ബെംഗലൂരു: കർണാടകയിൽ എൽ.പി.ജി (LPG) ക്ഷാമവും ഇന്ധന വിലക്കയറ്റവും മൂലം പ്രതിസന്ധിയിലായ ഓട്ടോറിക്ഷാ തൊഴിലാളികളെ സഹായിക്കാൻ മുന്നിട്ടിറങ്ങിയിരിക്കുകയാണ് നടൻ ധ്രുവ സർജ. സംസ്ഥാനത്തെ സ്വകാര്യ പമ്പുകളിൽ പാചകവാതക വില കുത്തനെ വർദ്ധിച്ചത് സാധാരണക്കാരായ ഓട്ടോ ഡ്രൈവർമാരുടെ വരുമാനത്തെ ബാധിച്ച പശ്ചാത്തലത്തിലാണ് താരത്തിന്റെ ഇടപെടൽ. ഓരോ ഓട്ടോറിക്ഷയ്ക്കും 500 രൂപ വീതമുള്ള എൽ.പി.ജി സൗജന്യമായി നിറച്ചുനൽകുന്ന പദ്ധതിക്കാണ് താരം തുടക്കമിട്ടിരിക്കുന്നത്. ബെംഗളൂരുവിലെ വിവിധ ഓട്ടോഗ്യാസ് പമ്പുകളിൽ ഇതിനായുള്ള നടപടികൾ ആരംഭിച്ചുകഴിഞ്ഞു.
സംസ്ഥാനത്തൊട്ടാകെയുള്ള 5000 ഓട്ടോറിക്ഷകൾക്കാണ് ഈ ആനുകൂല്യം ലഭിക്കുക. ഏകദേശം 25 ലക്ഷം രൂപയാണ് ഈ കാരുണ്യപ്രവർത്തനത്തിനായി താരം മാറ്റിവെച്ചിരിക്കുന്നത്. ധ്രുവ സർജ നിയോഗിച്ച പ്രത്യേക സംഘം ഗ്യാസ് പമ്പുകളിൽ നേരിട്ടെത്തിയാണ് ഇന്ധനം നിറയ്ക്കുന്നവർക്ക് പണം നൽകുന്നത്. ബെംഗളൂരുവിൽ വിജയകരമായി തുടങ്ങിയ ഈ പ്രവർത്തനം വരും ദിവസങ്ങളിൽ മൈസൂരു ഉൾപ്പെടെയുള്ള കർണാടകയിലെ മറ്റ് പ്രധാന നഗരങ്ങളിലേക്കും വ്യാപിപ്പിക്കും. പ്രതിസന്ധി ഘട്ടത്തിൽ ഓട്ടോ തൊഴിലാളികൾക്ക് വലിയ ആശ്വാസമാണ് താരത്തിന്റെ ഈ പ്രവൃത്തി നൽകുന്നത്.
സിനിമയ്ക്ക് പുറത്തും ജനകീയ ഇടപെടലുകൾ നടത്തുന്ന ധ്രുവ സർജയുടെ നീക്കത്തെ സോഷ്യൽ മീഡിയയും ഓട്ടോറിക്ഷാ യൂണിയനുകളും അഭിനന്ദിച്ചു. വിലക്കയറ്റം മൂലം നട്ടംതിരിയുന്ന സാധാരണക്കാർക്ക് ഇത്തരം സഹായങ്ങൾ വലിയ പിന്തുണയാണ് നൽകുന്നതെന്ന് തൊഴിലാളികൾ പ്രതികരിച്ചു. തന്റെ ആരാധകർ കൂടിയായ തൊഴിലാളികളെ സഹായിക്കാൻ ലഭിച്ച ഈ അവസരത്തിൽ താരം സന്തോഷം പ്രകടിപ്പിച്ചു. നേരത്തെയും കോവിഡ് കാലത്തും പ്രകൃതിക്ഷോഭങ്ങൾ ഉണ്ടായപ്പോഴും ധ്രുവ സർജ സമാനമായ രീതിയിൽ ജനങ്ങളെ സഹായിക്കാൻ രംഗത്തെത്തിയിരുന്നു.
Kannada actor Dhruva Sarja has extended a helping hand to autorickshaw drivers in Karnataka struggling with LPG shortages and rising fuel prices. He launched an initiative to provide ₹500 worth of free LPG to 5,000 autos across the state, spending a total of ₹25 lakh. The distribution started in Bengaluru and will soon expand to other major cities like Mysuru to support drivers during this economic crisis.