൂന്ന് ഹർജികളുമായിട്ടാണ് സഞ്ജീവ് ഭട്ട് കോടതിയെ സമീപിച്ചത്. നിലവിലെ ജഡ്ജി പക്ഷപാതം കാണിക്കുന്നതിനാൽ വിചാരണ മുതിർന്ന അഡീഷണൽ സെൻഷൻ ജഡ്ജി ബനസ്കന്തയുടെ കോടതിയിലേക്ക് മാറ്റണം, കോടതി നടപടികൾ ഓഡിയോ – വീഡിയോ റെക്കോർഡ് ചെയ്യണം, കേസിൽ കൂടുതൽ തെളിവുകൾ ഹാജരാക്കണം എന്നീ മൂന്ന് ആവശ്യങ്ങളാണ് സഞ്ജീവ് ഭട്ട് ഉന്നയിച്ചത്.
മയക്കുമരുന്നുമായി ബന്ധപ്പെട്ട കേസിൽ സഞ്ജീവ് ഭട്ട് സമർപ്പിച്ച ഹർജി സുപ്രീം കോടതി തള്ളുകയും 10,000 രൂപ പിഴ ചുമത്തുകയും ചെയ്തിരുന്നു. മയക്കുമരുന്ന് കേസിൽ നിശ്ചിത സമയത്തിനുള്ളിൽ വിചാരണ പൂർത്തിയാക്കാനുള്ള നിർദ്ദേശം പുറപ്പെടുവിച്ച ഗുജറാത്ത് ഹൈക്കോടതി ഉത്തരവിനെ ഭട്ട് ചോദ്യം ചെയ്തിരുന്നു. കേസിൽ മാർച്ച് 31ന് മുൻപ് വിചാരണ പൂർത്തിയാക്കണമെന്നായിരുന്നു ഹൈക്കോടതി വ്യക്തമാക്കിയത്. മയക്കുമരുന്ന് കേസിൽ വ്യാജ തെളിവുണ്ടാക്കാൻ ശ്രമം നടത്തിയെന്നാണ് ഭട്ടിനെതിരായ കേസ്.
കേസിൽ അറുപത് സാക്ഷികളിൽ പതിനാറ് പേരുടെ വിസ്താരം മാത്രം പൂർത്തിയായ സാഹചര്യത്തിൽ സമയം നീട്ടി നൽകണമെന്നായിരുന്നു ഭട്ടിൻ്റെ ആവശ്യം. സമയം നീട്ടി നൽകുന്നത് നീതിയുക്തമായ വിചാരണ ലഭിക്കാൻ കാരണമാകുമെന്നായിരുന്നു ഭട്ടിൻ്റെ വിശദീകരണം. എന്നാൽ ഈ വാദം അനാവശ്യമാണെന്ന് വ്യക്തമാക്കിയാണ് കോടതി പിഴ ചുമത്തിയത്.
1990ലെ ഒരു കസ്റ്റഡി മരണക്കേസിൽ 2019 ജൂണിൽ ഗുജറാത്ത് ഞ്ജീവ് ഭട്ടിനെ ജീവപര്യന്തം തടവിന് ശിക്ഷിച്ചിരുന്നു. കസ്റ്റഡി മരണക്കേസിലെ ശിക്ഷയെ ചോദ്യം ചെയ്ത് ഗുജറാത്ത് ഹൈക്കോടതിയിൽ സമർപ്പിച്ച അപ്പീലിൽ കൂടുതൽ തെളിവുകൾ ഹാജരാക്കണമെന്ന് ആവശ്യപ്പെട്ട് സമർപ്പിച്ച ഹർജി സുപ്രീം കോടതി മെയ് പത്തിന് തള്ളിയിരുന്നു. ജസ്റ്റിസുമാരായ എംആർ ഷാ, സി ടി രവികുമാർ എന്നിവരടങ്ങിയ ബെഞ്ചാണ് സഞ്ജീവ് ഭട്ട് സമർപ്പിച്ച ഹർജി തള്ളിയത്.
