തിരുവനന്തപുരം: മലയാളികളുടെ പ്രിയങ്കരനായ കലാകാരൻ കൊല്ലം സുധിയുടെ അകാല വിയോഗത്തിന് ശേഷം മലയാളി മനസ്സിനെ വീണ്ടും നോവിക്കുന്ന വാർത്തയാണ് ഇപ്പോൾ പുറത്തുവരുന്നത്. തനിക്ക് കാൻസർ രോഗം ബാധിച്ച വിവരം സുധിയുടെ ഭാര്യ രേണു തന്നെയാണ് സോഷ്യൽ മീഡിയയിലൂടെ തുറന്നുപറഞ്ഞത്. രേണുവിന്റെ അസുഖ വിവരം അറിഞ്ഞ ഞെട്ടലിലാണ് ഇപ്പോൾ മലയാളികളും സിനിമാ-ടെലിവിഷൻ ലോകവും.
കഴിഞ്ഞ കുറച്ചു നാളുകളായി രേണുവിന്റെ ആരോഗ്യസ്ഥിതിയെക്കുറിച്ച് സോഷ്യൽ മീഡിയയിൽ നിരവധി അഭ്യൂഹങ്ങൾ പ്രചരിച്ചിരുന്നു. ഈ ചർച്ചകൾക്കെല്ലാം വിരാമമിട്ടുകൊണ്ടാണ് താൻ നേരിടുന്ന വലിയൊരു പ്രതിസന്ധിയെക്കുറിച്ച് അവർ വ്യക്തമാക്കിയത്. രോഗവിവരം പുറത്തുവന്നതോടെ മുൻപ് രേണുവിനെ സോഷ്യൽ മീഡിയയിൽ കടുത്ത ഭാഷയിൽ കുറ്റപ്പെടുത്തിയവർ പോലും ഇപ്പോൾ വലിയ വിഷമത്തിലും പശ്ചാത്താപത്തിലുമാണ്.
കഴിഞ്ഞ രണ്ട് വർഷത്തിനുള്ളിൽ രേണുവിന് നേരിടേണ്ടി വന്ന സൈബർ അധിക്ഷേപങ്ങളും വ്യക്തിഹത്യകളും ചെറുതല്ലായിരുന്നു. ഭർത്താവ് കൊല്ലം സുധിയുടെ പെട്ടെന്നുള്ള മരണം രേണുവിനെയും കുടുംബത്തെയും വലിയ സാമ്പത്തിക-മാനസിക തകർച്ചയിലേക്കാണ് തള്ളിവിട്ടത്. ആ സാഹചര്യത്തിലാണ് ജീവിതം വഴിമുട്ടാതിരിക്കാൻ ഫോട്ടോഷൂട്ടുകളും ആൽബങ്ങളുമായി രേണു വീണ്ടും ലൈം ലൈറ്റിൽ സജീവമാകാൻ തീരുമാനിച്ചത്.
തന്റെ കുട്ടികളുടെ ഭാവി സുരക്ഷിതമാക്കാനും സാമ്പത്തിക അരക്ഷിതാവസ്ഥയിൽ നിന്നും കുടുംബത്തെ പതിയെ കരകയറ്റാനുമുള്ള ഒരു സാധാരണക്കാരിയായ അമ്മയുടെ പോരാട്ടമായിരുന്നു അത്. കഠിനാധ്വാനത്തിലൂടെ അവർ പ്രതിസന്ധികളെ മറികടക്കാൻ ശ്രമിച്ചെങ്കിലും, നിർഭാഗ്യവശാൽ സോഷ്യൽ മീഡിയയിലെ ഒരു വിഭാഗത്തിന് ഇത് ഉൾക്കൊള്ളാൻ കഴിഞ്ഞിരുന്നില്ല.
രേണുവിന്റെ വളർച്ചയെയും അതിജീവനത്തെയും മോശം രീതിയിൽ ചിത്രീകരിക്കാനാണ് ചില റിയാക്ഷൻ വ്ലോഗർമാരും സൈബർ ഗ്രൂപ്പുകളും ശ്രമിച്ചത്. ദിനംപ്രതി എന്നോണം രേണുവിനെ വേട്ടയാടുകയും അവരുടെ വ്യക്തിജീവിതത്തെക്കുറിച്ച് അനാവശ്യ കഥകൾ മെനഞ്ഞുണ്ടാക്കി പ്രചരിപ്പിക്കുകയും ചെയ്തു. രേണുവിന്റെ കഴിഞ്ഞകാല ജീവിതത്തിലെ സംഭവങ്ങൾ പോലും വീണ്ടും വലിച്ചിഴച്ച് ചർച്ചയാക്കി റേറ്റിംഗ് കൂട്ടാനായിരുന്നു ഇവരുടെ ശ്രമം.
