കൊച്ചി:പ്രശസ്ത ഗെയിം ഷോ ബിഗ് ബോസ് ആദ്യ സീസണ്‍ തരംഗമാവാന്‍ കാരണം അവതാരകയും നടിയുമായ പേളി മാണിയാണ്. സീരിയല്‍ നടന്‍ ശ്രീനിഷ് അരവിന്ദുമായിട്ടുള്ള പേളിയുടെ പ്രണയമായിരുന്നു ബിഗ് ബോസ് പ്രേക്ഷകര്‍ ഏറെ ചര്‍ച്ച ചെയ്തത്. മലയാളത്തില്‍ ആദ്യമായി ഉണ്ടായ സംഭവമായതിനാല്‍ ഇവരുടെ പ്രണയം നിരന്തരം വാര്‍ത്തകളില്‍ നിറഞ്ഞിരുന്നു.
ബിഗ് ബോസിന്റെ ഗെയിം തന്ത്രമാണ് ഇരുവരുടെയും പ്രണയമെന്ന് പറഞ്ഞവരുണ്ടെങ്കിലും വിവാഹത്തിലൂടെ അതിനുള്ള ചുട്ടമറുപടി താരങ്ങള്‍ കൊടുത്തു. ഒടുവിലാത തങ്ങളുടെ കുടുംബത്തിലേക്ക് പുതിയൊരു അതിഥി വരുന്ന സന്തോഷവിവരം പങ്കുവെച്ചിരിക്കുകയാണ് പേളി. ഇന്‍സ്റ്റാഗ്രാമിലൂടെ പങ്കുവെച്ച വീഡിയോയിലാണ് ആരാധകര്‍ കാത്തിരുന്ന സന്തോഷ വാര്‍ത്ത പേളി പറഞ്ഞത്.
കുഞ്ഞ് വയറ് കാണിച്ച് കൊണ്ടുള്ള ഒരു സെല്‍ഫി വീഡിയോ ആയിരുന്നു പേളി പോസ്റ്റ് ചെയ്തിരുന്നത്. ‘രണ്ട് വര്‍ഷം മുന്‍പ് ഈ ദിവസമാണ് ഞങ്ങള്‍ പ്രൊപ്പോസ് ചെയ്തത്. ഇന്ന് ദൈവാനുഗ്രഹം നിറഞ്ഞൊരു കാര്യം അവനിലൂടെ എന്റെയുള്ളില്‍ വളരുന്നു. ശ്രീനിഷ് നിന്നെ ഞാന്‍ സ്‌നേഹിക്കുന്നു’ എന്നായിരുന്നു വീഡിയോയ്ക്ക് പേളി ക്യാപ്ഷനിട്ടിരിക്കുന്നത്. അതിന് താഴെ പേളിയുടെ അടുത്ത സുഹൃത്തും അവതാരകനുമായ ഗോവിന്ദ് പത്മസൂര്യ, പ്രിയ പി വാര്യര്‍, ശില്‍പ ബാല, നീരവ്, സന മൊയ്തൂട്ടി തുടങ്ങിയ താരങ്ങളെല്ലാവരും ആശംസകള്‍ അറിയിച്ച് കമന്റുകളുമായി എത്തിയിരുന്നു
പേളിയ്‌ക്കൊപ്പമുള്ള സന്തോഷ നിമിഷം പങ്കുവെച്ച് ശ്രീനിഷും എത്തിയിരുന്നു. അവള്‍ക്ക് സണ്‍സെറ്റ് കാണണമെന്ന് ആഗ്രഹം പറഞ്ഞു. എന്ന് സൂചിപ്പിച്ച് കൊണ്ട് പേളി സണ്‍സെറ്റ് കാണുന്ന വീഡിയോയും പ്രിയതമയെ ചേര്‍ത്ത് നിര്‍ത്തി നിറവയറ് കാണുന്ന വിധത്തിലുള്ള വീഡിയോ ആയിരുന്നു ശ്രീനിഷ് ഇന്‍സ്റ്റാഗ്രാമിലൂടെ സ്റ്റോറിയായി കൊടുത്തത്. സന്തോഷവിവരം പുറത്ത് വന്നതോടെ എല്ലാവരും ആശംസകള്‍ അറിയിച്ച് എത്തിയിരിക്കുകയാണ്.
2018 ജൂണിലായിരുന്നു ബിഗ് ബോസ് ഒന്നാം സീസണ്‍ ആരംഭിക്കുന്നത്. ഷോ യില്‍ എത്തിയതിന് ശേഷമായിരുന്നു പേളിയും ശ്രീനിഷും അടുത്ത് പരിചയപ്പെടുത്തുന്നതും ഇഷ്ടത്തിലാവുന്നത്. ആദ്യ ദിവസങ്ങളില്‍ സൗഹൃദത്തില്‍ തുടങ്ങി പിന്നീട് ഹൗസിനുള്ളിലെ എല്ലാവരും പ്രണയമാണെന്ന് ഗോസിപ്പ് പറഞ്ഞതോടെയാണ് ഇരുവരും അതേ കുറിച്ച് ചിന്തിക്കുന്നത്. പിന്നീട് ഇഷ്ടമാണെന്ന് തുറന്ന് പറഞ്ഞു. ബിഗ് ബോസിനുള്ളില്‍ നിന്നും പ്രണയം പറഞ്ഞ ദിവസം ഇന്നാണെന്ന് സൂചിപ്പിച്ച് കൊണ്ടാണ് പുതിയ വിശേഷം ഇരുവരും പുറത്ത് വിട്ടത്.
2019 മേയ് അഞ്ചിനും എട്ടിനുമായിരുന്നു പേളി-ശ്രീനിഷ് വിവാഹം നടക്കുന്നത്. ക്രിസ്ത്യന്‍, ഹിന്ദു ആചാരപ്രകാരം രണ്ട് ദിവസങ്ങളിലായി നടത്തിയ താരവിവാഹം വലിയ ചര്‍ച്ചയായിരുന്നു. ഇക്കഴിഞ്ഞ മേയ് മാസം ഇരുവരും ആദ്യ വിവാഹവാര്‍ഷികം വലിയ ആഘോഷത്തോടെ നടത്തിയിരുന്നു. ഇനി താരപുത്രിയോ താരപുത്രനോ എന്നറിയാനുള്ള കാത്തിരിപ്പിലാണ് പേളിയുടെ ആരാധകര്‍.
