പാലക്കാട്: നെന്മാറയിൽ വീടിനകത്ത് വെച്ച് പാമ്പുകടിയേറ്റ് അതീവ ഗുരുതരാവസ്ഥയിൽ ചികിത്സയിലായിരുന്ന പതിമൂന്നുകാരി മരിച്ചു. നെന്മാറ ചക്കാത്തറ സ്വദേശികളായ രാമൻ-അംബിക ദമ്പതികളുടെ മകൾ രാജേശ്വരിയാണ് ഞായറാഴ്ച രാവിലെ മരണത്തിന് കീഴടങ്ങിയത്. രണ്ടാഴ്ച മുൻപ് വീടിനുള്ളിൽ കളിച്ചുകൊണ്ടിരിക്കെയാണ് കുട്ടിയെ വിഷപ്പാമ്പ് കടിച്ചത്.
മേയ് 14-ന് ഉച്ചയ്ക്കായിരുന്നു നാടിനെ നടുക്കിയ സംഭവം നടന്നത്. പാമ്പുകടിയേൽക്കുന്ന സമയത്ത് രാജേശ്വരി വീട്ടിൽ തനിച്ചായിരുന്നു. അതിനാൽ കുട്ടിക്ക് പാമ്പുകടിയേറ്റ വിവരം ആരുമറിഞ്ഞില്ല. വൈകുന്നേരം ജോലി കഴിഞ്ഞ് വീട്ടിൽ തിരിച്ചെത്തിയ പിതൃസഹോദരനും ഭാര്യയുമാണ് കുട്ടിയെ വായിൽ നുരയും പതയും വന്ന നിലയിൽ അബോധാവസ്ഥയിൽ തറയിൽ കിടക്കുന്നത് കണ്ടത്.
അബോധാവസ്ഥയിലായ കുട്ടിയെ ഉടൻ തന്നെ നെന്മാറ സർക്കാർ ആശുപത്രിയിലും, തുടർന്ന് നില വഷളായതിനെ തുടർന്ന് ആലത്തൂരിലെ സ്വകാര്യ ആശുപത്രിയിലും പ്രവേശിപ്പിച്ചു. എന്നാൽ ശരീരത്തിൽ വിഷം പടർന്നതിനാൽ കുട്ടിയുടെ നില അതീവ ഗുരുതരമായി തുടരുകയായിരുന്നു. തുടർന്ന് വിദഗ്ദ്ധ ചികിത്സയ്ക്കായി തൃശൂർ മെഡിക്കൽ കോളേജ് ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല. രണ്ടാഴ്ചയോളം മരണത്തോട് പൊരുതിയ ശേഷമാണ് രാജേശ്വരി വിടപറഞ്ഞത്.
മൂർഖൻ പാമ്പാണ് കുട്ടിയെ കടിച്ചതെന്ന് പിന്നീട് സ്ഥിരീകരിച്ചു. ആശുപത്രി അധികൃതർ അറിയിച്ചതനുസരിച്ച് പോലീസ് ഇൻക്വസ്റ്റ് നടപടികൾ പൂർത്തിയാക്കി. തൃശൂർ മെഡിക്കൽ കോളേജിൽ വെച്ച് പോസ്റ്റ്മോർട്ടം നടപടികൾ പൂർത്തിയാക്കിയ ശേഷം മൃതദേഹം ബന്ധുക്കൾക്ക് വിട്ടുനൽകി. നെന്മാറ പഴയഗ്രാമം എ.ൽ.എൻ.എസ്. യു.പി സ്കൂളിലെ ഏഴാം ക്ലാസ് വിദ്യാർത്ഥിനിയാണ് രാജേശ്വരി. സഹോദരൻ: കൃഷ്ണപ്രസാദ്. കുട്ടിയുടെ അപ്രതീക്ഷിത വിയോഗത്തിൽ നെന്മാറ പഴയഗ്രാമം സ്കൂളിലെ അധ്യാപകരും സുഹൃത്തുക്കളും അനുശോചനം രേഖപ്പെടുത്തി.
English Summary
A 13-year-old girl, who was undergoing treatment after being bitten by a cobra inside her house in Nenmara, Palakkad, passed away on Sunday morning. The deceased was identified as Rajeshwari, daughter of Raman and Ambika, residing at Chakkathara, Nenmara. The incident occurred on May 14 when Rajeshwari was alone at home. Her uncle and his wife found her unconscious with froth coming out of her mouth upon returning from work in the evening. Though she was rushed to Nenmara Government Hospital, a private hospital in Alathur, and later shifted to Thrissur Medical College for expert care, her life could not be saved. Rajeshwari was a class 7 student at LNS UP School, Pazhayagramam.