യുട്യൂബ് സബ്സ്ക്രിപ്ഷൻ വീഡിയോകളുടെ പേരിലും മോശം ഭാഷ ഉപയോഗിച്ച് വലിയ തോതിലുള്ള സൈബർ ആക്രമണമാണ് രേണുവിനെതിരെ അഴിച്ചുവിട്ടത്. സമൂഹത്തിൽ വലിയ സ്വാധീനമുള്ള ചില പ്രമുഖർ പോലും യാഥാർത്ഥ്യം മനസ്സിലാക്കാതെ രേണുവിനെതിരെ പരസ്യമായി രംഗത്തുവന്നിരുന്നു. എന്നാൽ, തനിക്കെതിരെ ഉയർന്ന കടുത്ത അധിക്ഷേപങ്ങളെയും പരിഹാസങ്ങളെയും അസാധാരണമായ മനക്കരുത്തോടെ നേരിട്ടാണ് രേണു മുന്നോട്ട് പോയത്.
എന്നാൽ ഇന്ന് കാൻസർ എന്ന മാരക രോഗത്തോട് രേണു പോരാടുകയാണെന്ന വാർത്ത പുറത്തുവന്നതോടെ സോഷ്യൽ മീഡിയയുടെ പ്രതികരണത്തിന്റെ സ്വഭാവം ആകെ മാറിയിരിക്കുകയാണ്. മുൻപ് രേണുവിനെ ക്രൂരമായി വിമർശിച്ചവർ പോലും ഇപ്പോൾ അവർക്ക് അനുകൂലമായും പിന്തുണയുമായും സംസാരിക്കാൻ തുടങ്ങിയിരിക്കുന്നു. രേണുവിനും കുടുംബത്തിനുമുണ്ടായ അപമാനത്തിലും മാനസിക വിഷമത്തിലും വ്ലോഗർമാർ വഹിച്ച പങ്ക് വളരെ വലുതാണെന്ന തിരിച്ചറിവ് ഇപ്പോൾ പലർക്കുമുണ്ടായിട്ടുണ്ട്.
രേണുവിന് പിന്തുണ പ്രഖ്യാപിച്ചുകൊണ്ട് പതിനായിരക്കണക്കിന് കമന്റുകളാണ് ഇപ്പോൾ സോഷ്യൽ മീഡിയ പ്ലാറ്റ്ഫോമുകളിൽ വരുന്നത്. ഒരിക്കൽ പോലും അവരെ അനാവശ്യമായി കുറ്റപ്പെടുത്തിയിട്ടില്ല എന്നതിൽ ആശ്വാസം കണ്ടെത്തുന്നവരും, അവർ ജീവിതത്തിൽ കൂടുതൽ ഉയരങ്ങളിൽ എത്തണമെന്ന് ആഗ്രഹിച്ചിരുന്നവരുമാണ് ഭൂരിഭാഗവും. ഈ വലിയ പ്രതിസന്ധിയെയും അതിജീവിച്ച് അവർ നല്ല നിലയിൽ തിരിച്ചെത്തട്ടേ എന്നാണ് ആരാധകരുടെ പ്രാർത്ഥന.
പ്രത്യാശ നൽകുന്ന നിരവധി അനുഭവസ്ഥരുടെ വാക്കുകളും ഇതിനോടകം ശ്രദ്ധേയമായിട്ടുണ്ട്. “ഞാനും ഒരു കാൻസർ സർവൈവർ ആണ്, രോഗത്തിന്റെ രണ്ടാം ഘട്ടത്തിലായിരുന്നു (Second Stage) ഞാൻ. കൃത്യമായ ചികിത്സയിലൂടെ ഇപ്പോൾ എനിക്ക് യാതൊരു കുഴപ്പവുമില്ല. അതുപോലെ രേണുവിനും എല്ലാം ശരിയാകും, നിങ്ങളുടെ കൂടെ എല്ലാവരുടെയും പ്രാർത്ഥനയുണ്ട്, നീ ഒരിക്കലും തളരരുത്, ശക്തമായി തന്നെ ഇരിക്കണം,” എന്നാണ് ഒരു യുവതി കുറിച്ചത്.
രേണുവിന്റെ മാനസിക കരുത്തിനെ ഓർത്ത് തങ്ങൾക്ക് അഭിമാനമുണ്ടെന്നാണ് സോഷ്യൽ മീഡിയ ഒന്നടങ്കം പറയുന്നത്. “പരിഹസിച്ചവരും വേദനിപ്പിച്ചവരും എല്ലാവരും ഓർക്കുക, ഇത്രയേ ഉള്ളൂ മനുഷ്യൻ; ആരെയും മനഃപൂർവ്വം വേദനിപ്പിക്കാതിരിക്കുക, സഹായിച്ചില്ലെങ്കിലും ഉപദ്രവിക്കരുത്,” എന്നുള്ള ഉപദേശങ്ങളും കമന്റുകളായി വരുന്നുണ്ട്. രോഗാവസ്ഥയിലും തളരാത്ത മനക്കരുത്തോടെ നിൽക്കുന്ന രേണുവിന് ദൈവത്തിന്റെ തുണയുണ്ടാകട്ടെ എന്നും എത്രയും വേഗം സുഖം പ്രാപിക്കട്ടെ എന്നുമാണ് കേരളക്കര ഒന്നടങ്കം ആശംസിക്കുന്നത്.
