തിരുവനന്തപുരം: കേരളത്തില്‍ മൂന്ന് ദിവസത്തിനുള്ളില്‍ കാലവര്‍ഷം എത്തിച്ചേരാന്‍ സാധ്യത. അറബിക്കടലില്‍ ന്യൂനമര്‍ദം രൂപപ്പെട്ടതിനെത്തുടര്‍ന്ന് 2, 3 ദിവസത്തിനുള്ളില്‍ കേരളത്തില്‍ കാലവര്‍ഷം എത്തിച്ചേരുമെന്ന് കേന്ദ്ര കാലാവസ്ഥ വകുപ്പ് അറിയിച്ചു. ബംഗാള്‍ ഉള്‍ക്കടലിലും ന്യൂനമര്‍ദ സാധ്യതയുണ്ട്.
മധ്യ കിഴക്കന്‍ അറബിക്കടലില്‍ വടക്കന്‍ കര്‍ണാടക ഗോവ തീരത്തിന് മുകളിലായാണു ന്യൂനമര്‍ദം രൂപപ്പെട്ടിരിക്കുന്നത്. തുടര്‍ന്നു വടക്കോട്ട് നീങ്ങി 36 മണിക്കൂറിനുള്ളില്‍ തീവ്രന്യൂനമര്‍ദമായി ശക്തി പ്രാപിക്കും. 27ന് മധ്യ പടിഞ്ഞാറന്‍ വടക്കന്‍ ബംഗാള്‍ ഉള്‍ക്കടലിനു മുകളിലായി മറ്റൊരു ന്യൂനമര്‍ദവും രൂപപ്പെട്ടേക്കുമെന്നും കാലാവസ്ഥ വകുപ്പ് അറിയിച്ചു.
അതേസമയം സംസ്ഥാനത്ത് ഇന്നു മുതല്‍ അഞ്ച് ദിവസം വ്യാപകമായി മഴ ലഭിക്കും. ഇന്നും 26നും ഒറ്റപ്പെട്ട അതിശക്തമായ മഴയുണ്ടാകും. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ ഇന്ന് യെലോ അലര്‍ട്ട് പ്രഖ്യാപിച്ചിട്ടുണ്ട്.
കള്ളക്കടല്‍ പ്രതിഭാസം മൂലം കേരളതീരത്ത് ഇന്ന് രാത്രി 8.30 വരെ 0.5 മീറ്റര്‍ മുതല്‍ ഒരു മീറ്റര്‍ വരെയും കന്യാകുമാരി തീരത്ത് ഒരു മീറ്റര്‍ മുതല്‍ 1.1 മീറ്റര്‍ വരെയും ഉയരത്തില്‍ തിരയ്ക്കു സാധ്യതയുണ്ട്. മത്സ്യത്തൊഴിലാളികളും തീരദേശവാസികളും ജാഗ്രത പുലര്‍ത്തണം. മണിക്കൂറില്‍ 55 കിലോമീറ്റര്‍ വരെ വേഗത്തിലുള്ള കാറ്റിനും സാധ്യത. കേരള, ലക്ഷദ്വീപ് തീരത്ത് 26 വരെ മത്സ്യബന്ധനം വിലക്കി.