ചെന്നൈ: പ്രശസ്ത തെന്നിന്ത്യൻ ചലച്ചിത്ര സംവിധായകനും നടനുമായ കെ. ഭാഗ്യരാജിന്റെ നിര്യാണത്തെത്തുടർന്ന് ചെന്നൈയിലെ അദ്ദേഹത്തിന്റെ വസതിയിൽ അന്ത്യാഞ്ജലി അർപ്പിക്കാൻ സിനിമാ-രാഷ്ട്രീയ മേഖലകളിൽ നിന്നുള്ള പ്രമുഖർ ഉൾപ്പെടെ വൻ ജനസഞ്ചയം എത്തിച്ചേർന്നു. ഹൃദയാഘാതത്തെ തുടർന്ന് ചെന്നൈയിലെ അപ്പോളോ ആശുപത്രിയിലായിരുന്നു അദ്ദേഹത്തിന്റെ അന്ത്യം.
പ്രിയ സംവിധായകനെ അവസാനമായി ഒരുനോക്ക് കാണാൻ വൻ ജനക്കൂട്ടം തടിച്ചുകൂടിയതിനൊപ്പം ദൃശ്യമാധ്യമങ്ങളുടെ അതിരുകടന്ന മത്സരവും വസതിക്ക് മുന്നിൽ കടുത്ത അസ്വസ്ഥതയ്ക്ക് കാരണമായി.
കെ. ഭാഗ്യരാജിന്റെ ഭൗതികശരീരം ആശുപത്രിയിൽ നിന്നും ആംബുലൻസിൽ വസതിയിൽ എത്തിച്ചപ്പോഴായിരുന്നു നാടകീയ രംഗങ്ങൾ അരങ്ങേറിയത്. ആംബുലൻസിന്റെ വാതിൽ തുറന്ന് മൃതദേഹം പുറത്തെടുക്കാൻ പോലും സാധിക്കാത്ത വിധം ദൃശ്യമാധ്യമപ്രവർത്തകർ ക്യാമറകളുമായി വാഹനത്തിന് ചുറ്റും തടിച്ചുകൂടുകയായിരുന്നു. ഏറെ നേരം ശ്രമിച്ചിട്ടും വണ്ടിയിൽ നിന്നും മൃതദേഹം പുറത്തിറക്കാൻ കഴിയാതെ വന്നതോടെ, ആംബുലൻസിൽ ഉണ്ടായിരുന്ന പ്രശസ്ത നടി രാധിക ശരത്കുമാർ കടുത്ത മാനസിക വിഷമത്തോടെയും രോഷത്തോടെയും മാധ്യമങ്ങൾക്ക് മുന്നിൽ കൈകൂപ്പി രംഗത്തെത്തി.
“സിനിമയാണ് ഞങ്ങളുടെ ജീവിതം, എന്നാൽ ഞങ്ങളുടെ വ്യക്തിജീവിതം വ്യത്യസ്തമാണ്. നിങ്ങൾക്ക് ടി.ആർ.പി. (TRP) മാത്രമാണ് വേണ്ടതെങ്കിൽ ഞങ്ങൾ നിങ്ങൾക്കായി സിനിമകളിൽ അഭിനയിച്ചു തരാം. ദയവായി ഈയൊരു സാഹചര്യത്തിലെങ്കിലും ഞങ്ങൾക്ക് കുറച്ച് സ്വകാര്യത തരൂ,” എന്ന് രാധിക കണ്ണീരോടെ മാധ്യമങ്ങളോട് ആവശ്യപ്പെട്ടു. രാധികയുടെ ശക്തമായ പ്രതികരണത്തെ തുടർന്ന് മാധ്യമപ്രവർത്തകർ അല്പം പിന്നോട്ട് മാറുകയും തുടന്ന് ഭൗതികശരീരം വസതിക്കുള്ളിലേക്ക് മാറ്റുകയുമായിരുന്നു.
സംഭവത്തിന്റെ വീഡിയോ ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെ മാധ്യമങ്ങളുടെ ഇത്തരം അതിപ്രസരത്തിനെതിരെ പൊതുജനങ്ങൾക്കിടയിൽ നിന്നും സിനിമാ രംഗത്തുനിന്നും കടുത്ത വിമർശനമാണ് ഉയരുന്നത്. മരണവീടുകളിലും സംസ്കാര ചടങ്ങുകളിലും പാലിക്കേണ്ട അടിസ്ഥാനപരമായ മര്യാദകൾ പോലും മാധ്യമങ്ങൾ മറക്കുന്നുവെന്നാണ് ഉയർന്നുവരുന്ന പ്രധാന ആക്ഷേപം.
സിനിമക്കാരാണെങ്കിലും ഇത്തരം ദുരന്ത സമയങ്ങളിൽ അവർ അനുഭവിക്കുന്ന മാനസികാവസ്ഥയെ മാനിക്കണമെന്നും കഴുകന്മാരെപ്പോലെയുള്ള ഇത്തരം പെരുമാറ്റങ്ങൾ അവസാനിപ്പിക്കണമെന്നും സോഷ്യൽ മീഡിയയിൽ കമന്റുകൾ നിറയുകയാണ്. സംസ്കാര ചടങ്ങുകളിൽ മാധ്യമങ്ങൾക്ക് കർശന നിയന്ത്രണം ഏർപ്പെടുത്തുമെന്ന് സൗത്ത് ഇന്ത്യൻ ആർട്ടിസ്റ്റ് അസോസിയേഷൻ (ഫിലിം ചേമ്പർ) നേരത്തെ വ്യക്തമാക്കിയിരുന്നെങ്കിലും, റേറ്റിംഗിന് വേണ്ടി ചില മാധ്യമങ്ങൾ ഇത് പൂർണ്ണമായി അവഗണിക്കുകയാണെന്നും ഇതിനെതിരെ ശക്തമായ നടപടി വേണമെന്നും ആവശ്യമുയരുന്നുണ്ട്.
English SummaryFollowing the demise of veteran Tamil actor-director K. Bhagyaraj, a major controversy erupted at his residence when media crews heavily crowded the ambulance, leaving no space to bring out his mortal remains. Visibly shattered, actress Radikaa Sarathkumar stepped in and with folded hands, emotionally pleaded with the media for privacy, slamming the rush for TRPs. A video of her breaking down and questioning the media madness has gone viral, sparking intense debates on social media regarding media ethics during celebrity funerals.