‘പ്ലാസ്മാ തെറാപ്പി’ ഫലപ്രദമല്ല, കൊവിഡ് ചികിത്സയിൽ നിന്ന് പിൻവലിച്ചേക്കും

ന്യൂഡൽഹി:കോവിഡിന് ‘പ്ലാസ്മാ തെറാപ്പി’ ഫലപ്രദമല്ലെന്ന് വിലയിരുത്തൽ. നേരത്തേ രോഗം ഭേദമായവരുടെ പ്ലാസ്മയാണ് ഗുരുതരാവസ്ഥയിലുള്ള രോഗികൾക്ക് നൽകിയിരുന്നത്. എന്നാൽ, രോഗം കുറയാനോ മരണം തടയാനോ ഇത് ഫലപ്രദമാവുന്നില്ലെന്ന് ഐ.സി.എം.ആറിന്റെ വിദഗ്ധസമിതി വിലയിരുത്തി.

അതിനാൽ നിലവിലെ ചികിത്സാപദ്ധതിയിൽനിന്ന് പ്ലാസ്മാ തെറാപ്പി പിൻവലിച്ചേക്കും. പ്ലാസ്മാചികിത്സ ഒഴിവാക്കിക്കൊണ്ടുള്ള പുതിയ മാർഗരേഖ ഏതാനും ദിവസങ്ങൾക്കകം പുറത്തിറക്കുമെന്നാണ് സൂചന.

അശാസ്ത്രീയവും യുക്തിരഹിതവുമായി പ്ലാസ്മാ തെറാപ്പി നടത്തുന്നതിനെതിരേ ചില ഡോക്ടർമാരും ശാസ്ത്രജ്ഞരും പ്രധാനമന്ത്രിയുടെ മുഖ്യ ശാസ്ത്ര ഉപദേഷ്ടാവ് കെ. വിജയരാഘവനും ഐ.സി.എം.ആറിനും എയിംസ് ഡയറക്ടർക്കും കത്തെഴുതിയിരുന്നു.