കോട്ടയം: കല്യാണത്തിന് മണിക്കൂറുകള് മാത്രം ശേഷിക്കേ പ്രതിശ്രുത വരന് വിവാഹിതനാണെന്ന് അറിഞ്ഞതോടെ വിവാഹം മുടങ്ങി. അര്ധരാത്രി വധുവിന്റെ വാട്സാപ്പിലേക്ക് വരന്റെ വിവാഹചിത്രം എത്തിയതോടെയാണ് സംഭവങ്ങളുടെ തുടക്കം. ഇതോടെ വരന് മുങ്ങി. ഇയാളുടെ പേരില് പോലീസ് കേസെടുത്തു. ഞായറാഴ്ച എലിക്കുളം ക്ഷേത്ര ഓഡിറ്റോറിയത്തില് നടത്താനിരുന്ന വിവാഹമാണ് മുടങ്ങിയത്. എലിക്കുളം സ്വദേശിനിയാണ് വധു. എലിക്കുളം പഞ്ചായത്തിലെതന്നെ വഞ്ചിമല കൂനാനിക്കല്താഴെ സനിലായിരുന്നു വരന്. വരന്റെയും വധുവിന്റെയും വീടുകളില് ശനിയാഴ്ച രാത്രിയും ആഘോഷങ്ങളുണ്ടായിരുന്നു.
വരന്റെ വീട്ടില് തലേന്ന് രാത്രി സദ്യ നടക്കുമ്പോള് ഭാവഭേമില്ലാതെ ഇയാളും എല്ലാത്തിനും മുന്നിരയിലുണ്ടായിരുന്നു. വധുവിന്റെ ഫോണിലേക്ക് ശനിയാഴ്ച രാത്രി 11 മണിയോടെയാണ് പെരിന്തല്മണ്ണ സ്വദേശിനിയുടെ ഫോണില്നിന്ന് വിളി വന്നത്. അവരുടെ അച്ഛന്റെ സഹോദരനാണ് വിളിച്ചത്. സനിലും പെരിന്തല്മണ്ണ സ്വദേശിനിയും മലപ്പുറം പെരിന്തല്മണ്ണയ്ക്കടുത്ത് സ്വകാര്യ സ്കൂളില് അധ്യാപകരാണ്.
ഇരുവരും 13 വര്ഷമായി ഒരുമിച്ചു ജീവിക്കുകയാണെന്നും വിവാഹിതരാണെന്നുമാണ് പറഞ്ഞത്. സനിലുമായി പെരിന്തല്മണ്ണ സ്വദേശിനിയുടേത് പുനര്വിവാഹമായിരുന്നു. 13 വര്ഷമായി ഒരുമിച്ചു ജീവിച്ച ഇവര് കഴിഞ്ഞയാഴ്ചയാണ് ചേര്ത്തലയിലെ ക്ഷേത്രത്തില് ഔദ്യോഗികമായി വിവാഹിതരായത്. ഈ ബന്ധം വീട്ടിലറിയിച്ചിട്ടില്ലെന്ന് സനില് യുവതിയോട് പറഞ്ഞിരുന്നു.
വിവാഹം മുടക്കാന് പലരും ശ്രമിക്കുമെന്ന് സനില് പ്രതിശ്രുതവധുവിന് നേരത്തേ മുന്നറിയിപ്പ് നല്കിയിരുന്നതിനാല് വധു ആദ്യം വിശ്വസിച്ചില്ല. പിന്നീട് വിവാഹഫോട്ടോ വാട്സ് ആപ്പില് കിട്ടിയപ്പോഴും വിശ്വസിച്ചില്ല. രാത്രിതന്നെ സനിലിന് വധു ഈ ഫോട്ടോ അയച്ചുകൊടുത്ത് വിശദീകരണം തേടിയപ്പോള് ഇയാള് പ്രതികരിച്ചില്ല. ഫോണെടുക്കാതായതോടെ സംഭവം സത്യമാണെന്ന് സംശയമുയര്ന്നു. പുലര്ച്ചെ ഇയാള് ബൈക്കില് വീട്ടില്നിന്ന് യാത്രയാവുകയും ചെയ്തു. ഇരുകൂട്ടരുടെയും ബന്ധുക്കള് പരസ്പരം അറിയുന്നവരാണ്. നേരം പുലര്ന്നപ്പോള് സംഭവം സത്യമാണെന്ന് ബോധ്യപ്പെടുകയായിരുന്നു. തുടര്ന്ന് വധുവിന്റെ വീട്ടുകാര് പൊന്കുന്നം പോലീസില് പരാതി നല്കി. വിവാഹം മുടങ്ങിയതിന് നഷ്ടപരിഹാരം ആവശ്യപ്പെട്ടിട്ടുണ്ട്. സത്യം മറച്ചുവെച്ച് വീണ്ടും വിവാഹത്തിനൊരുങ്ങിയതിന് സനിലിന്റെ പേരില് കേസെടുത്തു.