സ്വർണ്ണവിലയിൽ കുതിപ്പ്: പവൻ 1.14 ലക്ഷം കടന്നു; ബാങ്കുകൾക്ക് നേരിട്ട് ഇറക്കുമതി ചെയ്യാൻ കേന്ദ്രാനുമതി

കൊച്ചി: സംസ്ഥാനത്ത് സ്വർണ്ണവില വീണ്ടും വർദ്ധിച്ച് പുതിയ ചരിത്ര റെക്കോർഡിലെത്തി. ഇന്ന് ഒരു പവൻ സ്വർണ്ണത്തിന് 600 രൂപ വർദ്ധിച്ച് 1,14,240 രൂപയായി ഉയർന്നു. ഗ്രാമിന് 75 രൂപ വർദ്ധിച്ചതോടെ ഒരു ഗ്രാം സ്വർണ്ണത്തിന്റെ വില 14,280 രൂപയിലെത്തി നിൽക്കുകയാണ്. ഈ മാസത്തെ ഏറ്റവും ഉയർന്ന നിരക്കാണിത്. ഇന്നലെ രാത്രി രേഖപ്പെടുത്തിയ 1,13,640 രൂപയിൽ നിന്നാണ് ഇന്ന് വില വീണ്ടും കുതിച്ചുയർന്നത്. അക്ഷയ തൃതീയ ദിനമായ നാളെ വിലയിൽ എന്ത് മാറ്റമുണ്ടാകുമെന്ന് ആശങ്കയോടെയും ആകാംക്ഷയോടെയുമാണ് സ്വർണ്ണാഭരണ പ്രേമികൾ കാത്തിരിക്കുന്നത്.

അതേസമയം, രാജ്യത്തെ സ്വർണ്ണ-വെള്ളി വിപണിയിൽ നിർണ്ണായകമായ ഇടപെടലുമായി കേന്ദ്ര സർക്കാർ രംഗത്തെത്തിയിട്ടുണ്ട്. എസ്.ബി.ഐ, എച്ച്.ഡി.എഫ്.സി, ആക്സിസ് ബാങ്ക് തുടങ്ങി 15 പ്രമുഖ ബാങ്കുകൾക്ക് വിദേശത്തുനിന്ന് സ്വർണ്ണവും വെള്ളിയും നേരിട്ട് ഇറക്കുമതി ചെയ്യാൻ കേന്ദ്രം അനുമതി നൽകി. 2026 ഏപ്രിൽ 1 മുതൽ 2029 മാർച്ച് 31 വരെയുള്ള മൂന്ന് വർഷത്തേക്കാണ് ഈ അനുമതി നൽകിയിരിക്കുന്നത്. യൂണിയൻ ബാങ്ക് ഓഫ് ഇന്ത്യ, റഷ്യൻ ബാങ്കായ സ്ബെർ ബാങ്ക് എന്നിവയ്ക്ക് സ്വർണ്ണം മാത്രമേ ഇറക്കുമതി ചെയ്യാൻ അനുവാദമുള്ളൂ എങ്കിലും മറ്റുള്ളവർക്ക് വെള്ളിയും കൊണ്ടുവരാം. ഇറക്കുമതി നിയന്ത്രണങ്ങൾ നീങ്ങിയത് വിപണിയിലെ ലഭ്യതക്കുറവ് പരിഹരിക്കാൻ സഹായിക്കുമെന്നാണ് വിലയിരുത്തൽ.

നേരത്തെ സർക്കാർ വിജ്ഞാപനം വൈകിയത് കാരണം ബാങ്കുകൾ ഇറക്കുമതി താൽക്കാലികമായി നിർത്തിവെച്ചത് വിപണിയിൽ വലിയ ആശയക്കുഴപ്പമുണ്ടാക്കിയിരുന്നു. സ്വർണ്ണത്തിന് ലഭ്യത കുറയുമെന്ന വാർത്തകൾ പരന്നതോടെ പ്രമുഖ ജ്വല്ലറി ഗ്രൂപ്പുകളുടെ ഓഹരി വിലയിൽ വലിയ ഇടിവുണ്ടായി. കല്യാൺ ജ്വല്ലേഴ്സ് ഓഹരികൾ ആറ് ശതമാനത്തോളം ഇടിഞ്ഞ് 415.25 രൂപയിലെത്തിയിരുന്നു. എന്നാൽ പുതിയ അനുമതി ലഭിച്ചതോടെ വിപണിയിൽ സ്ഥിരത തിരിച്ചുവരുമെന്നാണ് പ്രതീക്ഷിക്കുന്നത്. ഈ മാസം രണ്ടാം തീയതി രേഖപ്പെടുത്തിയ 1,09,240 രൂപയാണ് ഏപ്രിലിലെ ഏറ്റവും കുറഞ്ഞ നിരക്ക്. അവിടെ നിന്ന് പതിനഞ്ച് ദിവസങ്ങൾക്കിപ്പുറം വില 1.14 ലക്ഷം കടന്നത് സാധാരണക്കാരെ സംബന്ധിച്ച് വലിയ ആശങ്കയാണ് ഉണ്ടാക്കുന്നത്.

Gold prices in Kerala have hit a new all-time high, reaching ₹1,14,240 per sovereign today. Amidst this surge, the Central Government has authorized 15 major banks, including SBI and HDFC, to directly import gold and silver for the next three years to stabilize market supply. This policy move aims to resolve recent market confusion and supply shortages that had previously caused a dip in jewelry group share prices.