തിരുവനന്തപുരം: ആർഎസ്എസ് പരിപാടിയിൽ പങ്കെടുത്തിട്ടില്ലെന്നും വിവേകാനന്ദനെ സംബന്ധിച്ച പി.പരമേശ്വരന്റെ പുസ്തകം പ്രകാശം ചെയ്ത പരിപാടിയിലാണ് പങ്കെടുത്തതെന്നും പ്രതിപക്ഷ നേതാവ് വി.ഡി.സതീശൻ. ആർഎസ്എസ് വേദി പങ്കിട്ടെന്ന ആരോപണം സംബന്ധിച്ചു പ്രതികരിക്കുകയായിരുന്നു പ്രതിപക്ഷ നേതാവ്.
എം.പി.വീരേന്ദ്രകുമാറാണ് പരിപാടിയിലേക്കു തന്റെ പേരു നിർദേശിച്ചതെന്നു വി.ഡി.സതീശൻ പറഞ്ഞു. പുസ്തകം തിരുവനന്തപുരത്തും തൃശൂരും പ്രകാശനം ചെയ്തിരുന്നു. പ്രതിപക്ഷനേതാവായിരുന്ന വി.എസ്. അച്യുതാനന്ദനാണ് തിരുവനന്തപുരത്ത് പുസ്തകം റിലീസ് ചെയ്തത്. അതേ പുസ്തകമാണ് താൻ തൃശൂരിൽ റിലീസ് ചെയ്തത്. വിവേകാനന്ദൻ ഹിന്ദുവിനെക്കുറിച്ചു പറഞ്ഞതും സംഘപരിവാറിന്റെ ഹിന്ദുത്വയും രണ്ടാണെന്നാണ് ചടങ്ങിൽ പറഞ്ഞത്.
ആർഎസ്എസ് വേദി പങ്കിട്ടെന്ന സിപിഎം ആരോപണം വി.എസ്.അച്യുതാനന്ദനും ബാധകമാണെന്നു വി.ഡി.സതീശൻ പറഞ്ഞു. ബിജെപി പുറത്തുവിട്ട ഫോട്ടോയ്ക്ക് ഏറ്റവും പ്രചാരം നൽകുന്നത് സിപിഎമ്മാണ്. ഗോൾവൾക്കറുടെ പുസ്തകത്തിൽ പറഞ്ഞ കാര്യമാണ് മുൻ മന്ത്രി സജി ചെറിയാൻ പറഞ്ഞതെന്ന വാദത്തിൽ ഉറച്ചുനിൽക്കുന്നു. ഇതു സംബന്ധിച്ച് ആർഎസ്എസ് അയച്ച നോട്ടിസ് നിയമപരമായി നേരിടും. സജി ചെറിയാനെതിരെ താന് പറഞ്ഞ വാക്കുകളെ സിപിഎം ബിജെപി നേതാക്കൾ തള്ളിപ്പറഞ്ഞിട്ടില്ല. സജി ചെറിയാനും തന്റെ വാക്കുകളെ ഇതുവരെ നിഷേധിച്ചിട്ടില്ല. ആർഎസ്എസിനെ ആക്രമിച്ചാൽ എങ്ങനെയാണ് ഹിന്ദുവിനെതിരെയുള്ള ആക്രമണം ആകുന്നതെന്നു വി.ഡി.സതീശൻ ചോദിച്ചു.
ഒരു വർഗീയ വാദിയുടെ മുന്നിലും കീഴടങ്ങില്ല. വർഗീയവാദികളുടെ വോട്ട് ഇതുവരെ ചോദിച്ചിട്ടില്ല. തന്റെ വീട്ടിലേക്കു കൂടുതൽ മാർച്ച് നടത്തിയത് സംഘപരിവാറാണ്. 2016ൽ തന്നെ തോൽപ്പിക്കാൻ പറവൂരിൽ ഹിന്ദു മഹാസംഗമം നടത്തിയെങ്കിലും ഭൂരിപക്ഷം വർധിക്കുകയാണ് ചെയ്തത്. വർഗീയ ശക്തികളെ ഇനിയും എതിർക്കും. രാഷ്ട്രീയം ഉപേക്ഷിക്കേണ്ടി വന്നാലും വർഗീയവാദികളുമായി സന്ധിചെയ്യില്ല. ഒരേ തോണിയിലാണ് സിപിഎമ്മിന്റെയും ബിജെപിയുടെയും യാത്ര.- വി.ഡി.സതീശൻ പറഞ്ഞു.