കൊച്ചി: നിരന്തര കുറ്റവാളിയായ വധശ്രമക്കേസ് പ്രതിയെ കേരള സാമൂഹികവിരുദ്ധ പ്രവർത്തനങ്ങൾ തടയൽ നിയമം (കാപ്പ) ചുമത്തി കൊച്ചി പോലീസ് നാടുകടത്തി. അശമന്നൂർ പുന്നയം മറ്റപ്പാടൻ വീട്ടിൽ ലിയോ (30) എന്നയാളെയാണ് ആറ് മാസത്തേക്ക് എറണാകുളം റൂറൽ പോലീസ് ജില്ലയുടെ അതിർത്തികളിൽ നിന്നും നാടുകടത്തിയത്. എറണാകുളം റൂറൽ ജില്ലാ പോലീസ് മേധാവിയുടെ ശുപാർശയുടെ അടിസ്ഥാനത്തിൽ എറണാകുളം റേഞ്ച് ഡി.ഐ.ജി ജി.എച്ച് യതീഷ് ചന്ദ്രയാണ് ഇതുസംബന്ധിച്ച ഉത്തരവിറക്കിയത്.
2020-ൽ പെരുമ്പാവൂർ പാലക്കാട്ടുതാഴം കണ്ടന്തറ ഭാഗത്ത് വച്ച് യുവാവിനെ കൈത്തോക്ക് ഉപയോഗിച്ച് വെടിവെച്ചും, തുടർന്ന് സംഘം ചേർന്ന് വാളും കത്തിയും ഉപയോഗിച്ച് വെട്ടിയും കുത്തിയും കൊലപ്പെടുത്താൻ ശ്രമിച്ച കേസിലെ ആറാം പ്രതിയാണ് ലിയോ. ഈ ക്രൂരമായ വധശ്രമത്തിന് പുറമേ, കഴിഞ്ഞ മെയ് മാസത്തിൽ സംഘം ചേർന്ന് വഴിതടഞ്ഞ് ഭീഷണിപ്പെടുത്തി പണം കവർച്ച ചെയ്യാൻ ശ്രമിച്ചതിന് കുറുപ്പംപടി പോലീസ് സ്റ്റേഷനിലും ഇയാൾക്കെതിരെ കേസ് രജിസ്റ്റർ ചെയ്തിരുന്നു. ഈ പശ്ചാത്തലത്തിലാണ് ലിയോക്കെതിരെ കാപ്പ നിയമപ്രകാരം അടിയന്തര നടപടി സ്വീകരിച്ചത്.
കുറുപ്പംപടി, പെരുമ്പാവൂർ പോലീസ് സ്റ്റേഷൻ പരിധികളിൽ വധശ്രമം, മാരകായുധങ്ങൾ ഉപയോഗിച്ചുള്ള കഠിന ദേഹോപദ്രവം, ഭീഷണിപ്പെടുത്തൽ, ആയുധ നിയമ പ്രകാരമുള്ള കേസുകൾ, സ്ഫോടക വസ്തു നിയമ പ്രകാരമുള്ള കേസുകൾ തുടങ്ങി നിരവധി ഗുരുതര കുറ്റകൃത്യങ്ങളിൽ സ്ഥിരമായി ഉൾപ്പെടുന്നയാളാണ് ലിയോ എന്ന് പോലീസ് വ്യക്തമാക്കി. പ്രദേശത്തെ ക്രമസമാധാന നില ഉറപ്പുവരുത്തുന്നതിന്റെ ഭാഗമായാണ് ഇയാളെ നാടുകടത്തിയിരിക്കുന്നത്. ഉത്തരവ് ലംഘിച്ച് അതിർത്തിക്കുള്ളിൽ പ്രവേശിച്ചാൽ കടുത്ത നിയമനടപടികൾ നേരിടേണ്ടിവരുമെന്നും പോലീസ് മുന്നറിയിപ്പ് നൽകി.
English SummaryIn a strong crackdown against habitual offenders, the police have deported the notorious criminal identified as Leo after invoking the KAAPA (Kerala Anti-Social Activities Prevention Act). Leo was involved in numerous grave criminal cases, including opening fire with a handgun, brutal stabbings, and multiple attempts to murder. As his continuous presence posed a severe threat to public peace and safety, law enforcement authorities took decisive action to banish him from the district limits to ensure local safety.