കൊച്ചി: സംസ്ഥാനത്തെ ഒമിക്രോണ് നിരീക്ഷണത്തില് വന് പാളിച്ച. കൊച്ചിയില് ഒമിക്രോണ് സ്ഥിരീകരിച്ച കോംഗോയില് നിന്നെത്തിയയാള് സ്വയം നിരീക്ഷണ നിര്ദേശം ലംഘിച്ചു കറങ്ങി നടന്നു. നിരീക്ഷണ സമയത്ത് ഹോട്ടലുകളിലും റസ്റ്ററന്റുകളിലുമാണ് ഇയാള് പോയത്.
കോങ്കോയില് നിന്ന് എറണാകുളത്ത് എത്തിയ ഒമിക്രോണ് സ്ഥിരീകരിച്ച വ്യക്തിയുടെ സമ്പര്ക്കപ്പട്ടി വിപുലമാണെന്ന് ആരോഗ്യ മന്ത്രി വീണാ ജോര്ജ് പറഞ്ഞു. എല്ലാ ജില്ലകളിലും ജാഗ്രതാ നിര്ദേശം നല്കിയിട്ടുണ്ട്. മാളുകളിലും ഹോട്ടലുകളിലും പോയി. കോങ്കൊ ഹൈ റിസ്ക് രാജ്യമായിരുന്നില്ലെന്നും മന്ത്രി പറഞ്ഞു. എറണാകുളത്ത് രോഗം സ്ഥിരീകരിച്ച ആളുകളെ റൂട്ട് മാപ്പ് തയ്യാറാക്കുമെന്നും ആരോഗ്യ മന്ത്രി അറിയിച്ചു. സമ്പര്ക്ക പട്ടികയിലുള്ളവര് ആരോഗ്യ വകുപ്പുമായി ബന്ധപ്പെടേണ്ടതാണ്. മന്ത്രിയുടെ നേതൃത്വത്തില് ചേര്ന്ന ഉന്നതതല യോഗത്തിലാണ് തീരുമാനം.
രോഗികള് കൂടുന്ന സാഹചര്യമുണ്ടായാല് ഐസൊലേഷന് വാര്ഡുകള് ജില്ലകള് സജ്ജമാക്കിയിട്ടുണ്ടെന്ന് ആരോഗ്യ മന്ത്രി അറിയിച്ചു. ആവശ്യമുള്ളവര്ക്ക് സ്വകാര്യ ആശുപത്രികളിലും ചികിത്സയില് കഴിയാവുന്നതാണ്. എയര്പോര്ട്ടിലും സീപോര്ട്ടിലും നിരീക്ഷണം ശക്തമാക്കി. ഇവിടെയെല്ലാം ലാബുകള് സജ്ജമാക്കിയിട്ടുണ്ടെന്നും ആരോഗ്യ മന്ത്രി പറഞ്ഞു.
കോങ്കോയില് നിന്ന് വന്ന വ്യക്തി സ്വം നിരീക്ഷണം ലംഘിച്ചുവെന്ന് ആരോഗ്യമന്ത്രി അറിയിച്ചു. സ്വയം നിരീക്ഷണത്തിലെ വ്യവസ്ഥകള് എല്ലാവരും കൃത്യമായി പാലിക്കണമെന്നും സാമൂഹിക ഇടപെടലുകള്, ആള്ക്കൂട്ടങ്ങളുള്ള സ്ഥലങ്ങള്, തീയറ്ററുകള്, മാളുകള് എന്നിവ സന്ദര്ശിക്കുന്നത് ഒഴിവാക്കണമെന്നും വീണാ ജോര്ജ് കൂട്ടിച്ചേര്ത്തു.
ഹൈ റിസ്ക് രാജ്യങ്ങളില് നിന്നും വരുന്നവരുടേയും മറ്റ് രാജ്യങ്ങളില് നിന്നും വരുന്നവരില് റാന്ഡം പരിശോധനയില് കൊവിഡ് പോസിറ്റീവാകുന്നവരുടേയും ഇവരുടെ സമ്പര്ക്കത്തില് വന്ന് കൊവിഡ് പോസിറ്റീവാകുന്നവരുടേയും സാമ്പിളുകള് ജനിതക പരിശോധനയ്ക്ക് അയക്കുന്നത് തുടരും. ഒമിക്രോണ് സാഹചര്യത്തില് കൂടുതല് സാമ്പിളുകള് ജനിതക പരിശോധനയ്ക്ക് അയക്കുന്നതാണ്. ക്ലസ്റ്ററുകള് രൂപപ്പെടുന്ന പ്രദേശങ്ങളിലെ കോവിഡ് പോസിറ്റീവ് സാമ്പിളുകളും ജനിതക പരിശോധനയ്ക്ക് അയയ്ക്കും.
എറണാകുളത്ത് യുകെയില് നിന്നും എത്തിയാള്ക്കാണ് ആദ്യം ഒമിക്രോണ് സ്ഥിരീകരിച്ചത്. അദ്ദേഹത്തിന്റെ സമ്പര്ക്കപ്പട്ടികയിലുള്ള ഭാര്യയ്ക്കും (38) ഭാര്യാ മാതാവിനും (67), കോങ്കോയില് നിന്നും വന്ന മറ്റൊരാള്ക്കുമാണ് (37) ഇന്നലെ എറണാകുളത്ത് ഒമിക്രോണ് സ്ഥിരീകരിച്ചത്. തിരുവനന്തപുരത്ത് ഒമിക്രോണ് സ്ഥിരീകരിച്ച യുവതിക്ക് (22) വിമാനത്തില് നിന്നുള്ള സമ്പര്ക്കം മാത്രമാണുള്ളത്. ഇവര് തിരുവനന്തപുരത്തെ പ്രത്യേക നിരീക്ഷണ കേന്ദ്രത്തിലാണുള്ളത്. എല്ലാവരുടേയും ആരോഗ്യനില തൃപ്തികരമാണ്.
ഒമിക്രോണ് സാഹചര്യത്തില് വാക്സിനേഷന് ഡ്രൈവ് ശക്തിപ്പെടുത്താനും യോഗം തീരുമാനിച്ചു. നാളെയും മറ്റന്നാളും പ്രത്യേക വാക്സിനേഷന് യജ്ഞം സംഘടിപ്പിക്കും. വാക്സിന് എടുക്കാത്തവര് ഉടന് തന്നെ വാക്സിന് എടുക്കേണ്ടതാണ്. രണ്ടാം ഡോസ് വാക്സിന് എടുക്കാന് സമയം കഴിഞ്ഞവരും എത്രയും വേഗം വാക്സിന് സ്വീകരിക്കണം. അവബോധം ശക്തിപ്പെടുത്തുന്നതാണ്. ബാക്ക് ടു ബേസിക്സ് അടിസ്ഥാനമാക്കി മാസ്ക്, സാനിറ്റൈസര് ഉപയോഗം, സാമൂഹിക അകലം എന്നിവ പാലിക്കണമെന്നും മന്ത്രി അഭ്യര്ത്ഥിച്ചു.