കണ്ണൂർ അഞ്ചരക്കണ്ടി ഡെന്റൽ കോളേജ് വിദ്യാർത്ഥി നിതിൻ രാജിന്റെ മരണവുമായി ബന്ധപ്പെട്ട ലോൺ ആപ്പ് ഭീഷണി കേസിൽ മൂന്ന് പേർ പിടിയിലായി. ഋഷികേശ് തിവാരി, പ്രശാന്ത് ഖേവൽ, പ്രകാശ് എന്നിവരെ നോയിഡയിൽ വെച്ച് സാഹസികമായാണ് കണ്ണൂർ സിറ്റി സൈബർ ക്രൈം പോലീസ് അറസ്റ്റ് ചെയ്തത്. ശനിയാഴ്ച കണ്ണൂരിലെത്തിച്ച പ്രതികളെ കോടതിയിൽ ഹാജരാക്കി റിമാൻഡ് ചെയ്തു.
നിതിൻ രാജിന്റെ മരണത്തിന് പിന്നാലെ ലോൺ ആപ്പുമായി ബന്ധപ്പെട്ട് ഉയർന്ന ഭീഷണി പരാതികളിൽ ചക്കരക്കൽ പോലീസ് സ്വമേധയാ എടുത്ത കേസിലാണ് ഈ നിർണ്ണായക അറസ്റ്റ്. നിതിൻ രാജിനെയും അധ്യാപികയെയും ഭീഷണിപ്പെടുത്തിയ സംഭവത്തിൽ ഈ സംഘത്തിന് പങ്കുണ്ടോ എന്ന് പോലീസ് വിശദമായി പരിശോധിച്ചുവരികയാണ്.
അറസ്റ്റിലായ പ്രതികൾക്ക് നിതിൻ രാജിന്റെ മരണവുമായി നേരിട്ട് ബന്ധമുണ്ടോ എന്ന കാര്യത്തിൽ കൂടുതൽ വ്യക്തത വരേണ്ടതുണ്ട്. ലോൺ ആപ്പ് നടത്തിപ്പുകാരുടെ നിരന്തരമായ ഭീഷണി നിതിനെ മാനസികമായി തളർത്തിയിരുന്നോ എന്നാണ് പോലീസ് പ്രധാനമായും അന്വേഷിക്കുന്നത്. അധ്യാപികയുടെ ഫോൺ നമ്പർ ഹാക്ക് ചെയ്ത് ലോൺ ആപ്പുകാർ ഭീഷണിപ്പെടുത്തിയ സംഭവത്തിലും ഈ സംഘത്തിന്റെ പങ്ക് പോലീസ് സംശയിക്കുന്നുണ്ട്. സൈബർ പോലീസിന്റെ സഹായത്തോടെ പ്രതികളുടെ ഫോൺ രേഖകളും സാമ്പത്തിക ഇടപാടുകളും പരിശോധിച്ചു വരികയാണ്. ഈ അറസ്റ്റോടെ ലോൺ ആപ്പ് മാഫിയയുടെ കൂടുതൽ കണ്ണികൾ വലയിലാകുമെന്നാണ് അന്വേഷണ സംഘത്തിന്റെ പ്രതീക്ഷ.
അതേസമയം, അന്വേഷണം ലോൺ ആപ്പിലേക്ക് മാത്രം ചുരുക്കി അധ്യാപകരെ രക്ഷിക്കാൻ അനുവദിക്കില്ലെന്ന ഉറച്ച നിലപാടിലാണ് നിതിൻ രാജിന്റെ കുടുംബം. നിതിൻ ഒരിക്കലും ലോൺ ആപ്പ് ഭീഷണി മൂലം ജീവനൊടുക്കില്ലെന്ന് സഹോദരി നിഖിത വ്യക്തമാക്കി. കാമ്പസിനുള്ളിൽ നിതിൻ നേരിട്ടിരുന്ന കടുത്ത ജാതിവിവേചനവും അധ്യാപകരുടെ മാനസിക പീഡനവുമാണ് മരണത്തിന് കാരണമെന്ന് കുടുംബം ആവർത്തിക്കുന്നു.
നിറത്തിന്റെ പേരിൽ പരിഹസിച്ചും സീനിയർ വിദ്യാർത്ഥികളെക്കൊണ്ട് റാഗിംഗ് ചെയ്യിച്ചും നിതിനെ വകുപ്പ് മേധാവികൾ പീഡിപ്പിച്ചിരുന്നുവെന്നും മാതാപിതാക്കൾ ആരോപിക്കുന്നു. അധ്യാപകർക്കെതിരെയുള്ള അന്വേഷണത്തിൽ നിന്ന് ശ്രദ്ധ തിരിക്കാനാണോ ലോൺ ആപ്പ് വിഷയം ഉയർത്തുന്നതെന്ന് കുടുംബം സംശയിക്കുന്നുണ്ട്.
Kannur Cyber Police have arrested three members of a loan app mafia from Noida in connection with the harassment cases linked to the late dental student Nithin Raj. While the trio is remanded, Nithin’s family alleges that the investigation is being diverted to the loan app issue to protect teachers accused of caste-based discrimination and mental torture. The parents demand a high-level probe into the systematic harassment Nithin faced within the college campus