കൊല്ലം: കൊട്ടാരക്കര ഡിപ്പോയില് നിന്നു കാണാതായ കെ.എസ്.ആര്.ടി.സി ബസ് കണ്ടെത്തി. കൊല്ലം പാരിപ്പള്ളിയിലാണ് ബസ് ഉപേക്ഷിച്ച നിലയില് കണ്ടെത്തിയത്. സംഭവത്തില് പോലീസ് അന്വേഷണം തുടരുകയാണ്. സിസിടിവി കേന്ദ്രീകരിച്ചുള്ള അന്വേഷണമാണ് നടക്കുന്നത്.
ഇന്ന് രാവിലെയാണ് കൊട്ടാരക്കര ഡിപ്പോയിലെ വേണാട് ബസ് കാണാനില്ലെന്ന് അധികൃതര്ക്ക് മനസിലാകുന്നത്. പിന്നാലെ പോലീസില് പരാതി നല്കി അന്വേഷണം പുരോഗമിക്കുന്നതിനിടെയാണ് ബസ് കണ്ടെത്തിയത്. ഇന്ന് പുലര്ച്ചെയാണ് വിചിത്ര മോഷണം നടന്നതെന്ന് കരുതുന്നു.
ഞായറാഴ്ച രാത്രി 9.30 ഓടെ സര്വീസിംഗിന് ഗാരേജില് കയറ്റിയ വാഹനം പിന്നീട് 12.30 ഓടെ പുറത്തിറക്കിയതാണെന്ന് ജീവനക്കാര് പറയുന്നു. ഡിപ്പോയ്ക്ക് സമീപത്തെ മുന്സിപ്പല് ഓഫീസിന് മുന്നില് റോഡ് വശത്താണ് ബസ് പാര്ക്ക് ചെയ്തിരുന്നത്. രാവിലെ ഡിപ്പോ അധികൃതര് ബസ് തിരഞ്ഞെങ്കിലും കണ്ടില്ല.
പിന്നീട് പുലര്ച്ചെ ഡ്യൂട്ടിക്കെത്തിയ ഡ്രൈവര്മാര് ആരെങ്കിലും ബസ് മാറിക്കൊണ്ടുപോയി എന്ന് ഡിപ്പോ അധികൃതര് കരുതി. പുലര്ച്ചെ സര്വീസ് തുടങ്ങിയ ബസിലെ ജീവനക്കാരെയെല്ലാം വിളിച്ച് തിരക്കിയെങ്കിലും ആരും ബസ് കൊണ്ടുപോയിട്ടില്ലെന്ന മറുപടിയാണ് ലഭിച്ചത്. പിന്നാലെയാണ് മോഷണം പോയെന്ന ബോധ്യം ഡിപ്പോ അധികൃതര്ക്ക് ഉണ്ടായത്.