അതേസമയം, കഴിഞ്ഞ ദിവസമാണ് തനിക്ക് കാൻസർ ആണെന്ന വിവരം ബിഗ് ബോസ് മുൻ താരവും സോഷ്യൽ മീഡിയ ഇൻഫ്ലുവൻസറുമായ രേണു സുധി പങ്കുവെച്ചത്. രോഗം മൂന്നാം ഘട്ടത്തിന്റെ അവസാനത്തിലാണെന്നും ഉടൻ തന്നെ കീമോതെറാപ്പി ആരംഭിക്കുമെന്നും രേണു സുധി തന്നെയാണ് ആദ്യമായി തുറന്നുപറഞ്ഞത്. കഴിഞ്ഞ കുറച്ചു ദിവസങ്ങളായി രേണുവിന് ഗുരുതരമായ രോഗമാണെന്ന തരത്തിൽ സോഷ്യൽ മീഡിയയിൽ പ്രചരണങ്ങൾ നടന്നിരുന്നു. തുടക്കത്തിൽ ഇത് നിഷേധിച്ചിരുന്നെങ്കിലും, രോഗവിവരം വാസ്തവമാണെന്ന് കാണിച്ച് കേരള ഹോം ഡിസൈൻ ഗ്രൂപ്പ് സ്ഥാപകൻ ഫിറോസ് കഴിഞ്ഞ ദിവസം രംഗത്തെത്തിയിരുന്നു. ഇതിന് പിന്നാലെയാണ് ഒരു യൂട്യൂബ് ചാനലിന് നൽകിയ അഭിമുഖത്തിൽ താരം മനസ്സ് തുറന്നത്.
തനിക്ക് രോഗം ബാധിച്ചതിനെക്കുറിച്ചും അത് മറച്ചുവെച്ചതിനെക്കുറിച്ചും രേണു സുധി പറയുന്നത് ഇങ്ങനെ: “എനിക്ക് കാൻസർ ആണ്. ഇത്രയും ദിവസം എന്നെ സ്നേഹിക്കുന്നവരിൽ നിന്ന് ഞാനിത് മറച്ചുവെച്ചു. പലരും കരുതുന്നത് ദുബായിൽ വെച്ചാണ് ഇത് സ്ഥിരീകരിച്ചത് എന്നാണ്, എന്നാൽ അങ്ങനെയല്ല. എനിക്ക് 15 വയസ്സുള്ളപ്പോഴാണ് ആദ്യമായി ബ്രെസ്റ്റിൽ ഒരു മുഴ ശ്രദ്ധയിൽ പെടുന്നത്. വേദനയില്ലാതിരുന്നതിനാൽ അന്ന് ഞാനത് കാര്യമാക്കിയില്ല, വീട്ടുകാരോടും പറഞ്ഞില്ല. പിന്നീട് ഡിപ്ലോമയ്ക്ക് പഠിക്കുമ്പോഴാണ് വീട്ടുകാർ ഇതറിയുന്നത്. അവർ കോട്ടയം മെഡിക്കൽ കോളേജിൽ കൊണ്ടുപോയി ബയോപ്സി ചെയ്തു. അന്ന് ഡോക്ടർ പറഞ്ഞത്, ഇപ്പോൾ പ്രശ്നമില്ലെങ്കിലും ഭാവിയിൽ ഇത് കാൻസർ ആകാൻ സാധ്യതയുണ്ടെന്നാണ്. എന്നാൽ ആ സമയത്ത് എനിക്ക് അപ്പൻഡിസൈറ്റിസ് ഓപ്പറേഷൻ കഴിഞ്ഞു നിൽക്കുകയായിരുന്നു. ആ വേദനയുടെ പേടി കാരണം പിന്നീട് ഞാൻ ശസ്ത്രക്രിയയ്ക്ക് മുതിർന്നില്ല, വീട്ടുകാരോട് ഒന്നും പറഞ്ഞതുമില്ല.”
തന്റെ കുറച്ച് സുഹൃത്തുക്കൾക്കും മാനേജർക്കും വീട്ടുകാർക്കും കസിൻസിനും മാത്രം അറിയാവുന്ന കാര്യമാണ് ഇപ്പോൾ എല്ലാവരുമായി പങ്കുവെക്കുന്നതെന്ന് രേണു പറഞ്ഞു. മുന്നോട്ട് ജീവിക്കണം എന്ന ഒറ്റ ചിന്ത മാത്രമാണ് ഇപ്പോൾ തനിയെ നയിക്കുന്നത്. ശരീരത്തിൽ വേദനയില്ലാത്ത മുഴകൾ കണ്ടാൽ പെൺകുട്ടികൾ അത് ഒട്ടും നിസ്സാരമായി കാണരുതെന്നും, വേദനയില്ലല്ലോ എന്ന് കരുതി വെച്ചുകൊണ്ടിരിക്കാതെ എത്രയും വേഗം ഡോക്ടറെ കണ്ട് പരിശോധിക്കണമെന്നും രേണു സുധി ഓർമ്മിപ്പിച്ചു.