മകളെയും ചെറുമകളെയും ലൈംഗികമായി ചൂഷണം ചെയ്ത മുംബൈ സ്വദേശിക്ക് ജീവപര്യന്തം തടവ് ശിക്ഷ. മുംബൈയിലെ പോക്‌സോ പ്രത്യേക കോടതിയാണ് 65കാരനായ പ്രതിക്ക് ശിക്ഷ വിധിച്ചത്. മകളെ കൗമാര പ്രായം മുതല്‍ ബലാത്സംഗം ചെയ്ത ഇയാള്‍ മകളുടെ മകളെ ലൈംഗികമായി ചൂഷണം ചെയ്തിരുന്നു.
15 വയസ്സ് മുതല്‍ പിതാവ് തന്നെ ലൈംഗികമായി ചൂഷണം ചെയ്യുകയായിരുന്നു എന്ന് മകള്‍ കോടതിയില്‍ മൊഴി നല്‍കിയിരുന്നു. വിവാഹത്തിനു ശേഷം, സംഭവത്തെപ്പറ്റി ആരോടെങ്കിലും പറഞ്ഞാല്‍ തന്റെ മകളെയും ബലാത്സംഗം ചെയ്യുമെന്ന് പിതാവ് ഭീഷണിപ്പെടുത്തിയതായും മകള്‍ പറഞ്ഞു.
2017ല്‍ മുത്തച്ഛന്‍ തന്നെ ബലാത്സംഗം ചെയ്തു എന്ന് മകള്‍ പറഞ്ഞതായി ഇവര്‍ വെളിപ്പെടുത്തി. മുത്തച്ഛന്റെ വീട്ടില്‍ താമസിക്കാന്‍ പോയ സമയത്ത് മുത്തച്ഛന്‍ പുതപ്പിനടിയില്‍ വച്ച് തന്റെ സ്വകാര്യഭാഗങ്ങളില്‍ സ്പര്‍ശിച്ചെന്നും ലൈംഗികമായി ദുരുപയോഗം ചെയ്തു എന്നുമാണ് കുട്ടി പറഞ്ഞത്. ആ സമയത്ത് കുട്ടിക്ക് 11 വയസ്സായിരുന്നു. നാലാം ക്ലാസിലാണ് കുട്ടി പഠിച്ചുകൊണ്ടിരുന്നത്.
ദിവസങ്ങള്‍ക്കു ശേഷം മകള്‍ അമ്മയോട് വിവരം പറഞ്ഞു. പിന്നീട്, മകളെ വീണ്ടും ബലാത്സംഗം ചെയ്ത പിതാവ് ചെറുമകളെ തനിക്ക് കാഴ്ചവച്ചില്ലെങ്കില്‍ രണ്ട് പേരെയും കൊന്നുകളയുമെന്ന് ഭീഷണിപ്പെടുത്തി. തുടര്‍ന്നാണ് ഇവര്‍ പോലീസില്‍ പരാതി നല്‍കിയത്. തടവ് ശിക്ഷക്കൊപ്പം മകള്‍ക്ക് 50000 രൂപയും ചെറുമകള്‍ക്ക് 25000 രൂപയും നഷ്ടപരിഹാരം നല്‍കണമെന്നും കോടതി വിധിച്ചു.
