മുംബൈ: ചലച്ചിത്ര-സീരിയൽ നടി തുനിഷ ശർമയുടെ മരണം സൃഷ്ടിച്ച അലയൊലികൾ ഇനിയും അടങ്ങിയിട്ടില്ല. മുംബൈ വസായിയിലെ ഭജൻലാൽ സ്റ്റുഡിയോയിലായിരുന്നു തുനിഷയെ മരിച്ചനിലയിൽ കണ്ടെത്തിയത്. ആലിബാബ-ദാസ്താൻ ഇ കാബൂൾ എന്ന പരമ്പരയുടെ ചിത്രീകരണത്തിനിടെയായിരുന്നു ഇത്. ഇപ്പോഴിതാ ഈ സ്റ്റുഡിയോ വൻ തീപ്പിടിത്തത്തിൽ കത്തിയമർന്നു എന്ന വാർത്തയാണ് പുറത്തുവന്നിരിക്കുന്നത്.
വെള്ളിയാഴ്ച അർധരാത്രിയോടെയാണ് ഭജൻലാൽ സ്റ്റുഡിയോയിൽ അഗ്നിബാധയുണ്ടായതെന്ന് അഗ്നിശമന സേനാംഗങ്ങളെ ഉദ്ധരിച്ചുകൊണ്ട് ദേശീയമാധ്യമങ്ങൾ റിപ്പോർട്ട് ചെയ്തു. ശനിയാഴ്ച പുലർച്ചെ നാലുമണിയോടെയാണ് തീ അണച്ചത്. അഗ്നിബാധയുടെ കാരണം വ്യക്തമല്ലെന്ന് വസായ്-വിരാർ സിറ്റി മുനിസിപ്പൽ കോർപ്പറേഷൻ ബ്രിഗേഡ് അധികൃതർ അറിയിച്ചു.
അഞ്ചുമാസം മുമ്പാണ് തുനിഷയുടെ മരണം. അഭിനയിച്ചുകൊണ്ടിരുന്ന സീരിയലിന്റെ സെറ്റിൽ തൂങ്ങിമരിച്ച നിലയിലാണ് കണ്ടെത്തിയത്. മഹാരാഷ്ട്രയിലെ ആശുപത്രിയിൽ എത്തിച്ചശേഷമായിരുന്നു മരണം സ്ഥിരീകരിച്ചത്. സംഭവവുമായി ബന്ധപ്പെട്ട് ആലിബാബ-ദാസ്താൻ ഇ കാബൂളിലെ സഹതാരം ഷീസാൻ ഖാനെ പോലീസ് അറസ്റ്റ് ചെയ്തിരുന്നു. തുനിഷയും ഷീസാനും പ്രണയത്തിലായിരുന്നുവെന്നും ഈ ബന്ധം തകർന്നതാണ് നടിയെ ആത്മഹത്യയിലേക്ക് നയിച്ചതെന്നുമാണ് പുറത്തുവന്ന റിപ്പോർട്ട്.
ഇക്കഴിഞ്ഞ മാർച്ച് അഞ്ചിനാണ് കേസിൽ ജാമ്യം ലഭിച്ച ഷീസാൻ ഖാൻ ജാമ്യത്തിലിറങ്ങിയത്. ഈയിടെ ചിത്രീകരണത്തിനായി വിദേശത്തുപോകാൻ ഷീസാനെ കോടതി അനുവദിച്ചിരുന്നു. നിലവിൽ ഖത്രോം കേ ഖിലാഡി -സീസൺ 13 എന്ന റിയാലിറ്റി ഷോ ചിത്രീകരണവുമായി ബന്ധപ്പെട്ട് ദക്ഷിണാഫ്രിക്കയിലാണ് താരമുള്ളത്.
