കോട്ടയം: പഞ്ചായത്ത് അംഗത്തെ മുന്‍ പഞ്ചായത്ത് അംഗത്തിന്റെ ഭര്‍ത്താവ് മര്‍ദിച്ചതായി പരാതി. മര്‍ദനമേറ്റ പഞ്ചായത്ത് അംഗം മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുകയാണ്. കോട്ടയം ആര്‍പ്പൂക്കരയിലാണ് സംഭവം.
പഞ്ചായത്ത് പത്താം വാര്‍ഡ് അംഗം സി.പിഐ.എമ്മിലെ പ്രിന്‍സ് മാത്യുവിനാണ് മര്‍ദനമേറ്റത്. ഇതേ വാര്‍ഡിലെ മുന്‍ മെമ്പറുടെ ഭര്‍ത്താവായ തെക്കേടം സജി മര്‍ദിച്ചെന്നാണ് ആരോപണം. പ്രദേശികതലത്തില്‍ ഉണ്ടായ വിഷയമാണ് തര്‍ക്കത്തിലേക്കെത്തിയത്. അങ്ങാടിപള്ളിക്ക് സമീപം റേഷന്‍കട നടത്തുകയാണ് സജി.
കടയോട് ചേര്‍ന്ന് ടാറിങ് സാധനങ്ങളും പ്ലാസ്റ്റിക് ഉല്‍പ്പന്നങ്ങളും ഉള്‍പ്പെടെ കത്തിക്കുന്നത് പതിവാണ്. ഇത് നാട്ടുകാര്‍ ചോദ്യം ചെയ്തതോടെ സജി അവരെ അസഭ്യം പറഞ്ഞുവെന്നാണ് ആരോപണം. ഇതറിഞ്ഞ് കാര്യം അന്വേഷിക്കാന്‍ സംഭവ സ്ഥലത്തെത്തിയ പ്രിന്‍സ് മാത്യുവിനെ സജി അസഭ്യം പറയുകയും ഇത് വാക്കേറ്റത്തിലേക്കെത്തുകയുമായിരുന്നു. തുടര്‍ന്ന് സജി വയറ്റിന് ചവിട്ടിയെന്നാണ് പരാതി. പ്രിന്‍സിനെ ഉടന്‍ മെഡിക്കല്‍ കോളേജില്‍ പ്രവേശിപ്പിക്കുകയായിരിന്നു.
